వాహనదారులకు అలర్ట్.. 15 రోజుల పాటు ట్రాఫిక్ ఆంక్షలు
Telangana Telugu | Suryaa Desk | Published : Sat, Sep 14, 2024, 07:29 PM
హైదరాబాద్ నగరవాసులకు పోలీసులు ట్రాఫిక్ అలర్ట్ జారీ చేశారు. 15 రోజుల పాటు పలు ప్రాంతాల్లో ట్రాఫిక్ ఆంక్షలు అమల్లో ఉంటాయని చెప్పారు. నగరంలో పెరుగుతోన్న ట్రాఫిక్ను దృష్టిలో పెట్టుకుని రేవంత్ ప్రభుత్వం ఇటీవల కీలక నిర్ణయం తీసుకుంది. ఈ మేరకు ట్రాఫిక్ రద్దీని తగ్గించేందుకు జీహెచ్ఎంసీ నగరంలోని పలు ప్రాంతాల్లో సర్వీస్ రోడ్లను అభివృద్ధి చేసేందుకు రెడీ అయింది. అందులో భాగంగా సైబర్ టవర్స్ ఫ్లైఓవర్ ల్యాండింగ్ ఎండ్ నుంచి జేఎన్టీయూ రూట్లో యశోదా ఆసుపత్రి వరకు సర్వీస్ రోడ్డును నిర్మించనున్నారు. ఈ రహదారి నిర్మాణంలో భాగంగా ఉదయం, సాయంత్రం వేళల్లో అటుగా వెళ్లే రూట్లలో ట్రాఫిక్ ఆంక్షలు విధించనున్నట్లు పోలీసులు తెలిపారు.
నేటి నుంచి ఈనెల 30 వరకు ఈ ట్రాఫిక్ ఆంక్షలు అమల్లో ఉంటాయని సైబరాబాద్ ట్రాఫిక్ జాయింట్ సీపీ వెల్లడించారు. సైబర్ టవర్స్, 100 ఫీట్ రోడ్డు, కొత్తగూడ జంక్షన్వైపు నుంచి జేఎన్టీయూ, మూసాపేట వైపు వెళ్లే వాహనాలు మళ్లించనున్నట్లు చెప్పారు. ఆయా రూట్లలో వచ్చేవారు ప్రత్యామ్నాయ రూట్లలో వెళ్లాలని పోలీసులు సూచించారు. జేఎన్టీయూ, మూసాపేట వైపు వెళ్లే వాహనదారులు100 ఫీట్రోడ్డు మీదుగా పర్వత్ నగర్ జంక్షన్, కైత్లాపూర్ వంతెన మీదుగా తమ ప్రయాణాలు సాగించొచ్చు.
ఐకియా, సైబర్ గేట్వే, సీవోడీ జంక్షన్ నుంచి సైబర్ టవర్స్ ఫ్లై ఓవర్ మీదుగా జేఎన్టీయూ వైపు కూడా ప్రయాణాలు సాగించొచ్చు. సైబర్ టవర్స్ ఫ్లై ఓవర్ కింద నుంచి జేఎన్టీయూ వైపు వెళ్లే వెహికల్స్ ఎన్ గ్రాండ్ హోటల్, ఎన్ కన్వెన్షన్, జైన్ ఎంక్లేవ్, యశోదా ఆసుపత్రి వెనుక వైపు రోడ్డు, ఆర్వోబీ ఫ్లై ఓవర్ మీదుగా జేఎన్టీయూ వైపు వెళ్లాల్సి ఉంటుందని పోలీసులు తెలిపారు. ఈ విషయాలను దృష్టిలో ఉంచకొని ప్రత్యామ్నాయ మార్గాలు చూసుకోవాలని సూచించారు.
హైదరాబాద్ ట్రాఫిక్ నియంత్రణలో కొత్త ప్రయోగానికి సీఎం రేవంత్ రెడ్డి నిర్ణయం తీసుకున్నారు. సిటీ పరిధిలో ట్రాఫిక్ నియంత్రించేందుకు ట్రాన్స్ జెండర్లను వాలంటీర్లుగా నియమించుకోవాలని అధికారులకు సూచించారు. ట్రాఫిక్ పోలీస్ విభాగంతో పాటు హోంగార్డ్స్ ప్రస్తుతం సిటీలో ఈ విధులు నిర్వహిస్తున్నారు. హోంగార్డ్స్ తరహాలోనే ట్రాన్స్ జెండర్లకు ఈ విధులు అప్పగించాలని సీఎం సూచించారు. వారికి ప్రతినెలా కొంత స్టైఫండ్ ఇవ్వటం ద్వారా కొంతమేరకు ఉపాధి కల్పించినట్లవుతుందని అన్నారు. అందుకు ఆసక్తిగా ఉన్న ట్రాన్స్జెండర్ల వివరాలను సేకరించాలని సీఎం అధికారులకు ఆదేశించారు.
|
|