హైదరాబాద్‌లో కొత్తగా నిర్మాణాలు చేపడుతున్నారా..? ఆ సర్టిఫికేట్ తప్పనిసరి

గ్రేటర్ హైదరాబాద్ నగర పరిధిలోని చెరువులు, కుంటలు, ప్రభుత్వ స్థలాల పరిరక్షణ కోసం 'హైడ్రా' వ్యవస్థను ఏర్పాటు చేసిన సంగతి అందరికి తెలిసిందే. చెరువులు, కుంటల ఎఫ్‌టీఎల్, బఫర్ జోన్లు ఆక్రమించి నిర్మించిన అక్రమ నిర్మాణాలను హైడ్రా అధికారులు కూల్చేస్తున్నారు. బుల్డోజర్లతో సాయంతో వాటిని నేలమట్టం చేస్తున్నారు. ఇప్పటికే నగరంలో దాదాపు 300కు పైగా అక్రమ కట్టడాలను కూల్చేశారు. అయితే హైడ్రా కూల్చివేతలపై కొన్నిచోట్ల అభ్యంతరాలు వ్యక్తం అయ్యాయి. ఇంటి నిర్మాణాలకు అధికారులే పర్మిషన్ ఇచ్చారని.. ఇప్పుడు వారే అక్రమ కట్టడాలు అంటూ కూల్చేస్తున్నారని ప్రజలు ప్రశ్నిస్తున్నారు. చెరువుల ఎఫ్‌టీఎల్, బఫర్ జోన్లలో ఉంటే పర్మిషన్ ఎందుకు ఇచ్చారని నిలదీస్తున్నారు.

ఈ నేపథ్యంలో చెరువులు, నీటి కుంటలకు సమీపంలో నిర్మాణాలపై హైదరాబాద్‌ మహానగరాభివృద్ధి సంస్థ(HMDA) కీలక నిర్ణయం తీసుకుంది. ఇక నుంచి కొత్త నిర్మాణాలకు ఎన్వోసీలు ఉండాల్సిందేనని అధికారులు స్పష్టం చేస్తున్నారు. ప్రస్తుతం అనుమతులకు అప్లయ్ చేసుకున్న వారు ఎన్వోసీల కోసం ఇరిగేషన్ అధికారుల చుట్టూ ప్రదక్షిణలు చేస్తున్నారు. హెచ్‌ఎండీఏ మాస్టర్‌ప్లాన్‌ ప్రకారం చెరువులు, కుంటల బఫర్‌జోన్‌కు దూరంగా 200 మీటర్లు ఆపై ఉంటే నిర్మాణాలకు గతంలో అనుమతులిచ్చేవారు. ఇదే అదనుగా కొందరు భారీగా అక్రమ నిర్మాణాలు చేపట్టారు.

కొన్నిసార్లు బఫర్‌జోన్‌లో ఉన్నప్పటికీ మాస్టర్‌ప్లాన్‌లో మాయ చేసి అప్పటి అధికారులు నిర్లక్ష్యంగా అనుమతులు ఇచ్చారు. ఈ అనుమతులపై అభ్యంతరాలు వ్యక్తం అవుతున్నాయి. ఈ నేపథ్యంలో చెరువులు, నీటి వనరులకు 200 మీటర్లలోపు నిర్మాణాల కోసం వచ్చే దరఖాస్తులను హెచ్ఎండీఏ అధికారులు నిశితంగా పరిశీలిస్తున్నారు. మాస్టర్‌ప్లాన్‌లో చెరువులు, నీటి వనరులు లేకపోయినా రెవెన్యూ, నీటిపారుదల మ్యాపులను తెప్పించుకొని జాగ్రత్తగా హెచ్‌ఎండీఏ అధికారులు పరిశీలిస్తున్నారు. ఆ తర్వాతే ఎన్వోసీలను జారీ చేస్తున్నారు. నగరంలో చేపట్టే నిర్మాణాలకు ఎన్వోసీలు తప్పనిసరి అని అధికారులు చెబుతున్నారు.

ఇక హైడ్రా మరో కీలక నిర్ణయం తీసుకుంది. ఆక్రమణలపై ప్రజల నుంచి ఫిర్యాదులు తీసుకోవాలని హైడ్రా కమిషనర్ ఏవీ రంగనాథ్ నిర్ణయం తీసుకున్నారు. కొత్త ఏడాది నుంచి ప్రతి సోమవారం బుద్ధభవన్‌లో ప్రజల నుంచి ఫిర్యాదులు స్వీకరించనున్నారు. చెరువులు, నాలాలు, పార్కుల ఆక్రమణలపై ప్రజల నుంచి ఫిర్యాదులు స్వీకరించి వచ్చే ఫిర్యాదుల ఆధారంగా చర్యలు తీసుకోనున్నారు.