తెలంగాణ బియ్యం కావాలన్న ఫిలిప్పీన్స్‌.. ఎందుకంత డిమాండ్

మన దేశానికే కాదు.. ఇతర దేశాలకు అన్నం పెట్టే స్థాయికి తెలంగాణ రైతులు చేరుకున్నారు. తాజాగా.. తెలంగాణ బియ్యం కావాలని ఫిలిప్పీన్స్‌ కోరింది. ఈ మేరకు ఆ దేశ ఆహార, వ్యవసాయశాఖ మంత్రి రోజేర్స్‌ తెలంగాణ పౌరసరఫరాల శాఖ మంత్రి ఉత్తమ్‌ కుమార్‌రెడ్డితో బియ్యం ఎగుమతులపై చర్చించారు. వీడియో కాన్ఫరెన్స్‌ ద్వారా మాట్లాడిన ఫిలిప్పీన్స్‌ మంత్రి బియ్యం ఎగుమతి చేయాలని కోరారు. రాష్ట్రం నుంచి 3 లక్షల టన్నుల బియ్యం ఎగుమతుల ప్రతిపాదనపై ప్రాథమికంగా ఈ సమావేశంలో చర్చించారు. తెలంగాణ బియ్యం నాణ్యత గణనీయంగా మెరుగుపడిందని ఈ మేరకు మంత్రి ఉత్తమ్ రోజేర్స్‌కు వివరించారు. తెలంగాణలో ధాన్యం రకాలు, బియ్యం నాణ్యతపై తెలియజేశారు.

అయితే ప్రస్తుతం విదేశాలకు బియ్యం ఎగుమతులపై 10 శాతం ట్యాక్స్ విధిస్తున్నారు. సివిల్‌ సప్లైస్‌ కార్పొరేషన్‌ ప్రభుత్వ రంగ సంస్థగా ఉంది. ఈ నేపథ్యంలో ఫిలిప్పీన్స్‌కు బియ్యం ఎగుమతులపై సుంకం మినహాయింపుపై తెలంగాణ ప్రభుత్వం దృష్టి పెట్టింది. ఈ మేరకు కేంద్ర ప్రభుత్వాన్ని సుంకం మినహాయించాలని కోరేందుకు సిద్ధమయ్యారు. త్వరలో ఫిలిప్పీన్స్‌కు వెళ్లి బియ్యం ఎగుమతులపై మరో దఫా చర్చలు జరపనున్నారు. ఈ చర్చల అనంతరం బియ్యం ధరపై నిర్ణయం ఉంటుందని పౌరసరఫరాలశాఖ అధికారులు తెలిపారు.

ఎందుకంత డిమాండ్..?

తాజా గణంకాల ప్రకారం.. వరి సాగులో దేశంలోనే తెలంగాణ అగ్రగామిగా ఉంది. వరి విస్తీర్ణం కొంతకాలంగా గణనీయంగా పెరుగుతోంది. గతేడాది 12 మిలియన్‌ ఎకరాల్లో రైతులు వరి సాగుచేయగా.. ప్రస్తుతం 26 మిలియన్‌ టన్నుల ధాన్యం ఉత్పత్తి అయింది. దాదాపు 220 రకాల విత్తనాలు రాష్ట్రంలో సాగులో ఇన్నాయి. ఇందులోనూ 60 శాతం ముతక రకాలు, 40 శాతం ఫైన్‌, సూపర్‌ ఫైన్‌ వెరైటీలు ఉన్నాయి.

సోనామసూరి, హెచ్‌ఎంటీ, సాంబమసూరి, ఎంటీయూ- 1010, ఐఆర్‌- 64, జేజీఎల్‌ వెరైటీలు పండిస్తున్నారు. ఈ బియ్యానికి ఇతర దేశాల్లో మంచి డిమాండ్‌ ఉంది ఫిలిప్పైన్స్‌ కాకుండా అమెరికా, బంగ్లాదేశ్‌, యూఏఈ, ఉత్తర కొరియా దేశాలకు సైతం తెలంగాణ బియ్యానికి మంచి డిమాండ్ ఉంది. తక్కువ గ్లైసెమిక్‌ ఇండెక్స్‌ ఉండే సూపర్‌ ఫైన్‌ రకమైన తెలంగాణ సోనా (RNR- 15048) దేశావ్యాప్తంగా ఆదరణ పొందింది. రాష్ట్ర ప్రభుత్వం సన్నరకాల వరిసాగును ప్రోత్సహించేందుకు ఈ సీజన్‌ నుంచి క్వింటాకు రూ. 500 బోనస్‌ ప్రకటించిన విషయం తెలిసిందే.