అమ్మానాన్న నన్ను క్షమించండి.. నా బిడ్డ జాగ్రత్త.. కన్నీళ్లు పెట్టిస్తోన్న వివాహిత చివరి మాటలు

ప్రాణానికి ప్రాణంగా ప్రేమించింది. తనను కూడా ప్రాణంగా చూసుకుంటాడని నమ్మింది. కన్నవారిని వదిలేసి మరీ.. మనసిచ్చినవాడితో వెళ్లిపోయి.. అతన్నే పెళ్లి చేసుకుంది. వాళ్లిద్దరి ప్రేమకు గుర్తుగా.. ఓ బాబు కూడా జన్మించాడు. అంతా బాగానే సాగుతోందనుకున్నారు అంతా. కన్నవారిని వదిలివెళ్లినా సరే.. మనసైనోడిని పెళ్లి చేసుకుని సుఖంగా ఉంటే అంతే చాలని అనుకున్నారు ఆమె సన్నిహితులు. ఇంతలో ఏమైందో ఏంటో తెలియదు కానీ.. ఉన్నట్టుండి అందరినీ షాక్‌కు గురిచేస్తూ.. కఠిన నిర్ణయం తీసుకుంది.

"అమ్మానాన్న.. నన్ను క్షమించండి.. ప్రేమ వివాహం చేసుకుని మీకు దూరంగా ఉన్నా.. మొదట్లో ఎంతో ప్రేమగా చూసుకున్న మా ఆయన.. ఇప్పుడు మాత్రం నిత్యం వేధిస్తున్నాడు. వేధింపులు తట్టుకోలేకపోతున్నా.. నేను చనిపోతున్నా.. నా బిడ్డను మీరే జాగ్రత్తగా చూసుకోండి".. అంటూ సెల్ఫీ వీడియో తీసుకుని మరీ ఆ వివాహిత ఆత్మహత్య చేసుకుంది. కన్నీళ్లు పెట్టిస్తున్న ఈ విషాదకర ఘటన.. పెద్దపల్లి జిల్లాలో జరిగింది.

పెద్దపల్లి జిల్లా ఎన్టీపీసీ ఆటోనగర్‌లో నివసిస్తున్న నరేందర్‌ (32), గోదావరిఖనికి చెందిన దేవర కొండ దీప్తి ఇద్దరూ ప్రేమించుకోగా.. 2021లో పెళ్లి చేసుకున్నారు. వీరి ప్రేమ వివాహానికి గుర్తుగా ఒక బాబు కూడా జన్నించాడు. నరేందర్, దీప్తి దంపతులు.. అన్నపూర్ణ కాలనీలోని ఒక అద్దె ఇంట్లో ఉంటున్నారు. దీప్తిని ప్రేమ వివాహం చేసుకున్న నరేందర్.. తన తల్లిదండ్రులను కాదనుకుని తనవెంట వచ్చిన భార్యను ప్రేమగా చూసుకున్నాడు. ఇంతలో ఏమైందో తెలియదు కానీ.. కొన్ని రోజుల తర్వాత కట్నం తీసుకు రావాలంటూ దీప్తిని వేధించటం మొదలుపెట్టాడు.

 ఇదే విషయంలో ఇద్దరు మధ్య చాలా సార్లు గొడవలు జరిగినా.. అందరినీ కాదనుకొని ప్రేమించిన వాడితో వచ్చేసింది కాబట్టి.. తన భర్త వేధిస్తున్నాడని చెప్తే.. ప్రేమించినోడే కావాలనుకుని, కన్నవారిని కాదనుకుపోయి.. ఇప్పుడేం ముఖం పెట్టుకుని వాచ్చవంటూ తిరిగి తననే తిడతారన్న భావనతో.. భర్త పెట్టిన బాధలను పంటిబిగువనే అదిమిపట్టుకుని పైకి నవ్వుతూనే సంసారాన్ని సాగించింది దీప్తి. కానీ.. భర్త వేధింపులు రోజురోజుకు పెరిగిపోవటంతో.. ఎవరికీ చెప్పుకోలేక, ఆ బాధలు భరించలేక.. తాను ఒంటరిగా మిగిలిపోయాననే భావన కుమిలిపోయేలా చేసింది.

ఈ క్రమంలోనే.. శనివారం (నవంబర్ 30) రోజు రాత్రి కూడా భార్యాభర్తల మధ్య గొడవ జరిగింది. దీంతో.. తీవ్ర మనస్తాపానికి గురైన దీప్తి.. కఠిన నిర్ణయం తీసుకుంది. తాను ఇన్ని రోజులు పంటిబిగువన దాచుకున్న దుఃఖాన్ని జనాలకు చెప్పేసి తనువు చాలించాలని నిర్ణయించుకుంది. తన భర్త తీవ్రంగా వేధిస్తున్నాడని.. అందుకే చనిపోతున్నానని.. సెల్‌ ఫోన్‌లో సెల్ఫీ వీడియో తీసుకుని.. ఉరేసుకుని ఆత్మహత్యకు పాల్పడింది.

ఉరేసుకున్న దీప్తిని గమనించిన నరేందర్‌ తన మిత్రుల సాయంతో హుటాహుటిన ఆస్పత్రికి తరలించాడు. అప్పటికే చాలా ఆలస్యమైపోయింది. దీప్తి ప్రాణాలు వదిలినట్టుగా వైద్యులు నిర్ధారించారు. ఈ సమాచారం అందుకున్న దీప్తి తల్లిదండ్రులు గుండెలు బాదుకుంటూ రోధించారు. తన బిడ్డను నరేందరే చంపేసి.. ఆత్మహత్యగా చిత్రీకరిస్తున్నాడని.. దీప్తి తండ్రి దివాకర్‌ పోలీసులకు ఫిర్యాదు చేశాడు. కేసు నమోదు చేసుకున్న పోలీసులు.. ఘటనపై అన్ని కోణాల్లో విచారణ చేస్తున్నామని గోదావరిఖని ఏసీపీ రమేశ్, సీఐ ప్రవీణ్, ఎస్‌ఐ ఉదయ్‌కిరణ్‌ తెలిపారు.