అందుకే కులగణన చేపట్టాం.. ఒక మైలురాయిగా మిగులుతుంది: సీఎం రేవంత్

అభివృద్ధి – సంక్షేమం రెండింటినీ సమతుల్యం చేసుకుంటూ తెలంగాణలో సుపరిపాలన అందిస్తున్నామని సీఎం రేవంత్ రెడ్డి అన్నారు. తెలంగాణ అభివృద్ధిపై తమకు స్పష్టమైన విజన్ ఉందన్నారు. మంగళవారం ఢిల్లీలో ఓ మీడియా ఛానెల్ నిర్వహించిన ప్రత్యేక చర్చా వేదికలో పాల్గొన్న ఆయన.. ఫ్యూచర్ సిటీ, రీజినల్ రింగ్ రోడ్డు, మూసీ పునరుజ్జీవం, రేడియల్ రోడ్స్ వంటి లక్ష్యాలను నిర్ధేశించుకున్నట్లు చెప్పారు. ఇప్పుడు తమ నినాదం రైజింగ్ తెలంగాణ అని.. చైనా ప్లస్ వన్ కంట్రీకి సరైన మార్గంగా చైనా ప్లస్ తెలంగాణ చూపిస్తున్నామన్నారు.

తెలంగాణలో ప్రతి ఒక్కరికీ సమాన అవకాశాలు కల్పించడం. సుపరిపాలన అందించడం తమ విధానం అని చెప్పుకొచ్చారు. రాష్ట్రంలో చేపట్టిన కులగణన గేమ్ ఛేంజర్ కాబోతోందన్నారు. సంక్షేమ ఫలాలు అసలైన అర్హులైన పేదలకు చేరాలంటే ప్రభుత్వం వద్ద సరైన గణాంకాలు ఉండాలని.. అసలు గణాంకాలు లేకుంటే అసలైన అర్హులకు న్యాయం చేయలేమన్నారు. అందుకే రాష్ట్ర వ్యాప్తంగా కులగణన సర్వే చేపట్టామని.. అది ఒక మైలురాయిగా మిగులుతుందన్నారు.

దేశవ్యాప్తంగా కూడా ఓబీసీ గణాంకాలు తేలాల్సిన అవసరం ఉందని సీఎం రేవంత్ రెడ్డి అభిప్రాయపడ్డారు. ఆ ప్రాతిపదికగా రిజర్వేషన్లు అమలు జరగాలన్నారు. జనాభా లెక్కల సందర్భంగానే కేంద్రమే ముందుకొచ్చి ఓబీసీ గణాంకాలను కూడా సేకరించాలని సూచించారు. ఓబీసీ గణాంకాలు సేకరించడంలో కేంద్ర ప్రభుత్వానికి ఉన్న అభ్యంతరమేంటని ప్రశ్నించారు. నియోజకవర్గాల పునర్విభజన చేపట్టాలంటే ఆ ప్రక్రియకు ప్రాతిపదిక ఏంటన్నది ముందు నిర్ధేశించాలన్నారు. దానిపై కూడా చర్చ జరగాలన్నారు. ప్రాతిపదిక నిర్ణయించిన తర్వాత ప్రక్రియ చేపట్టాలన్నారు. లేదంటే దక్షిణాది రాష్ట్రాలు నష్టపోవడమే కాకుండా ఉత్తరాది, దక్షిణాది అన్న వాదన తెరమీదకు వచ్చే ప్రమాదం ఉంటుందని హెచ్చరించారు.

ప్రతిపక్ష పాలిత రాష్ట్రాలను విస్మరిస్తున్నారని కేంద్రంపై రేవంత్ మండిపడ్డారు. తెలంగాణలో పెట్టుబడులు పెట్టడానికి వచ్చేవారిని గుజరాత్‌కు మళ్లిస్తున్నారని ఆరోపించారు. సెమీకండక్టర్ పరిశ్రమ అందుకు ఉదాహరణ అని చెప్పుకొచ్చారు. గుజరాత్‌కు ఇవ్వడానికి తమకు అభ్యంతరం లేదని చెప్పారు. కానీ ప్రధానమంత్రి గుజరాత్‌కు మాత్రమే కాదని.. దేశ ప్రధానమంత్రి ఒక జడ్జిలా ఉండాలని ఎద్దేవా చేశారు. ఆటలో రిఫరీ ఒక జట్టు తరఫున ఆడకూడదని.. ఒకరి తరఫున వకాల్తా పుచ్చుకోవద్దని చెప్పారు.ఇలాంటి పరిణామాలు దేశానికి మంచిది కాదని సీఎం రేవంత్ హితవు పలికారు.