హైదరాబాద్‌లో భారీవర్షం.. లోతట్టు ప్రాంతాల ప్రజలకు ఐఎండీ హెచ్చరికలు

బతుకమ్మ వేడుకలు అంబరాన్నంటుతుండగా.. వేడితో అల్లాడుతున్న ఉక్కిరిబిక్కిరి అవుతోన్న హైదరాబాద్‌వాసులను వరుణుడు కరుణించాడు.మధ్యాహ్నం వరకు భానుడి భగభగలతో అల్లాడిన నగర వాసులను వాన జల్లలు పలకరించాయి. దీంతో వాతవరణం చల్లబడి ఉపశమనాన్నిచ్చింది. నగరంలోని చాలా ప్రాంతాల్లో గురువారం సాయంత్రం నుంచి భారీ వర్షం కురిసింది. నారాయణగూడ, హిమాయత్ నగర్, బషీర్‌బాగ్, అబిడ్స్, కోఠి, సరూర్ నగర్, కొత్తపేట, మలక్‌పేట పరిసర ప్రాంతాల్లో ఉరుములు మెరుపులతో కూడిన భారీ వర్షం పడింది.

అలాగే, జూబ్లీహిల్స్, మాదాపూర్, యూసఫ్ గూడ, కీసర, ఘట్‌కేసర్, అబ్దుల్లాపూర్ మెట్, నాంపల్లి, ఖైరతాబాద్, మెహదీపట్నం, దిల్‌సుఖ్ నగర్, ఫిల్మ్ నగర్, బంజారాహిల్స్, షేక్‌పేట తదితర ప్రాంతాల్లో జోరు వాన కురిసింది. ఓవైపు, సద్దుల బతుకమ్మ వేడుకలు.. మరోవైపు, వర్షం కూడా కురుస్తుండటంతో పలు ప్రాంతాల్లో భారీగా ట్రాఫిక్ స్తంభించింది. ఐటీ కారిడార్‌లో కిలోమీటర్ల మేర వాహనాలు బారులుతీరాయి. వాహనాల రాకపోకలను సజావుగా సాగేందుకు పోలీసులు శ్రమిస్తున్నారు. ఇక, గురువారం రాత్రి కూడా భారీ వర్షాలు కురుస్తాయన్న హెచ్చరికల నేపథ్యంలో లోతట్టు ప్రాంతాల ప్రజలు అప్రమత్తంగా ఉండాలని భారత వాతావరణ శాఖ అధికారులు అప్రమత్తం చేశారు.

నగరంతో పాటు రాష్ట్రంలోని పలు ప్రాంతాల్లో సాయంత్రం వర్షం కురిసింది. భారీ వర్షాలతో పాటుగా ఉరుములు, మెరుపులు.. అక్కడక్కడ పిడుగులు కూడా పడ్దాయి. ఉదయం కాస్త ఎండ కాసినా.. సాయంత్రానికి మేఘాలు ఏర్పడి పలు ప్రాంతాల్లో వర్షాలు కురిసే అవకాశం ఉందని ఐఎండీ వెల్లడించింది. ఐఎండీ అంచనా వేసినట్టు నగరంలో వర్షం పడింది.

ఇక, బంగాళాఖాతంలో ఏర్పడిన ఉపరితల ఆవర్తన ద్రోణి క్రమంగా బలపడుతోందని, దీని ప్రభావంతో రెండు తెలుగు రాష్ట్రాల్లోనూ మరో రెండు రోజులు పాటు వర్షాలు కురుస్తాయని ఐఎండీ ఇప్పటికే హెచ్చరించింది. తెలంగాణలోని పలు జిల్లాల్లో ఓ మోస్తరు వర్షాలకు అవకాశం ఉన్నట్లు పేర్కొంది. ఇక, అంతటి వర్షంలోనే ఆడపడుచులు సద్దుల బతుకమ్మ ఆడుతూ.. సంతోషంగా ఉన్నారు. తెలంగాణ వ్యాప్తంగా సద్దుల బతుకమ్మ ఉత్సవాలు అత్యంత ఘనంగా జరుగుతున్నాయి.