వృద్ధురాలి ప్రాణం తీసిన బీడీ ముక్క.. పడుకున్న చోటే సజీవ దహనం

ధూమపానం ఆరోగ్యానికి హానికరం.. పొగతాగటం ప్రాణాంతకం.. ఇలాంటి హెచ్చరికలు మనం తరచూ చూస్తుంటాం, వింటుంటాం. పొగతాగితే ఆనారోగ్యానికి గురవుతారని, ప్రాణాంతకమైన వ్యాధులు వస్తాయని.. అందరికీ తెలిసిందే. కానీ.. అదే స్మోకింగ్ మనిషిని మనిషిని లోపలి నుంచే కాదు.. బయట నుంచి కూడా కాల్చేస్తుందని ఈ విషాదకర ఘటన చూస్తే అర్థమవుతుంది. ఒక చిన్న బీడీ ముక్క.. ఓ వృద్ధురాలిని సజీవ దహనం చేసేసింది. 90 ఏళ్ల వృద్ధురాలి నిండు ప్రాణాన్ని పొగలో కలిపేసింది. ఈ విషాదకర ఘటన.. కరీంనగర్ జిల్లాలో జరిగింది.

మానకొండూర్ మండలం శ్రీనివాస్ నగర్‌లో బొడ్డు పోచమ్మ అనే 90 ఏళ్ల వృద్ధురాలు తన కోడలు బొడ్డు ఎల్లవ్వతో కలిసి ఉంటోంది. బొడ్డం పోచమ్మకు వయసురిత్యా వచ్చిన అనారోగ్యంతో పాటు.. కాలు విరగటంతో గత కొంతకాలంగా మంచానికి పరిమితమైంది. అయితే.. పోచమ్మకు ఏళ్లుగా చుట్టా, బీడీలు తాగే అలవాటు ఉంది. మంచానికి పరిమితమైనా సరే పోచమ్మ మాత్రం తన అలవాటును వదల్లేకపోయింది. నోరు లాగినప్పుడు.. ఒకటో అరో బీడీ తాగుతూంటుంది. ఎప్పటిలాగే.. ఆదివారం మధ్యాహ్నం కూడా పోచమ్మ బీడీ తాగింది. అయితే.. బీడీ ఆరిపోయిందనుకుందో లేదా తర్వాత తాగుదామనుకుందో సగం తాగేసిన బీడీ ముక్కను మంచం కోడుపై పెట్టి అలాగే పడుకుంది పోచమ్మ.

అయితే.. ఆ బీడీ ముక్క మంచంలో పడిపోవడంతో.. దాని నిప్పు దుప్పటికి అంటుకుని ఒక్కసారిగా మంటలు చెలరేగాయి. ఆ మంటలు మంచానికి అల్లుకున్న ప్లాస్టిక్‌ నమారుకు కూడా తాకటంతో.. మరింత ఎగిసిపడ్డాయి. అయితే కాలు విరిగి మంచంలో నుంచి లేవలేని పరిస్థితిలో ఉన్న పోచమ్మ.. ఆ మంటల నుంచి తప్పించుకోలేక అరుస్తూ ఉండిపోయింది. ఆ సమయంలో.. ఇంట్లో తన కోడలు లేకపోవటంతో.. ఆమెకు సాయం చేసేవాళ్లు కూడా లేకపోయారు. చుట్టుపక్కల ఉన్నవాళ్లు చాలాసేపటికి ఆమె అరుపులు విని.. ఏమైందా అని వచ్చి చూడగా.. మంటల్లో చిక్కుకున్న పోచమ్మను గమనించి.. వెంటనే మంటలు ఆర్పేసి అంబులెన్స్‌కు సమాచారం అందించారు.

హుటాహుటిన ఘటనా స్థలికి వచ్చిన అంబులెన్స్‌లో.. పోచమ్మను కరీంనగర్‌ ప్రభుత్వ ఆస్పత్రికి తరలించారు. మెరుగైన వైద్యం కోసం వరంగల్‌కు తరలిస్తుండగా మార్గమధ్యలోనే పోచమ్మ ప్రాణాలు వదిలింది. దీంతో.. చిన్న బీడీ ముక్క నిండు ప్రాణాన్ని బలితీసుకుంది. దీన్ని బట్టి.. పొగతాగటం ఆరోగ్యానికి హానికరమే కాదు.. ప్రాణాలకు కూడా ప్రమాదమే అని ఈ ఘటనతో మరోసారి నిరూపితమైంది.