కాళేశ్వరం ఆలయంలో.. అదికూడా గర్భగుడిలో.. భక్తులను ఆపేసి మరీ.

తెలంగాణలో ప్రముఖ పుణ్యక్షేత్రమైన కాళేశ్వరం ముక్తేశ్వర ఆలయంలో అపచారం జరిగింది. సాధారణంగా భక్తులు గర్భగుడి వరకు వెళ్లి లోపల ఉన్న స్వామివారిని దర్శించుకుంటుంటారు. గర్భగుడిలోకి వెళ్లాలంటే ప్రత్యేక ఆచారాలు, వ్యవహారాలు ఉంటాయి. పైగా.. ఆలయంలో ఫొటోలు, వీడియోలు కూడా తీయనివ్వరు. అలాంటిది కాళేశ్వరంలోని ముక్తేశ్వర ఆలయంలో పెద్ద పెద్ద కెమెరాలతో ఏకంగా ఓ ప్రైవేటు ఆల్బమ్‌ను షూట్‌ చేశారు. అదికూడా గర్భగుడిలో. ఇందుకోసం.. దర్శనానికి వచ్చిన భక్తులను బయటే నిలిపేసి.. గుడి తలుపులు మూసేయటం ఇప్పుడు చర్చనీయాంశంగా మారింది.

ఈ ఘటనపై భక్తుల నుంచి తీవ్ర విమర్శలు వెల్లువెత్తుతున్నాయి. భక్తులను ఆపేసి మరీ.. ఆలయ గర్భగుడిలో ఓ ప్రైవేటు ఆల్బమ్‌ చిత్రీకరిస్తుండటంపై తీవ్ర ఆగ్రహం వ్యక్తం చేస్తున్నారు. ఇంత అపచారం జరుగుతున్నా దేవాదాయ శాఖ అధికారులు పట్టించుకోకపోవడంపై మండిపడుతున్నారు. ఆలయ పవిత్రతను అధికారులు దెబ్బతీశారంటూ తిట్టిపోస్తున్నారు. ఈ ఘటనకు బాధ్యలైన అధికారులపై చర్యలు తీసుకోవాలని డిమాండ్‌ చేస్తున్నారు.

ఒకవేళ వాళ్లు తీస్తున్న ఆల్బమ్ ఆధ్యాత్మికమైనదే అయినా.. కాళేశ్వర ఆలయ ప్రాముఖ్యతను చాటిపెట్టే పాటో, డాక్యుమెంటరీనో అయినా.. భక్తులు దర్శించుకునే సమయంలో తీయటమేంటని ప్రశ్నిస్తున్నారు. భక్తుల రద్దీ లేని రోజుల్లోనో, గుడి మూసేసిన తర్వాత సాయంత్రం సమయంలోనో షూటింగ్ తీసుకోవచ్చు కదా అని రకరకాల కామెంట్లు చేస్తున్నారు. మరి.. ఈ షూటింగ్ ఆలయ అధికారుల పర్మిషన్ తీసుకుని చేస్తున్నారా.. లేదా సిబ్బంది పెత్తనంతో జరిగిందా అన్న అనుమానాలు కూడా తలెత్తుతున్నాయి. మరి ఈ ఘటనపై అధికారులు ఎలా స్పందిస్తారన్నది వేచి చూడాలి.

అయితే.. జయశంకర్ భూపాలపల్లి జిల్లా కాళేశ్వర పుణ్యక్షేత్రం.. త్రిలింగాల్లో ద్రాక్షారామం, శ్రీశైలం తర్వాత ముక్తేశ్వర ఆలయం ఒక్కటి. ఈ ఆలయంలో ఒకే వేదికపై రెండు శివలింగాలు ప్రతిష్ఠించబడి ఉండటం ప్రత్యేకత. ఒక శివలింగానికి కాళేశ్వరుడు అని, రెండో లింగానికి ముక్తేశ్వరుడు అని పేర్లు ఉన్నాయి. ఈ ఆలయానికి పిరమిడ్ ఆకారంలో శిఖరం నిర్మించబడి ఉండేది. ఈ ఆలయానికి ఉత్తరంగా మరొక చిన్న గుడి ఉండేది. అందులో అన్నపూర్ణ దేవి ప్రతిమ ఉండేది. ఇప్పటికీ ఈ ఆలయంలో గణపతి, మత్య్సావతారం, చతుర్ముఖలింగం, సూర్య, విష్ణు, నంది మొదలైన విగ్రహాలు ఉన్నాయి. విద్యానాథుడు ఈ పుణ్యక్షేత్రాన్ని త్రిలింగ దేశానికి ఒక సరిహద్దుగా కీర్తించాడు.