తెలంగాణ మహిళలకు గుడ్‌న్యూస్.. బ్యాంకు లోన్‌తో సోలార్ పవర్ ప్లాంట్లు.. ఏడాదికి రూ.30 లక్షల ఆదాయం

తెలంగాణలోని మహిళలకు రేవంత్ సర్కార్ తీపి కబురు చెప్పింది. ఇందిరా మహిళా శక్తి పథకం ద్వారా గ్రామీణ ప్రాంతాల్లోని స్వయం సహాయక సంఘాల సభ్యులను పారిశ్రామికవేత్తలుగా తీర్చిదిద్దాలని ప్రభుత్వం నిర్ణయం తీసుకుంది. గ్రామీణ మహిళలు ఆర్థికంగా, సామాజికంగా బలోపేతం అయ్యేందుకు ప్రత్యేక చర్యలు తీసుకుంటుంది. అందులో భాగంగా.. తెలంగాణలో మహిళా స్వయం సహాయక సంఘాలు ఆర్థిక స్వావలంబన సాధించేందుకు వారికి సౌర విద్యుదుత్పత్తి ప్లాంట్లను కేటాయించాలని ప్రభుత్వం డిసైడ్ అయింది. ఒక్కో స్వయం సహాయక సంఘానికి ఒక మెగావాట్‌ చొప్పున మొత్తం 4,000 ప్లాంట్లను కేటాయించనున్నారు. ఈ ప్లాంట్ల ఏర్పాటుకు రాష్ట్ర ప్రభుత్వమే భూమిని సమకూర్చి, లోన్ సదుపాయం కల్పించనుంది. ఈ పథకం అమలుపై డిప్యూటీ సీఎం భట్టి విక్రమార్క శుక్రవారం ప్రజాభవన్‌లో ఉన్నతాధికారులతో సమీక్ష నిర్వహించారు.

పంచాయతీ అధికారులు వెల్లడించిన వివరాల ప్రకారం.. ఒక మెగావాట్‌ సౌర విద్యుత్తును ఉత్పత్తి చేస్తే ఏడాదికి రూ.30 లక్షల ఆదాయం వస్తుంది. ఇటువంటి ఒక ప్లాంట్‌ ఏర్పాటుకు దాదాపుగా రూ.3 కోట్ల వ్యయం అవుతుంది. ఇందులో 10 శాతం మహిళా సంఘాలు చెల్లిస్తే.. మిగిలిన 90 శాతం బ్యాంకుల నుంచి లోన్లు మంజూరు చేయనున్నారు. ఒక్కో ప్లాంటుకు నాలుగు ఎకరాల భూమి కావాల్సి ఉంటుంది. అర్హత సాధించిన మహిళా సంఘాలకు, సమాఖ్యలకు అనువైన భూములను గుర్తించి, లీజుపై వీటిని అందించనున్నారు. ఇంధన శాఖ అనుమతులు లభించిన వారం రోజుల్లోనే ప్లాంట్ల ఏర్పాటును పూర్తి చేయనున్నట్లు అధికారులు తెలిపారు.

సోలార్ పవర్ ప్లాంట్ల కేటాయింపుతో మహిళా సంఘాలకు ఆర్థిక చేయూత అందిస్తామని డిప్యూటీ సీఎం భట్టి అన్నారు. ఈ పథకం ద్వారా గ్రామీణ మహిళలను పారిశ్రామికవేత్తలుగా తీర్చిదిద్దుతామని చెప్పారు. ఈ పథకాన్ని ప్రతిష్ఠాత్మకంగా తీసుకొని పంచాయతీరాజ్‌, విద్యుత్ శాఖల అధికారులు సమన్వయంతో పనిచేసి అవసరమైన భూమిని సేకరించాలన్నారు. బ్యాంకర్లతో సమావేశం నిర్వహించి మహిళా సంఘాలకు రుణాలు ఇప్పించాలన్నారు. పథకం వివరాలను ఇటీవల బ్యాంకర్ల సమావేశంలో ప్రస్తావించినట్లు భట్టి వెల్లడించారు. రుణాల రీపేమెంట్‌లో స్వయం సహాయక సంఘాల సభ్యులు 99 శాతం ప్రగతిని కనబరుస్తున్నాయని చెప్పారు. అందుకే వారికి రుణాలిచ్చేందుకు బ్యాంకర్లు ఆసక్తిగా ఉన్నట్లు డిప్యూటీ సీఎం భట్టి వెల్లడించారు.