ఏసీబీ చరిత్రలోనే రెండో అతిపెద్ద ఆపరేషన్.. ఏఈఈ నికేష్ ఆస్తులు రూ.600 కోట్లకు పైమాటే

చిన్న తీగ లాగితే.. మొత్తం డొకంతా కదిలినట్టుగా.. ఇరిగేషన్ శాఖలో గండిపేట అసిస్టెంట్ ఎగ్జిక్యూటివ్ ఇంజనీర్‌గా పని చేస్తున్న నికేష్ కుమార్ అవినీతి భాగోతం గుట్టలు గుట్టలుగా బయటపడుతోంది. లక్ష రూపాయల లంచం తీసుకుంటూ అడ్డంగా దొరికిపోయిన నికేష్ కుమార్ వ్యవహారంపై అనుమానం వచ్చి.. ఏసీబీ అధికారులు సోదాలు నిర్వహించగా.. కళ్లు బైర్లు కమ్మేలా ఆస్తులు చిట్టా బయటికివస్తోంది. ఇప్పటివరకు జరిగిన సోదాల్లో బయటపడ్డ ఆస్తులు వివరాల ప్రకారం.. నికేష్ కుమార్ ఆస్తుల విలువ.. రూ. 600 కోట్లకు పైమాటే అని తెలుస్తోంది. దీంతో.. ఇది ఏసీబీ చరిత్రలోనే రెండో అతిపెద్ద ఆపరేషన్ అని అధికారులు చెప్తున్నారు.

మే 30న లక్ష రూపాయలు లంచం తీసుకుంటూ రెడ్ హ్యాండెడ్‌గా దొరికిపోయిన నికేష్ కుమార్‌ను పోలీసులు అరెస్ట్ చేసి విచారణ చేయగా.. విస్తుపోయే విషయాలు వెలుగు చూశాయి. దీంతో.. శుక్రవారం (నవంబర్ 29న) ఆయనకు సంబంధించిన నివాసాలు, కార్యాలయాలు, ఫామ్‌హౌసులు, బంధువులు, సన్నిహితులు ఇండ్లలో ఏసీబీ అధికారులు సోదాలు నిర్వహించారు. ఏపీ, తెలంగాణ రాష్ట్రాల్లోని 25 ప్రాంతాల్లో ఏకకాలంలో.. ఏసీబీ సోదాలు నిర్వహించగా.. రెండు రోజుల తనిఖీల్లో కళ్లు చెదిరేలా అక్రమాస్తులు బయటపడుతున్నాయి.

బఫర్‌ జోన్‌‌లలో నిర్మాణాలకు అనుమతులు ఇస్తూ.. నికేష్ కుమార్ కోట్లాది రూపాయలు కూడబెట్టినట్టు అధికారులు చెప్తున్నారు. ఇప్పటివరకు బయటపడిన ఆస్తుల మార్కెట్‌ విలువ రూ.600 కోట్లకు పైమాటేనని అధికారులు అంచనా వేస్తున్నారు. ఇందులో చాలా వరకు రియల్ ఎస్టేట్ ఆస్తులే ఉన్నట్టు అధికారులు చెప్తున్నారు. నానక్‌రాంగూడ, శంషాబాద్‌, గచ్చిబౌలిలో విల్లాలు, నార్సింగిలో 4 అంతస్తుల హాస్టల్ భవనం, మొయినాబాద్‌లో 3 ఫామ్‌హౌస్‌లు, తాండూరులో 3 ఎకరాలు ఉన్నట్టు ఏసీబీ తేల్చింది.

ఇవే కాకుండా.. నికేష్‌ బంధువుల పేర్లపైన కూడా భారీ ఎత్తున ఆస్తులు ఉన్నట్టు అధికారులు అనుమానిస్తున్నారు. అతి త్వరలోనే నికేష్‌కు సంబంధించిన బ్యాంకు లాకర్లను ఏసీబీ తెరవనుంది. ఇప్పటికే నికేష్ బంధువుల ఇళ్లలో నిర్వహించిన సోదాల్లో కిలో బంగారం స్వాధీనం చేసుకున్నారు. ఇక్క ఇప్పుడు బినామీ ఆస్తులు గుర్తించే పనిలో పడ్డారు అధికారులు.

నికేష్ కుమార్ ఇంట్లో 2 రోజుల పాటు సాగిన ఏసీబీ సోదాలు ముగిశాయి. నికేష్ కుమార్‌ను అధికారులు అదుపులోకి తీసుకుని నాంపల్లి ఏసీబీ కార్యాలయానికి తరలించారు. ఆదివారం ఉదయం 6 గంటలకు న్యాయమూర్తి నివాసంలో నికేష్‌ను హాజరుపర్చగా.. 14 రోజుల జ్యుడిషియల్ రిమాండ్ విధించారు. ఏసీబీ అధికారులు నికేష్‌ను చంచల్‌గూడ జైలుకు తరలించారు.