ఫ్యూచర్ సిటీలో వరల్డ్‌ ట్రేడ్‌ సెంటర్‌,,,ఏర్పాటుకు సన్నహాలు

హైదరాబాద్ విశ్వ నగరంగా అభివృద్ధి చెందుతోంది. ఇప్పటికే అనేక జాతీయ, అంతర్జాతీయ సంస్థలు నగరంలో పెట్టుబడులు పెట్టాయి. మరికొన్ని సంస్థలు పెట్టుబడులు పెట్టేందుకు ముందుకొస్తున్నాయి. అందుకు తగ్గట్లుగా ప్రపంచ నగరాలకు ఏ మాత్రం తీసిపోకుండా ప్రభుత్వాలు కూడా నగరాన్ని అభివృద్ధి చేస్తున్నాయి. ఇప్పటికే హైదరాబాద్, సికింద్రాబాద్, సైబరాబాద్ ఉండగా.. కొత్తగా ఫ్యూచర్ సిటీ పేరుతో కాంగ్రెస్ ప్రభుత్వం ఫోర్త్ సిటీని నిర్మిస్తోంది.

స్కిల్ యూనివర్సిటీతో పాటు, టూరిజం, హెల్త్, స్పోర్ట్స్, వినోద కేంద్రాల సమాహారంగా ఫ్యూచర్‌ సిటీని నిర్మిస్తున్నారు. తాజాగా.. ఫ్యూచర్ సిటీలో మరో వరల్డ్ క్లాస్ సెంటర్ ఏర్పాటుకు ప్రభుత్వం సిద్ధమైంది. ఫ్యూచర్ సిటీలో వరల్డ్ ట్రేడ్ సెంటర్ ప్రారంభించేందుకు రంగారెడ్డి జిల్లా అధికారులు ప్రణాళికలు రచిస్తున్నారు. అమెరికాలోని వరల్డ్‌ ట్రేడ్‌ సెంటర్‌ తరహాలో హైదరాబాద్ నగరంలోనూ ట్రేడ్ సెంటర్ ఏర్పాటుకు వరల్డ్‌ ట్రేడ్‌ సెంటర్స్‌ అసోసియేషన్‌ ప్రతినిధులు తాజాగా ముందుకొచ్చారు. ఈ మేరకు తెలంగాణ ప్రభుత్వంతో ఇటీవలే ఒప్పందం కూడా కుదుర్చుకున్నారు.

అందులో భాగంగా భద్రత అంశాలను పరిగణలోకి తీసుకున్న పరిశ్రమల, రెవెన్యూశాఖల అధికారులు సెంటర్ ఏర్పాుటకు అనువైన స్థలాన్ని ఎంపిక చేసే పనిలో తలమునకలయ్యారు. ఆర్టిఫిషియల్ ఇంటెలిజెన్స్ (AI) సిటీకి సమీపంలో మూడు ప్రాంతాలను పరిశీలించారు. అక్కడ ట్రేడ్ సెంటర్ ఏర్పాటుకు కసరత్తు చేస్తున్నారు. వరల్డ్‌ ట్రేడ్‌ సెంటర్స్‌ అసోసియేషన్‌ ప్రతినిధులు వారి అవసరాలను ఇప్పటికే రాష్ట్ర ప్రభుత్వానికి నివేదించారు. ఎయిర్‌పోర్టు, మెట్రో ట్రైన్ స్టేషన్లకు వేగంగా చేరుకునేందుకు వీలుగా ప్రధాన, కనెక్ట్ రోడ్లు తమ కేంద్రానికి అదనంగా ఉండాలని అభ్యర్థించారు.

ఈ వరల్డ్ ట్రేడ్ సెంటర్ ఏర్పాటు కోసం 50 ఎకరాల స్థలం కేటాయించాలని ప్రభుత్వం భావించింది. అయితే భవిష్యత్‌ అవసరాలు, పార్కింగ్‌ కోసం అదనంగా మరో 20 ఎకరాలు కూడా ముందుగానే కేటాయించాలని అసోసియేషన్ ప్రతినిధులు కోరుతున్నారు. కమ్యూనికేషన్‌ వ్యవస్థ, సౌరశక్తి ప్లాంట్ల కోసం భారీ టవర్లు ఏర్పాటు చేయాలని ప్రభుత్వం దృష్టికి తీసుకెళ్లారు. వీటన్నింటినీ పరిగణలోకి తీసుకుని సెంటర్ ఏర్పాటుకు స్థలాలను ఎంపిక చేయాలని ప్రభుత్వాన్ని కోరుతున్నారు. స్థలంతో పాటు అవసరమైన మౌళిక ఏర్పాట్లు సమకూర్చిన తర్వాత.. సెంటర్ ఏర్పాటు చేయనున్నట్లు వెల్లడించారు.