హైదరాబాద్‌లో ఇండ్లు కొంటలేరు.. భారీ తగ్గిన అమ్మకాలు.. కొత్త ప్రాజెక్టులూ ఢమాల్!

 హైదరాబాద్ మహానగరం నలు దిక్కుల విస్తరిస్తోంది. ఇక్కడ స్థిర నివాసం ఏర్పాటు చేసుకోవాలని భావిస్తున్న వారు తమకు నచ్చిన, అందుబాటు ధరలో ఉండే ప్రాంతాల్లో ఇళ్లు కొనుగోలు చేస్తున్నారు. రెసిడెన్షియల్ మార్కెట్‌లో దేశంలోని ప్రధాన నగరాలతో హైదరాబాద్  పోటీ పడుతోంది. కొన్నేళ్లుగా ఇళ్లు, అపార్ట్‌మెంట్ల విక్రయాల్లో భారీ వృద్ధి కనబరిడిన భాగ్యనగరం ఇప్పుడు ఒక్కసారిగా వెనకడుగు వేసింది. దేశంలోని 8 రెసిడెన్షియల్ మార్కెట్లలో 2024 జులై- సెప్టెంబర్ త్రైమాసికంలో గృహాల విక్రయాలు, కొత్త ప్రాజెక్టుల లాంచ్‌లు రెండింటిలోనూ క్షీణత నమోదైంది. ఈ మేరకు రియల్ ఇన్‌సైట్ రెసిడెన్షియల్ రిపోర్ట్ పేరుతో ప్రాప్‌టైగర్.కామ్ ఓ నివేదిక విడుదల చేసింది. ఇతర నగరాలతో పోలిస్తే హైదరాబాద్‌లో ఇళ్ల విక్రయాల్లో గణనీయమైన క్షీణత నమోదైనట్లు తెలిపింది.

 ఇళ్ల ధరలు ఎనిమిది నగరాల్లో సగటున దాదాపు 20 శాతం పెరిగాయి. దీంతో సగటున 5 శాతం మేర అమ్మకాల్లో తగ్గుదల నమోదైనట్లు నివేదిక తెలిపింది. 2023లో ఇదే త్రైమాసికంతో పోలిస్తే కొత్త ప్రాజెక్టులు సైతం 25 శాతం మేర పడిపోయాయి. మొత్తం 8 నగరాల్లో 2024 జులై- సెప్టెంబర్ త్రైమాసికంలో 96,544 ఇళ్ల విక్రయాలు జరగగా.. అది 2023లో 1,01,221 యూనిట్లుగా ఉంది. 5 శాతం వార్షిక క్షీణత నమోదైంది. ఇక కొత్త ప్రాజెక్టుల లాంచ్ చూస్తే 8 మార్కెట్లో కొత్త రెసిడెన్షియల్ యూనిట్ల సంఖ్య 2023లో 1,23,080గా ఉండగా.. ఈ ఏడాది 2024లో 91,863కు పరిమితమైంది. అంటే 25 శాతం మేర పడిపోయాయి.

హైదరాబాద్‌లో 19 శాతం డౌన్..

2024, జులై- సెప్టెంబర్ త్రైమాసికంలో హైదరాబాద్‌లో ఇళ్ల అమ్మకాలు ఏకంగా 19 శాతం మేర పడిపోయాయి. గత సంవత్సరం 2023లో ఇదే త్రైమాసికంలో 14,191 యూనిట్ల అమ్ముడుపోగా.. ఈ ఏడాది అదే 11,564 యూనిట్లగా నమోదైంది. ఆ తర్వాత బెంగళూరు నగరంలో 11 శాతం ఇళ్ల విక్రయాలు పడిపోయాయి. ఈ ఏడాది 11,160 యూనిట్లు అమ్ముడవగా.. గతేడాది 12,588 ఇళ్లు అమ్ముడయ్యాయి. అహ్మాదాబాద్‌లో వార్షిక ప్రాతిపదికన 9 శాతం ఇండ్ల విక్రయాలు తగ్గాయి. చెన్నైలో 8 శాతం, కోల్‌కతాలో 22 శాతం, ముంబైలో 1 శాతం, పుణెలో 3 శాతం మేర ఇళ్ల అమ్మకాల్లో క్షీణత నమోదైంది.

కొత్త ప్రాజెక్టుల్లో ఏకంగా 58 శాతం డౌన్..

హైదరాబాద్ రియల్ ఎస్టేట్ చరిత్రలో భారీ స్థాయిలో కొత్త ప్రాజెక్టుల లాంచ్ గణాంకాలు పడిపోవడం గమనార్హం. హైదరాబాద్‌లో ఈ ఏడాది కొత్త ప్రాజెక్టుల లాంచింగ్ 58 శాతం మేర క్షీణత నమోదు చేసింది. గత ఏడాదిలో హైదరాబాద్‌లో 20,481 యూనిట్లు కొత్తగా లాంచ్ కాగా.. ఈ ఏడాది అది 8,546 యూనిట్లకు పరిమితం కావడం గమనార్హం. ఇక ఇతర మార్కెట్లలోనూ భారీ క్షీణత నమోదైంది. అహ్మదాబాద్‌లో 61 శాతం మేర కొత్త ప్రాజెక్టులు తగ్గిపోయాయి. బెంగళూరులో 3 శాతం, కోల్‌కతాలో 61 శాతం, ముంబైలో 13 శాతం, పుణెలో 36 శాతం కొత్త ప్రాజెక్టుల లాంచ్‌లో క్షీణత నమోదైంది.