ప్రపంచంతో పోటీ పడేలా ఇంటిగ్రేటెడ్ రెసిడెన్షియల్ స్కూల్స్: డిప్యూటీ సీఎం భట్టి

అంతర్జాతీయ ప్రమాణాలతో ప్రపంచంతో పోటీ పడే విధంగా యంగ్ ఇండియా ఇంటిగ్రేటెడ్ రెసిడెన్షియల్ స్కూల్స్ తయారు చేయనున్నట్లు డిప్యూటీ సీఎం భట్టి విక్రమార్క వెల్లడించారు. నేడు సెక్రటేరియట్‌లో యంగ్ ఇండియా ఇంటిగ్రేటెడ్ రెసిడెన్సియల్ స్కూల్స్, కాంప్లెక్స్‌ల నమూనాలు విడుదల చేశారు. అనంతరం మాట్లాడిన భట్టి విక్రమార్క.. 20 నుంచి 25 ఎకరాల్లో ఇంటర్నేషనల్ స్టాండర్ట్స్‌తో యంగ్ ఇండియా ఇంటిగ్రేటెడ్ రెసిడెన్షియల్ స్కూల్స్ నిర్మించనున్నట్లు చెప్పారు.

ఈ ప్రత్యేక పాఠశాలల్లో ఇంగ్లీష్ మీడియం విద్య 12వ తరగతి వరకు అందుబాటులో ఉంటుందని వివరించారు. తెలంగాణలో చాలా రెసిడెన్షియల్ స్కూళ్లకు నేటికీ సొంత భవనాలు లేవన్నారు. ఆయా స్కూల్స్ ప్రస్తుతం అద్దె భవనాల్లో కొనసాగుతున్నాయి.. ఇటువంటి ఇబ్బంది కరమైన వాతావరణంలో పిల్లలు విద్య నేర్చుకునే పరిస్థితి ఉండదని అభిప్రాయపడ్డారు.

ఎన్నికల్లో ఇచ్చిన హామీ మేరకు.. పేద బడుగు బలహీన కుటుంబాలకు ఉచితంగా నాణ్యమైన విద్యను అందిస్తామన్నారు. ప్రాథమిక స్థాయి నుంచి అటువంటి విద్యను అందించాలనే లక్ష్యంతో ఇంటిగ్రేటెడ్ రెసిడెన్షియల్ స్కూల్స్ ఏర్పాటు చేయనున్నట్లు చెప్పారు. అసలు రెసిడెన్షియల్ స్కూల్స్ అంటే ఈ విధంగా ఉండాలనే విధంగా వాటిని నిర్మించి సౌకర్యాలు కల్పించనున్నట్లు తెలిపారు. ప్రతి నియోజకవర్గానికి ఒక ఇంటిగ్రేటెడ్ స్కూల్ నిర్మించనున్నట్లు వెల్లడించారు. ఆ సంఖ్య ఇంకా పెంచాలని ఆలోచన ప్రభుత్వానికి ఉందని డిప్యూటీ సీఎం భట్టి వెల్లడించారు.

ప్రస్తుతం 20 నుంచి 22 నియోజకవర్గాల్లో స్థలాలను గుర్తించి పైలట్ ప్రాజెక్టు కింద స్కూల్స్ నిర్మించనున్నట్లు చెప్పారు. దసరా పండుగ కంటే ముందే ఈ స్కూళ్లకు భూమి పూజ చేసి నిర్మాణాలు ప్రారంభించనున్నట్లు వెల్లడించారు. రాష్ట్రంలో 1023 రెసిడెన్షియల్ స్కూల్స్ ఉన్నాయని వాటిల్లో 663 స్కూళ్లకు సొంత భవనాలు లేవని చెప్పారు. బీసీలకు రాష్ట్రవ్యాప్తంగా 367 రెసిడెన్షియల్ స్కూల్స్ ఉంటే వాటిల్లో 306 అద్దె భవనాల్లోనే ఉన్నాయన్నారు.

ఈ నేపథ్యంలో గురుకులాలు, రెసిడెన్షియల్ స్కూళ్ల సొంత బిల్డింగ్‌ల కోసం భారీగా నిధులు కేటాయిస్తున్నామని భట్టి చెప్పారు. ఇంటిగ్రేటెడ్ స్కూల్ నిర్మాణానికి ఈ ఏడాది రూ.5 వేల కోట్లు నిధులు ఖర్చు చేయనున్నట్లు వెల్లడించారు. విజయదశమి ముందు రోజు అంటే ఈనెల 11న ఆ స్కూళ్లకు ఫౌండేషన్ వేయనున్నట్లు డిప్యూటీ సీఎం భట్టి స్పష్టం చేశారు.