అమెరికాకు గులాబీ బాస్ కేసీఆర్.. ఎన్ని రోజుల టూర్

బీఆర్ఎస్ అధినేత, మాజీ సీఎం కేసీఆర్.. అమెరికాకు వెళ్లనున్నారు. అది కూడా తన జీవితంగా మొట్టమొదటిసారి. అదేంటీ కేసీఆర్.. ఇంతవరకు అమెరికాకు పోలేదా..? అని ఆశ్చర్యపోతున్నారా..? అవును, కేసీఆర్ ఇప్పటివరకు అగ్రరాజ్యమైన అమెరికాకు వెళ్లలేదు. అంతే కాదు.. రెండు సార్లు ముఖ్యమంత్రిగా చేసిన కేసీఆర్.. చేపట్టిన విదేశీ పర్యటనలు కేవలం రెండే రెండు కావటం గమనార్హం. అందులో ఒకటి సింగాపూర్, రెండోది చైనా. అంతకు మించి కేసీఆర్.. తన జీవితకాలంలో దేశం దాటలేదు. కాగా.. ఇప్పుడు లైఫ్‌లో ఫస్ట్‌ టైం.. అమెరికాకు వెళ్లనున్నట్టు సమాచారం అందుతోంది.

సాధారణంగా అయితే.. రాజకీయ నాయకులు తరచూ విదేశాల్లో పర్యటిస్తుంటారు. అందులోనూ అధికారంలో ఉంటే.. ఇక ప్రత్యేకంగా చెప్పాల్సిన పని లేదు. ఈ సదస్సు, ఆ సదస్సు అనో.. లేక అక్కడి అభివృద్ధిని అధ్యాయనం చేసేందుకనో ఇలా రకరకాల కార్యక్రమాలు, కారణాలతో విమానాలెక్కి విదేశాల్లో వాలిపోయి విహరిస్తుంటారు. కానీ.. కేసీఆర్ మాత్రం అందుకు పూర్తి భిన్నం. సుదీర్ఘ కాలం ఉద్యమకారుడిగా ఉండటమే కాకుండా.. సుమారు 35 ఏళ్లకుపైగా సుదీర్ఘంగా రాజకీయాల్లో కొనసాగుతున్న కేసీఆర్.. కేవలం రెండే రెండు ఫారిన్ టూర్‌లతో.. దేశంలోనే అత్యంత తక్కువ విదేశీ పర్యటనలు చేసిన ముఖ్యమంత్రిగా, పొలిటికల్ లీడర్‌గా కేసీఆర్ నిలిచారు.

కేసీఆర్ కుమారుడైన కేటీఆర్, కుమార్తె కవిత.. ఉన్నత విద్యను అమెరికాలోనే అభ్యసించిన విషయం తెలిసిందే. ఉన్నత విద్య తర్వాత కేటీఆర్ అక్కడే కొన్నాళ్లు ఉద్యోగం కూడా చేశారు. అయినా సరే.. కేసీఆర్ మాత్రం ఒక్కసారి కూడా అమెరికాలో అడుగు పెట్టలేదు. అయితే.. ఇప్పుడు అమెరికా వెళ్లేందుకు గులాబీ బాస్ సిద్ధమవుతున్నట్టు తెలుస్తోంది. ఒకటి రెండు నెలల్లో కేసీఆర్ అమెరికా ప్రయాణం ఉంటుందని తెలుస్తోంది. అమెరికా వెళ్లనున్న కేసీఆర్.. సుమారు 2 నెలల పాటు అక్కడే ఉండే అవకాశం ఉందని సమాచారం.

అయితే.. కేటీఆర్ కుమారుడు హిమాన్షు అమెరికాలోనే ఉన్నత విద్యను అభ్యసిస్తున్న విషయం తెలిసిందే. కాగా.. కేసీఆర్‌కు తన మనవడు హిమన్షుకు మధ్య ప్రత్యేక అనుబంధం ఉంటుంది. తన మనవడు అంటే.. కేసీఆర్‌కు చాలా ప్రేమ అన్న విషయాన్ని పలు సందర్భాల్లో తెలియజేశారు కూడా. అంతగా ప్రేమించే తన మనవడు హిమాన్షు కోరిక మేరకే తాత కేసీఆర్ అమెరికా వెళ్తున్నట్లు సమాచారం. కొన్ని రోజులు అమెరికా వచ్చి రెస్ట్ తీసుకోవాలని.. ఇటీవల ఇండియా వచ్చిన హిమాన్షు తాతను కోరినట్లు తెలుస్తోంది.

అయితే.. కేసీఆర్ అమెరికా వెళ్తే ఎక్కడ ఉండాలి, ఏ ప్రాంతాలు పర్యటించాలి అన్న విషయాలపై ఇప్పటి నుంచే.. అక్కడున్న ఎన్నారైలతో చర్చిస్తున్నట్టు సమాచారం. అటు తాను మనవడితో కొంత కాలం ఉన్నట్టు ఉండటమే కాకుండా.. అక్కడున్న ఎన్నారైలతో కూడా పార్టీ వ్యవహారాలు, సమావేశాలు నిర్వహించేందుకు ప్లాన్ చేస్తున్నట్టు సమాచారం. మొత్తానికి గులాబీ బాస్ కేసీఆర్.. త్వరలోనే అగ్రరాజ్యం అమెరికాలో అడుగు పెట్టేందుకు సిద్ధమవుతున్నారన్న మాట.