హైదరాబాద్ ఫ్యూచర్ సిటీ.. రేవంత్ సర్కార్ కీలక నిర్ణయం

హైదరాబాద్ నగరం విశ్వనగరంగా వేగంగా అభివృద్ది చెందుతోంది. ఇప్పటికే పలు జాతీయ, అంతర్జాతీయ సంస్థలు నగరంలో పెట్టుబడులు పెట్టి తమ కార్యకలాపాలు సాగిస్తున్నాయి. దీంతో నగర అభివృద్ధిపై మరింత ఫోకస్ పెట్టిన రేవంత్ రెడ్డి ప్రభుత్వం ఫ్యూచర్ సిటీ ఏర్పాటుకు నిర్ణయం తీసుకున్న సంగతి తెలిసిందే. ఇప్పటికే హైదరాబాద్, సికింద్రాబాద్, సైబరాబాద్ వంటి మూడు సిటీలు ఉండగా.. ఫోర్త్ సిటీగా ఫ్యూచర్ సిటీని నిర్మించతలపెట్టారు. రంగారెడ్డి జిల్లా ముచ్చింతల్ ప్రాంతాల్లో ఈ ఫోర్త్‌సిటీ ఏర్పాటుకు గతంలో రేవంత్ సర్కార్ గ్రీన్ సిగ్నల్ ఇచ్చింది.

కాగా, ఈ సిటీ నిర్మాణంపై ప్రభుత్వం కీలక నిర్ణయం తీసుకుంది. ఇప్పటికే ప్రభుత్వం వద్ద 14 వేల ఎకరాల భూమి ఉండగా.. మరో 16 వేల సేకరించాలని నిర్ణయం తీసకుుంది. హైదరాబాద్ నగర శివార్లలో నిర్మించాలని తలపెట్టిన ఫ్యూచర్ సిటీ కోసం అదనంగా 16 వేల ఎకరాలను సేకరించాలని రాష్ట్ర ప్రభుత్వం తాజాగా నిర్ణయించింది. ఇప్పటికే ప్రభుత్వం దాదాపు 13,973 ఎకరాల భూమిని సిద్ధం చేసింది. దీనికి అదనంగా మరో 16 వేల ఎకరాలకు పైగా భూమిని ల్యాండ్ పూలింగ్ ద్వారా సేకరించాలని సర్కారు నిర్ణయించింది.. అంటే మొత్తం 30 వేల ఎకరాల్లో ఫ్యూచర్ సిటీని ఏర్పాటు చేయనుంది.

ఇక ఫ్యూచర్ సిటిని కనెక్ట్ చేసేలా మెట్రోను కూడా విస్తరిస్తున్నారు. శంషాబాద్ ఎయిర్‌పోర్టు నుంచి ఫ్యూచర్ సిటీకి మెట్రోను విస్తరిస్తామని రేవంత్ రెడ్డి ప్రకటించారు. ఈ మేరకు ఎలైన్‌మైంట్ ఖరారు చేసే పనిలో సర్కార్ నిమగ్నమైంది. ఇక ఈ ఫ్యూచర్‌ సిటీ అభివృద్ధి, భవిష్యత్‌ అవసరాలకు అనుగుణంగా అక్కడ గ్రీన్‌ ఫీల్డ్‌ రహదారిని నిర్మించాలని సర్కార్ డిసైడ్ అయింది. ఫ్యూచర్‌ సిటీలో స్కిల్‌ యూనివర్సిటీతో పాటుగా స్పోర్ట్స్ కాంప్లెక్స్, అంతర్జాతీయ ప్రఖ్యాత సంస్థలు, పరిశ్రమలు పెట్టుబడులు పెట్టనున్నాయి. ఈ నేపథ్యంలో అక్కడ గ్రీన్ ఫీల్డ్ రోడ్డు ఏర్పాటుకు ప్రభుత్వం నిర్ణయం తీసుకుంది.

భవిష్యత్ ప్రణాళికలు, ట్రాఫిక్‌ అవసరాలను అనుసరించి కొత్తగా రోడ్ల కనెక్టివిటీకి ప్రభుత్వం ఈ కీలక నిర్ణయం తీసకుంది. ప్రస్తుతం ఉన్న ఔటర్ రింగ్ రోడ్డు  నుంచి శ్రీశైలం నేషనల్ హైవే వరకు 40 కి.మీ పొడవునా గ్రీన్‌ఫీల్డ్‌ రోడ్డును నిర్మించనున్నారు. రీజినల్ రింగు రోడ్డును కనెక్ట్ చేసేలా ఈ రహదారి నిర్మించనుండగా.. రోడ్డు పూర్తయితే ఆ ప్రాంతాల్లోని గణనీయమైన అభివృద్ధి జరగనుంది.