ఇండ్లులేని పేదలకు తీపి కబురు.. ఇందిరమ్మ ఇళ్లపై సర్కార్ కీలక అప్డేట్

తెలంగాణ కాంగ్రెస్ ఎన్నికల సమయంలో ఇచ్చిన ప్రధాన హామీల్లో ఇందిరమ్మ ఇళ్ల పథకం కూడా ఒకటి. తాము అధికారంలోకి వస్తే.. ఇండ్లులేని నిరుపేదలకు ఇందిరమ్మ ఇండ్లు నిర్మించి ఇస్తామని హామీ ఇచ్చింది. ఖాళీ జాగా ఉన్న పేదల ఇళ్ల నిర్మాణానికి రూ. 5 లక్షల ఆర్థిక సాయం అందిస్తామన్నారు. జాగాలేని వారికి జాగాతో పాటుగా.. రూ. 5 లక్షల ఆర్థిక సాయం అందిచనున్నట్లు ప్రకటించారు. ఈ హామీ అమలు కోసం తెలంగాణలోని ఇళ్లులేని పేదలు చాలా కాలంగా ఎదురుచూస్తున్నారు.

ఈ నేపథ్యంలో ఇందిరమ్మ ఇళ్ల పథకంపై రేవంత్ సర్కార్ కీలక అప్డేట్ ఇచ్చింది. డిసెంబర్ మొదటి వారంలో ఇందిరమ్మ ఇళ్ల పథకాన్ని ప్రారంభించనున్నట్లు సీఎం రేవంత్ రెడ్డి ఇది వరకే ప్రకటించిన విషయం తెలిసిందే. సీఎం ప్రకటన నేపథ్యంలో గృహనిర్మాణశాఖ మంత్రి పొంగులేటి శ్రీనివాస్ రెడ్డి కీలక అప్డేట్ ఇచ్చారు. ఈనెల 5 నుంచి ఇందిరమ్మ ఇళ్ల యాప్‌ను అందుబాటులోకి తీసుకురానున్నట్లు చెప్పారు. సీఎం రేవంత్ చేతుల మీదుగా ఇందిరమ్మ ఇళ్లను ప్రారంభిస్తామని మంత్రి పొంగులేటి చెప్పారు.

తెలంగాణ వ్యాప్తంగా మొదటి విడతగా 4.5లక్షల ఇళ్లు మంజూరు చేయనున్నట్లు మంత్రి పొంగులేటి వెల్లడించారు. ప్రతి నియోజకవర్గానికి 3500 చొప్పున ఇందిరమ్మ ఇళ్లు ఇస్తామన్నారు. వీటికోసం ఇప్పటికే.. రూ.3 వేల కోట్లను కేటాయించినట్లు మంత్రి వెల్లడించారు. లబ్ధిదారుల ఎంపిక కోసం గ్రామాల్లో ఇందిరమ్మ కమిటీలను సైతం నియమించినట్లు తెలిపారు. రాబోయే నాలుగేళ్లపాటు ఇందిరమ్మ ఇళ్లు పంపిణీ కొనసాగుతోందన్నారు.

ఇక ఇందిరమ్మ ఇండ్ల లబ్ధిదారుల ఎంపికపై సీఎం రేవంత్ ఇటీవల కీలక కామెంట్స్ చేశారు. ఇందిర‌మ్మ ఇళ్ల మంజూరులో అత్యంత నిరుపేద‌ల‌కు తొలి ప్రాధాన్యత ఇవ్వాల‌న్నారు. ముఖ్యంగా దివ్యాంగులు, వ్యవసాయ కూలీలు, సాగుభూమి లేని వారు, పారిశుద్ధ్య కార్మికులు.. ఇలా ప్రాధాన్యత క్రమాన్ని ఎంచుకోవాల‌ని చెప్పారు. తొలి ద‌శ‌లో సొంత స్థలాలున్న వారికే ప్రాధాన్యత ఇస్తున్న కారణంగా అవసరమైన జాగ్రత్తలు తీసుకోవాలన్నారు. ఈ విష‌యంలో గ్రామ కార్యదర్శితో పాటు మండ‌ల స్థాయి అధికారుల‌ను బాధ్యుల‌ను చేయాలన్నారు.

అందుకోసం అవ‌స‌ర‌మైన సాంకేతిక‌త‌ను వినియోగించుకోవాలని.. ఇందిరమ్మ యాప్‌లో ఎలాంటి లోపాలు, లోటుపాట్లు లేకుండా చూడాలని సీఎం రేవంత్ ఆదేశించారు. ఆదివాసీ ప్రాంతాలు, ఐటీడీఏల ప‌రిధిలో ఇందిర‌మ్మ ఇళ్లకు సంబంధించి ప్రత్యేక కోటా ఇచ్చేందుకు చర్యలు తీసుకోవాలన్నారు. లబ్దిదారులు ఎవరైనా ఇందిర‌మ్మ ఇళ్లకు అద‌నంగా గ‌దులు నిర్మించుకోవాలని ఆస‌క్తి చూపితే అందుకు అవ‌కాశం క‌ల్పించాలని సీఎం రేవంత్ అధికారులకు సూచించారు.