తెలంగాణలో బీసీ కుల గణన.. రేవంత్ సర్కార్‌కు హైకోర్టు కీలక ఆదేశాలు

తెలంగాణలో బీసీ కులగణన విషయంలో రేవంత్ రెడ్డి సర్కారుకు ఉన్నత న్యాయస్థానం కీలక ఆదేశాలు జారీ చేసింది. తెలంగాణలో మూడు నెలల్లో బీసీ కులగణన ప్రక్రియ పూర్తి చేయటమే కాకుండా.. ఆ నివేదికను ధర్మాసనానికి సమర్పించాలని రాష్ట్ర ప్రభుత్వాన్ని హైకోర్టు ఆదేశించింది. తెలంగాణలో బీసీ కులగణన చేపట్టాలంటూ 2019 సంవత్సరంలో బీసీ సంక్షేమ సంఘ రాష్ట్ర అధ్యక్షులు ఎర్ర సత్యనారాయణ హైకోర్టులో పిటిషన్ దాఖలు చేశారు. సత్యనారాయణ వేసిన పిటిషన్‌పై మంగళవారం (సెప్టెంబర్ 10న) పోజున చీఫ్ జస్టిస్ ధర్మాసనం విచారణ చేపట్టింది.

పిటిషనర్ తరఫున లాయర్ నాగుల శ్రీనివాస్ యాదవ్ వాదనలు వినిపించారు. బీసీ కులగణనపై సుప్రీం కోర్టు ఉత్తర్వులున్నాయని శ్రీనివాస్ యాదవ్.. హైకోర్టు ధర్మాసనానికి వివరించారు. మరోవైపు.. తెలంగాణలో కుల గణన చేసేందుకు ప్రభుత్వం సిద్ధంగా ఉందని ప్రభుత్వ తరపున వాదనలు వినిపించిన అడ్వకేట్ జనరల్ ధర్మాసనానికి తెలిపారు. ఇరువైపులా వాదనలు విన్న హైకోర్టు.. మూడు నెలల్లో తెలంగాణలో బీసీ కుల గణన ప్రక్రియ పూర్తిచేసి.. నివేదిక సమర్పించాలని రాష్ట్ర ప్రభుత్వాన్ని ఆదేశించిన ధర్మాసనం.. ఈ పిటిషన్‎పై విచారణను ముగించింది.

కాగా.. రాష్ట్రంలో బీసీ కుల గణన చేపట్టేందుకు రేవంత్ సర్కార్ ముందు నుంచి కసరత్తు చేస్తోంది. బీసీ కుల గణన పూర్తి చేసిన తర్వాతే.. స్థానిక సంస్థల ఎన్నికలకు వెళ్లాలని రేవంత్ రెడ్డి ప్రభుత్వం భావిస్తున్నట్టు సమాచారం. అందుకు అనుగుణంగానే.. ఇటీవల రాష్ట్ర బీసీ కమిషన్‌కు కొత్తగా ఛైర్మన్‌ను, కొత్త సభ్యులను నియమిస్తూ ఉత్తర్వులు కూడా జారీ చేసింది. అయితే.. అసెంబ్లీ ఎన్నికల సమయం నుంచి కూడా.. బీసీ కుల గణనపై కాంగ్రెస్ పార్టీ గానీ, రేవంత్ రెడ్డి కానీ.. సుముఖత వ్యక్తం చేస్తున్న విషయం తెలిసిందే.

కాగా.. కులగణన పూర్తయిన తర్వాతే స్థానిక సంస్థ ఎన్నికలు నిర్వహించాలని కూడా సీఎం రేవంత్ రెడ్డి భావిస్తున్నట్టు ఆయన సన్నిహితుల నుంచి వినిపిస్తున్న మాట. మరోవైపు.. ఇప్పటికే సర్పంచ్ ఎన్నికలు ఆలస్యమవుతుండటంతో.. ఇప్పటికే ఉన్న రిజర్వేషన్ల ప్రకారం నిర్వహించాలన్న ఆలోచన కూడా చేస్తున్నట్టు వార్తలు వస్తున్నాయి. ఒకవేళ కుల గణన పూర్తి చేసి కొత్త రిజర్వేషన్లతో ఎన్నికలకు వెళ్లాలంటే మాత్రం.. స్థానిక సంస్థల ఎన్నికలు మరింత ఆసల్యం అయ్యే అవకాశం ఉంది.

మూడు నెలల్లో బీసీ కులగణన పూర్తయినప్పటికీ.. ఎన్నికలు జరిపేందుకు సుమారు 6 నెలలు పట్టే అవకాశం ఉందని ప్రజలు అంచనా వేస్తున్నారు. మరి చూడాలి.. కుల గణన పూర్తయిన తర్వాతే సర్పంచ్ ఎన్నికలు నిర్వహిస్తారా.. లేదా ఇప్పటికే ఉన్న రిజర్వేషన్లతోనే ముందుకెళ్తారా అన్నది ఇప్పుడు సర్వత్రా ఆసక్తికరంగా మారింది.