తెలంగాణలో డెంగీ డేంజర్ బెల్స్,,,,జ్వరంతో పదేళ్ల బాలుడు మృతి

తెలంగాణలో డెంగీ డేంజర్ బెల్స్ మోగిస్తోంది. పల్లెలు, పట్టణాలు అనే తేడా లేకుండా డెంగీ జ్వరాలు విజృంభిస్తున్నాయి. చాలా మంది డెంగీ బారిన పడి ఆసుపత్రులకు క్యూ కడుతున్నారు. తెలంగాణలో ఇప్పటి వరకు దాదాపు 3 వేలకు పైగా డెంగీ కేసులు నమోదవుతున్నాయి. హైదరాబాద్‌లోనే వెయ్యికి పైగా కేసులు నమోదయ్యాయి. ఉస్మానియా, గాంధీ, నల్లకుంట ఫీవర్ ఆసుపత్రులకు ప్రజలు క్యూ కడుతున్నారు. డెంగీ జ్వరాలు ప్రధానంగా టైగర్ దోమ కాటు వల్ల వస్తాయి. ఇవి చిన్న పిల్లలు, వృద్దులపై ఎక్కువగా ప్రభావం చూపుతాయి.

ప్రమాదకర డెంగీ బారినపడి పలువురు ప్రాణాలు కూడా కోల్పోయారు. తాజాగా.. రంగారెడ్డి జిల్లా శంకర్‌పల్లి మండలం టంగుటూరులో డెంగీ జ్వరంతో ఓ పదేళ్ల బాలుడు ప్రాణాలు కోల్పోయాడు. గ్రామానికి చెందిన అబ్బగోని మహేష్ గౌడ్ కుమారుడు గౌతమ్ సాయి (10) నాలుగు రోజుల క్రితం డెంగీ జ్వరం బారినపడ్డాడు. దీంతో తల్లిదండ్రులు మెరుగైన వైద్యం కోసం హైదరాబాద్ నగరంలోని ఓ ప్రైవేటు ఆసుపత్రిలో జాయిన్ చేశారు. అయినా ఫలితం లేకుండా పోయింది. ట్రీట్‌మెంట్ జరగుతుండగానే.. బాలుడు ప్రాణాలు కోల్పోయాడు. దీంతో చిన్నారి కుటుంబంలో తీవ్ర విషాదం అలుముకుంది.

కాగా, డెంగీ చిన్నపిల్లలపై ఎక్కువ ప్రభావం చూపిస్తుండటంతో జాగ్రత్తగా ఉండాలని వైద్యులు చెబుతున్నారు. టైగర్ దోమ కారణంగా డెంగీ ఫీవర్ వ్యాప్తి చెందుతుంది కాబట్టి దోమలు లేకుండా జాగ్రత్తలు తీసుకోవాలని చెబుతున్నారు. ఈ దోమలు డే టైమ్‌లోనే ఎక్కువగా కుడతాయని.. స్కూల్‌కు వెళ్లే చిన్నారుల విషయంలోనూ జాగ్రత్తగా ఉండాలని అంటున్నారు. ఇంటి పరిసరాలు పరిశుభ్రంగా ఉంచుకోవాలని సూచిస్తున్నారు. తాగేసిన కొబ్బరి బోండాలు, టైర్లు, ఉపయోగించని వంట పాత్రలు, పూల కుండీలు, మురుగు కాల్వల్లో నీరు నిల్వ ఉండకుండా చూడాలంటున్నారు.

అలాగే పిల్లలకు శరీరాన్ని పూర్తిగా కప్పి ఉంచేలా దుస్తులు వేయాలని సూచిస్తున్నారు. ఇంటి తలుపులు, కిటికీలు తెరిచి ఉంచకుండా దోమ తెరలు ఉపయోగించాలని చెబుతున్నారు. పిల్లలకు జ్వరం లక్షణాలు కనిపిస్తే ఇంటి వైద్యం వంటివి చేయకుండా డాక్టర్లను సంప్రదించాలని అంటున్నారు.