శంషాబాద్ ఎయిర్పోర్ట్లో కొత్త సదుపాయం..ఆ టెన్షన్ అక్కర్లేదు
Telangana Telugu | Suryaa Desk | Published : Tue, Sep 10, 2024, 08:59 PM
హైదరాబాద్ శంషాబాద్ ఎయిర్పోర్టు నుంచి రాకపోకలు సాగించే ప్రయాణికులకు గుడ్న్యూస్. ఇక నుంచి ప్రయాణికుల సమయం, శ్రమ ఆదా కానుంది. ఎయిర్ పోర్టు ప్రయాణికులకు 'సిటీ సైడ్ చెక్-ఇన్ అండ్ బ్యాగేజ్ డ్రాప్ ఫెసిలిటీ' పేరిట కొత్త సదుపాయం అందుబాటులోకి వచ్చింది. ప్రముఖ ఎయిర్వేస్ సంస్థ ఎయిరిండియా ఈ సదుపాయాన్ని అందుబాటులోకి తెచ్చింది. ఎయిరిండియాతో పాటు ఎయిరిండియా ఎక్స్ప్రెస్, విస్తారా ప్రయాణికులకు కూడా ఈ సదుపాయం లభిస్తుందని సంస్థ ప్రతినిధులు వెల్లడించారు.
ప్రయాణికులు తమ బ్యాగేజీని ఇక డిపార్చర్ లెవల్ వరకు తీసుకువెళ్లే అవసరం లేదు. వాహనాల పార్కింగ్ - బస్టాండుకు సమీపంలోని గ్రౌండ్ఫ్లోర్లో ఉన్న స్పెషల్ కౌంటర్ అప్పగించొచ్చు. ఈ మేరకు అవకాశం కల్పిస్తున్నట్లు ఎయిర్ ఇండియా స్పష్టం చేసింది. ఫ్లైట్ బయల్దేరటానికి 6 గంటల ముందు నుంచి, 90 నిమిషాల ముందు వరకు కూడా ప్రయాణికుల ఈ కౌంటర్లో చెక్ ఇన్ బ్యాగులు ఇవ్వవచ్చనునని చెప్పారు. లగేజీ బ్యాగులు కిందే ఇచ్చేయటం వల్ల ప్రయాణికులకు చెక్-ఇన్ ప్రక్రియ చాలా ఈజీ అవుతుందని చెప్పారు. సమయం ఆదా అవుతుందని ఎయిరిండియా ప్రతినిధులు వెల్లడించారు.
కాగా, ఇటీవల హైదరాబాద్ ఎయిర్పోర్టులో సెల్ఫ్ బ్యాగ్ డ్రాప్ మెషీన్లను ఎయిరిండియా ఏర్పాటు చేసింది. దీనివల్ల బ్యాగేజీ అప్పగింత సమయం కూడా ఆదా అవుతుంది. ఈ కొత్త విధానం పట్ల ప్రయాణికులు హర్షం వ్యక్తం చేస్తున్నారు. తమ శ్రమ సమయం చాలా వరకు ఆదా అవుతుందని అంటున్నారు. దేశంలోనే అత్యంత రద్దీగా ఉండే ఎయిర్పోర్టుల్లో శంషాబాద్ రాజీవ్ గాంధీ ఇంటర్నేషనల్ విమానాశ్రయాల్లో కూడా ఒకటి. ప్రముఖ ఎయిర్వేస్ సంస్థలు ఇక్కడి నుంచి ఫ్లైట్లు అందుబాటులో ఉంచాయి. ఇక్కడి నుంచి నిత్యం వందలాది మంది ఇతర రాష్ట్రాలకు, విదేశాలకు తమ ప్రయాణాలు సాగిస్తుంటారు. ప్రయాణికులకు అత్యుత్తమ సౌకర్యాలు, సదుపాయాలు అందిస్తూ.. ఈ ఎయిర్ పోర్టు పలు అవార్డులను సొంతం చేసుకుంది. అంతర్జాతీయ స్థాయిలో వివిధ గుర్తింపులను కూడా శంషాబాద్ ఇంటర్నేషనల్ ఎయిర్ పోర్టు సాధించింది.
|
|