ఆ అమ్మకు ఎంత నమ్మకమో.. డ్రైవరన్న చేసిన పనికి హ్యాట్సాప్ చెప్పాల్సిందే

ప్రయాణికులను సురక్షితంగా గమ్యస్థానాలకు చేరవేయటమే కాదు.. వారికి సహాయం చేయటంలోనూ ముందుంటామని నిరూపించాడు ఓ ఆర్టీసీ బస్సు డ్రైవర్. వ్యక్తిగత అవసరాల కోసం బస్సు దిగిన ఓ ప్రయాణికురాలి చంటి బిడ్డను కాసేపు లాలించి మానవత్వం చాటుకున్నాడు. తల్లి తిరిగి వచ్చే వరకు బిడ్డను లాలించాడు. ఈ ఘటన బస్సులోని అందర్ని కదిలించింది. వివరాల్లోకి వెళితే.. ఖమ్మం జిల్లా మణుగూరు ఆర్టీసీ డిపోకు చెందిన బస్సు హైదరాబాద్ బయల్దేరింది. ఓ ప్రయాణికురాలు తన ఏడాది వయస్సున్న చంటి పాపతో ప్రయాణం చేస్తుంది. అయితే బస్సు సూర్యాపేట బస్టాండ్‌లో కాసేపు ఆగగా.. సదరు మహిళ తన వ్యక్తిగత అవసరాలు నిమిత్తం బస్సు దిగింది.

అయితే చిన్నారిని చూసే వారెవరు లేకపోయారు. దీంతో డ్రైవర్ ఆ చిన్నారిని తన చేతుల్లోకి తీసుకున్నాడు. తల్లి వచ్చే వరకు చిన్నారి ఆలనా పాలనా చూసుకున్నాడు. చిన్నారి తల్లి తిరిగి రావడంతో శిశువుని ఆమెకి అప్పగించాడు. ఈ ఘటన బస్సులోని అందర్నీ కదలించింది. ఓ వ్యక్తి ఈ దృశ్యాన్ని కెమెరాలో బంధించగా.. అది తెలంగాణ రవాణా శాఖ మంత్రి పొన్నం ప్రభాకర్ దృష్టికి వచ్చింది. సదరు ఫోటోను సోషల్ మీడియాలో షేర్ చేసిన పొన్నం.. 'ఆర్టీసీ ఉద్యోగులు గమ్య స్థానాలకు చేర్చడంలోనే కాదు.. సహాయం చేయడంలోనూ ముందుటారు. మీకు నా అభినందనలు.' అని రాసుకొచ్చారు.

ఈ ఫోటోకు పలువురు నెటిజన్లు తమదైన శైలిలో కామెంట్లు పెడుతున్నారు. 'ఏనాటి ఋణానుబంధామో.. ఈ యాధృచ్చిక మధుర క్షణాలు. ఆర్టీసీ అమ్మ మీద ఆ అమ్మకు ఎంత నమ్మకమో! నా ప్రియమైన సోదరుడా.. యావత్ సంస్థ ప్రతిష్టను నీ చేతుల్లో పొదివి పట్టుకొనే అవకాశం కల్గినందుకు నాకెంతో అసూయగా ఉందయ్యా! మా అన్నకు కృతజ్ఞతాభివందనాలు.. బుజ్జాయి తల్లికి అభినందనలు.. ఆర్టీసీ అమ్మకు జేజేలు.' అని ఓ నెటిజన్ రాసుకొచ్చాడు. 'క్రూరాత్మకంగా ఉన్న సమాజoలో ఇలాంటి దృశ్యాలు కాస్త ఉపశమనం కలిగిస్తాయి.. డ్రైవరన్నా.. నీకు సలాం. ఆర్టీసీ మంచి పేరు తెసుస్తున్నావ్.' అని మరో నెటిజన్ రాసుకొచ్చాడు.