తెలంగాణకు తప్పిన గండం,,,తీరం దాటిన తీవ్ర వాయుగుండం

బంగాళాఖాతంలో కొనసాగుతున్న వాయుగుండం బలపడి తీవ్ర వాయుగుండంగా మారిందని హైదరాబాద్ వాతావరణ కేంద్రం అధికారులు తెలిపారు. అయితే ఈ తీవ్ర వాయుగుండం తీరం దాటడంతో తెలంగాణకు భారీ వర్షాల గండం తప్పిందని చెప్పారు. ఈ వాయుగుండం పూరీకి వాయవ్య దిశగా పయనిస్తోందని అన్నారు. ఛత్తీస్‌గఢ్‌ దిశగా పయనించి క్రమంగా బలహీనపడుతుందని అధికారులు అంచనా వేస్తున్నారు. అయితే రాష్ట్రంలో నేటి నుంచి రానున్న రెండ్రోజులు తేలికపాటి నుంచి ఓ మోస్తరు వర్షాలకు అవకాశం ఉందని అన్నారు.

నేడు రాష్ట్రవ్యాప్తంగా ఆకాశం మేఘావృతమై ఉంటుందని చెప్పారు. నిర్మల్, నిజామాబాద్, జగిత్యాల, రాజన్న సిరిసిల్ల, ఆదిలాబాద్, కొమరంభీం ఆసిఫాబాద్, మంచిర్యాల, కరీంనగర్, పెద్దపల్లి, జయశంకర్ భూపాలపల్లి, మహబూబాబాద్, వరంగల్, హన్మకొండ, ములుగు, భద్రాద్రి కొత్తగూడెం, ఖమ్మం, జనగాం, హైదరాబాద్, మేడ్చల్ మల్కాజిగిరి, మెదక్, వికారాబాద్, సంగారెడ్డి, కామారెడ్డి జిల్లాలలో నేడు ఓ మోస్తరు వర్షాలకు ఛాన్స్ ఉందని చెప్పారు. ఉరుములు, మెరుపులతో పాటు భారీగా ఈదురు గాలులు వీస్తాయన్నారు.గంటకు 30- 40 కి.మీ వేగంతో బలమైన ఈదురు గాలులు వీస్తాయని అన్నారు.

ఇక హైదరాబాద్ నగరంలో నేడు చిరు జల్లులు, తేలికపాటి వర్షం కురిసే ఛాన్స్ ఉందని వాతావరణ శాఖ అధికారులు తెలిపారు. భారీ వర్షాలకు ఛాన్స్ లేదని.. అయితే జల్లులు కురిసే అవకాశం మాత్రం ఉంటుందని అన్నారు. సోమవారం రాత్రి నగరంలోని పలు ప్రాంతాల్లో జలల్లు కురిశాయి. వర్షం కురిసే సమయంలో బయటకు వెళ్లొద్దని జీహెచ్‌ఎంసీ అధికారులు సూచించారు. కాగా, గత వారం రోజులకు పైగా రాష్ట్రంలో భారీగా వర్షాలు కురుస్తుండగా... వరదలకు పలువురు నిరాశ్రయులుగా మారారు. తెలంగాణలో మెుత్తం 33 మంది ప్రాణాలు కోల్పోయారు. ఇంతలోనే మరో తుపాను ముప్పు ప్రజలను కలవరపాటుకు గురి చేయగా.. అది తప్పటంతో అందరూ ఊపిరి పీల్చుకున్నారు.

ఏపీలో మాత్రం వర్షాలు కొనసాగుతున్నాయి. వాయుగుండం ప్రభావంతో వర్షాలు కురుస్తున్నాయి. ఉత్తరాంధ్రను వణిికస్తున్నాయి. నేడు కూడా పలు జిల్లాల్లో వర్షాలు కురుస్తాయని అమరావతి వాతావరణ కేంద్రం అధికారులు హెచ్చరించారు. ఈ మేరకు ప్రజలు జాగ్రత్తగా ఉండాలని సూచించారు.