మాదాపూర్ మైహోమ్ భుజా గణేషుడి లడ్డూ ఎన్ని లక్షలో తెలుసా..?

హైదరాబాద్‌లో గణేషులు ఎంత ఫేమస్సో.. ఆయన లడ్డూలకు కూడా అంతే డిమాండ్ ఉంటుంది. నగరంలో ఖైరతాబాద్ మహాగణపతితో పాటు బడా బడా వినాయకులు చాలా ఉంటాయి. కానీ.. అందులో కొన్ని వినాయకుల లడ్డూలకే ఫుల్ క్రేజ్ ఉంటుంది. అందులో బాలాపూర్ లడ్డూ ఫస్ట్ ఉటుందనేది అందరికీ తెలిసిన విషయమే. నగరంలో ఇప్పటివరకు అన్ని రికార్డులు బాలాపూర్ గణేషుని లడ్డూవే. గతేడాది ఏకంగా రూ.27 లక్షలు పలికి.. తెలంగాణలోనే అత్యంత ఖరీదైన లడ్డూగా బాలాపూర్ గణేషుడు రికార్డు సృష్టించాడు. కాగా.. ఈసారి ఆ బాలాపూర్ గణేషుని రికార్డును కూడా బ్రేక్ చేశాడు మాదాపూర్ మైహోమ్ భుజా వినాయకుడు.

అత్యంత ఖరీదైన లడ్డూగా మాదాపూర్ మైహోమ్ భుజా గణేషుడు కొత్త రికార్డు సృష్టించాడు. ఎప్పటిలాగానే.. మైహోం భుజా అపార్ట్ మెంట్స్‌లో ప్రతిష్ఠించిన వినాయకుడి లడ్డూకు వేలం పాట నిర్వహించగా.. విశేష స్పందన లభించింది. వేలం పాట అంతే హోరా హోరీగా సాగింది. ఈ హోరా హోరి వేలం పాటలో.. గణేషుని లడ్డూ ఏకంగా 29 లక్షలు పలికింది. ఖమ్మంకు చెందిన కొండపల్లి గణేష్.. వినాయకుడి లడ్డూను రూ. 29 లక్షలకు సొంతం చేసుకున్నాడు. దీంతో.. హైదరాబాద్ మహానగరంలోని అత్యంత ఖరీదైన ధర పలికిన లడ్డూగా.. మైహోం భుజా గణనాథుని లడ్డూ నిలిచింది.

అయితే.. ప్రతిసారీ మైహోం భుజాలో నిర్వహించే లడ్డూ వేలానికి ఇదే స్థాయిలో పోటీ ఉంటుండటం గమనార్హం. అయితే.. బాలాపూర్ గణేషుని వేలం సెప్టెంబర్ 17న (మంగళవారం) జరగనుండగా.. మైహోం భుజా గణపతి లడ్డూ వేలం ముందుగానే నిర్వహించారు. దీంతో.. బాలాపూర్ గణేషుడు గతేడాది క్రియేట్ చేసిన బెంచ్ మార్కును.. మైహోం భుజా వినాయకుడు బ్రేక్ చేసి.. కొత్త బెంచ్ మార్క్ పెట్టాడు. దీంతో.. మంగళవారం జరగబోయే బాలాపూర్ లడ్డూ వేలంపై అందరి దృష్టి పడింది.

మైహోం భుజా గణేషుని లడ్డూనే ఇలా 29 లక్షలు పలికితే.. విపరీతమైన డిమాండ్ ఉన్న బాలాపూర్ లడ్డూ ఇంకెంత పలకనుందోనని ప్రజలు ఇప్పటి నుంచి అంచనాలు వేయటం మొదలుపెట్టేశారు. అయితే.. గతేడాది 27 లక్షలు పలకగా.. ఈసారి కనీసం 30 లక్షలు పలికే అవకాశం ఉందని ఇప్పటివరకు అందరూ భావించారు. కానీ.. మైహోం భుజా గణేషుడు ఇచ్చిన ఉత్సాహంతో.. ఆ సంఖ్య మరింతగా పెరిగే అవకాశం ఉంది.