పెళ్లి పేరుతో చీటింగ్.. గర్భవతిని చేసి, సినీ అసిస్టెంట్ డైరెక్టర్‌పై కేసు

ఆమెకు అప్పటికే పెళ్లై ఓ ఎనిమిదేళ్ల కుమారుడు ఉన్నారు. భర్తతో విభేదాల కారణంగా అతడికి దూరంగా ఉంటుంది. బతుకుదెరువు కోసం హైదరాబాద్ చేరుకొని సినిమాల్లో జూనియర్ ఆర్టిస్ట్‌గా పని చేస్తుంది. దీంతో ఆమెను ట్రాప్ చేసిన ఓ అసిస్టెంట్ డెరెక్టర్.. పెళ్లి చేసుకుంటానని నమ్మించి గర్భవతిని చేశాడు. ఆ తర్వాత మరో అమ్మాయితో పెళ్లికి సిద్ధమయ్యాడు. దీంతో బాధితురాలు పోలీసులను ఆశ్రయించగా.. హైదరాబాద్ జూబ్లీహిల్స్ పోలీసులు కేసు నమోదు చేశారు.

పోలీసులు తెలిపిన వివరాల ప్రకారం.. కర్ణాటకకు చెందిన ఓ మహిళకు గతంలోనే పెళ్లి జరిగింది. ఆమెకు 8 ఏళ్ల వయస్సున్న కుమారుడు కూడా ఉన్నాడు. అయితే భర్తతో విభేదాల కారణంగా దూరంగా ఉంటున్నారు. కుమారుడితో కలిసి నగరానికి వచ్చిన ఆమె సినీ పరిశ్రమలో జూనియర్‌ ఆర్టిస్ట్‌గా పనిచేస్తూ కుటుంబాన్ని కుమారుడిని పోషిస్తుంది. ఇదే సమయంలో అసిస్టెంట్ డైరెక్టర్‌గా పనిచేస్తున్న షేక్‌ గౌస్‌ మొయినుద్దీన్‌ అలియాస్‌ చిన్నతో ఆమెకు పరిచయం ఏర్పడింది. ఆ పరిచయం కాస్త ప్రేమగా మారింది. పెళ్లి చేసుకొని చూసుకుంటానని మాయమాటలు చెప్పిన మొయినుద్దీన్‌ ఆమెను నమ్మించాడు.

గతేడాది ఫిబ్రవరిలో యూసుఫ్‌గూడ బస్తీ ప్రాంతంలో ఓ గది అద్దెకు తీసుకొని ఆమెతో సహజీవనం చేశాడు. డిసెంబరులో ఆమె గర్భిణి అని తెలిసింది. ఈ విషయాన్ని మొయినుద్దీన్‌ దృష్టికి తీసుకెళ్లగా.. ఇప్పుడే పిల్లలు వద్దంటూ బలవంతంగా అబార్షన్ చేయించాడు. తాజాగా గత నెలలో మొయినుద్దీన్‌ మరో యువతిని పెళ్లి చేసుకునేందుకు సిద్ధమయ్యాడు. ఈ విషయం తెలుసుకున్న ఆమె ప్రశ్నించేందుకు వెళ్లగా ఆమెపై కుటుంబసభ్యులతో కలిసి దాడికి పాల్పడ్డాడు. దీంతో బాధితురాలు పోలీసులను, కోర్టును ఆశ్రయించారు. దీంతో కేసు నమోదు చేసుకున్న జూబ్లీహిల్స్‌ పోలీసులు నిందితుడిపై బీఎన్‌ఎస్‌ యాక్ట్ 69, 89లతోపాటు ఎస్సీ, ఎస్టీ అట్రాసిటీ కేసులు బుక్ చేశారు. ప్రేమ పేరుతో మహిళలను, అమ్మాయిలను మోసం చేస్తే కఠిన చర్యలు తీసుకుంటామని పోలీసులు హెచ్చరిస్తున్నారు. కొత్త చట్టం ప్రకారం వారిపై తీవ్ర చర్యలు ఉంటాయని అంటున్నారు. మహిళలు కూడా గుడ్డిగా నమ్మి మోసపోవద్దని సూచిస్తున్నారు.