టీచర్ ఉద్యోగాల ఎంపికలో గందరగోళం.. విధుల నుంచి యువతి తొలగింపు, ఆశలు ఆవిరి

తెలంగాణలో ఇటీవల టీచర్ పోస్టులు భర్తీ చేసిన సంగతి తెలిసిందే. 2024 డీఎస్సీ ద్వారా ఎంపికైన 10,006 మందికి ఉపాధ్యాయ నియామక పత్రాలు అందించారు. విద్యాశాఖ అధికారులు వారికి పోస్టింగులు కూడా ఇచ్చారు. అయితే ఉత్తీర్ణత సాధించిన అభ్యర్థుల్లో మెరిట్‌ ఆధారంగా జరిపిన ఎంపికల్లో గందరగోళం కొనసాగుతోంది. ఇటీవల ఖమ్మం జిల్లాలో అర్హత లేని ఏడుగురిని టీచర్ ఉద్యోగాలకు ఎంపిక చేసినట్లు విద్యాశాఖ అధికారులు గుర్తించారు. ఈ వ్యవహారంలో ఇద్దరు ప్రధానోపాధ్యాయులపై విద్యాశాఖ సస్పెన్షన్‌ వేటు వేసింది.

తాజాగా నిజామాబాద్‌ జిల్లాలోనూ ఓ ఉపాధ్యాయురాలిని అనర్హురాలిగా పేర్కొంటూ అధికారులు ఉద్యోగం నుంచి తీసేశారు. ఎస్జీటీ తెలుగు మాధ్యమంలో 257వ ర్యాంకు అభ్యర్థి ఉట్నూర్‌ లావణ్య అనే యువతికి నిజామాబాద్‌ జిల్లా ధర్పల్లి మండలం దుబ్బాక వడ్డెర కాలనీ ప్రాథమిక పాఠశాలలో ఇటీవల పోస్టింగ్‌ ఇచ్చారు. గత నెల 16న లావణ్య బాధ్యతలు సైతం చేపట్టింది. ఆమె శనివారం వరకు 23 రోజులు ఉద్యోగానికి హాజరైంది. అయితే టెక్నికల్ సమస్యలతో పొరపాటున లావణ్య ఉద్యోగానికి ఎంపిక అయ్యారని విద్యాశాఖ అధికారులు గుర్తించారు.

సర్టిఫికెట్ల వెరిఫికేషన్‌కు హాజరైన 125వ ర్యాంకు అభ్యర్థి భార్గవి గైర్హాజరైనట్లు చూపడంతో లావణ్య ఉద్యోగానికి ఎంపికైనట్లు గుర్తించారు. దీనిని సరిచేసి లావణ్య అనే యువతిని విధుల్లో నుంచి తొలగిస్తూ విద్యాశాఖ అధికారులు ఉత్తర్వులు జారీ చేశారు. దీంతో బాధితురాలు లావణ్య కన్నీటి పర్యంతమయ్యారు. తనకు ఉద్యోగం వచ్చిందన్న ఆనందం అంతలోనే ఆవిరైందని కన్నీరు పెట్టుకున్నారు. తనకు న్యాయం చేయాలంటూ రోదిస్తూ ఓ ఆడియోను సోషల్ మీడియాలో పోస్టు చేశారు. తనకు జరిగిన అన్యాయంపై విద్యాశాఖ ఉన్నతాధికారులను కలిసి విన్నవిస్తానన్నారు. ఈ విషయంపై జిల్లా కలెక్టర్‌ రాజీవ్‌గాంధీ హన్మంతు స్పందించారు. జరిగిన ఘటనపై విచారణ చేయిస్తానని చెప్పారు.

కాగా, కొందరు ఉద్యోగాలకు ఎంపికైనా.. అధికారుల నిర్లక్ష్యంతో పోస్టింగ్ మిస్ అయ్యారు. టీచర్ జాబ్స్ సాధించినప్పటికీ.. అధికారుల తప్పిదం కారణంగా పోస్టింగ్‌కు నోచుకోలేదు. ఇటువంటి ఘటనపై అభ్యర్థులు మండిపడుతున్నారు. పారదర్శకంగా పోస్టింగులు ఇవ్వాలని కోరుతున్నారు.