వారికి రైతు భరోసా కట్..? త్వరలోనే విధివిధానాలు, సంక్రాంతికి అకౌంట్లలోకి డబ్బులు

రైతు భరోసా పంట పెట్టుబడి సాయం కోసం తెలంగాణ అన్నదాత ఆశగా ఎదురు చూస్తున్నారు. ఇప్పటికే రూ.2 లక్షల రుణమాఫీ జరగ్గా.. పంట పెట్టుబడి సాయం ఎప్పుడెప్పుడు ఇస్తారా అని వేచి చూస్తున్నారు. గత బీఆర్ఎస్ ప్రభుత్వ హయంలో రైతుబంధు పేరుతో ఎకరాకు రూ.10 వేలు ఇవ్వగా.. ఇదే పథకాన్ని రైతుభరోసాగా మార్చి ఎకరాకు రూ. 15 వేలు (రెండు విడతల్లో) ఇవ్వనున్నట్లు కాంగ్రెస్ ప్రభుత్వం ప్రకటించింది. కాగా, సంక్రాంతి నుంచి రైతుభరోసా పథకం అమలు చేస్తామని వ్యవసాయశాఖ మంత్రి తుమ్మల నాగేశ్వరరావు అసెంబ్లీలో ప్రకటించారు. రైతుభరోసా పథకంపై శనివారం (డిసెంబర్ 21) అసెంబ్లీలో స్వల్పకాలిక చర్చను ప్రారంభిస్తూ మంత్రి ఈ పథకం ఉద్దేశాలు, లక్ష్యాలను వివరించారు. రానున్న సంక్రాంతి నుంచి ఈ పథకం కింద రైతుల అకౌంట్లలో సొమ్ము జమ చేయడానికి ప్రభుత్వం సిద్ధంగా ఉందని అన్నారు.

కాగా, ఈ పథకాన్ని పకడ్బందీగా అమలు చేసేందుకు ప్రభుత్వం సిద్ధమైంది. కేవలం పేద రైతులకు మాత్రమే పథకం వర్తించేలా విధివిధానాలు రూపొందిస్తున్నట్లు తెలిసింది. ప్రధాన మంత్రి కిసాన్‌ సమ్మాన్‌ నిధి (పీఎం కిసాన్‌) పథకం అమలుకు కేంద్ర ప్రభుత్వం పలు నిబంధనలు పెట్టిందన్న విషయాన్ని తుమ్మల అసెంబ్లీలో ప్రస్తావించారు. పీఎం కిసాన్‌ పథకం అమలుకు అనుసరిస్తున్న నిబంధనలు ఆయన వివరించారు. ఈ పథకం కింద గవర్నమెంట్ ఎంప్లాయిస్, పింఛన్‌దారులు, ప్రజాప్రతినిధులు, ట్యాక్స్ చెల్లింపుదారులు, డాక్టర్లు, ఇంజినీర్లు, న్యాయవాదులు, సీఏలు, ఆర్కిటెక్టు వంటి నిపుణులకు సాయం ఇవ్వరని తెలిపారు. వీరంతా అనర్హులని అన్నారు. ఒక రైతు కుటుంబం బ్యాంకు అకౌంట్‌లో ఏడాదికి రూ.6 వేల చొప్పున కేంద్రం జమచేస్తుందన్న విషయాన్ని గుర్తు చేసారు. ఈ నేపథ్యంలో ఇవే నిబంధనలు రైతు భరోసాకు అమలు చేసే అవకాశం ఉన్నట్లు తెలుస్తోంది. ఇదే జరిగితే పైన చెప్పిన వారందరికీ రైతు భరోస్ కట్ అవుతుంది.

రైతుభరోసా పథకానికి విధివిధానాలను రూపొందించేందుకు ప్రభుత్వం డిప్యూటీ సీఎం, ఫైనాన్స్ మినిస్టర్ భట్టి విక్రమార్క ఆధ్వర్యంలో కేబినెట్ సబ్ కమిటీ ఏర్పాటు చేసినట్లు చెప్పారు. గత బీఆర్ఎస్ ప్రభుత్వం ధరణి పోర్టల్‌లో ఉన్న పట్టాదారులందరికీ సాయం అందించిందన్నారు. సాగు చేసినా, చేయకున్నా రైతుబంధు సాయం ఇచ్చేశారన్నారు. ఈ విధంగా గత 12 పంట సీజన్లలో రూ.80,453.41 కోట్లు పెట్టుబిడి సాయంగా అందించారన్నారు. రైతుబంధు పథకం కింద రూ.21,283.66 కోట్లు సాగు చేయని భూములకు విడుదలైయినట్లు తేలిందన్నారు. తమ ప్రభుత్వం మాత్రం కేవలం సాగు చేసే భూములకు మాత్రమే పంట పెట్టుబడి సాయం అందిస్తుందని వెల్లడించారు.