వేములవాడ రాజన్న భక్తులకు గుడ్‌న్యూస్.. ఇక నుంచి ఆ టెన్షన్ అవసరం లేదు

తెలంగాణలోని ప్రముఖ పుణ్యక్షేత్రాల్లో వేములవాడ శ్రీరాజరాజేశ్వరస్వామి ఆలయం ఒకటి. ఉమ్మడి కరీంనగర్ జిల్లాలోని ఈ ఆలయానికి ప్రతిరోజూ వేల సంఖ్యలో భక్తులు వెళ్తుంటారు. రాజన్నను దర్శించుకొని మెుక్కులు తీర్చుకుంటారు. ఒక మహాశివరాత్రి, ఏకాదశి సమయాల్లో అయితే ఇసుకేస్తే రాలనంత జనం ఉంటారు. వేములవాడలో భక్తులు ఎక్కువగా కోడె మెుక్కులు చెల్లించుకుంటారు. తాము కోరుకున్న కోర్కెలు నెరవేరితే జంట కోడెలను ఆలయానికి మెుక్కులుగా సమర్పిస్తారు. అయితే స్వామి వారి దర్శనం తర్వాత వసతికి సంబంధించిన టికెట్లు విషయమై ఆలయ అధికారులు గుడ్‌న్యూస్ చెప్పారు. ఇక నుంచి ఎటువంటి ఇబ్బందులు లేకుండా.. ఈజీగా టికెట్లు పొందొచ్చు.

 వేములవాడ రాజన్న ఆలయంలో జరిగే వివిధ పూజలు, వసతుల వివరాలను భక్తుల సౌకర్యం కోసం ఆన్‌లైన్‌లో ఉంచినట్లు ఆలయ ఈవో వినోద్‌ రెడ్డి మంగళవారం ఓ ప్రకటనలో తెలిపారు. రాజన్న ఆలయంతో పాటు అనుబంధ ఆలయాలైన భీమేశ్వర, బద్ది పోచమ్మ, శ్రీ నగరేశ్వర స్వామి ఆలయం, నాంపల్లి గుట్ట శ్రీ లక్ష్మీ నరసింహ స్వామి తదితర ఆలయాలకు సంబంధించిన పూర్తి సమాచారం, పూజల వివరాలు, ఆలయ వసతి గదుల వివరాలను వెబ్‌సైట్‌లో పెట్టామని చెప్పారు.. భక్తులు https://vemulawadatemple.telangana.gov.in/ అనే వెబ్‌సైట్‌లో వివరాలను పొందవచ్చునని అన్నారు.. ఆయా దేవాలయాల్లో జరిగే పూజలతో పాటు వసతి గదుల టికెట్లను వెబ్‌సైట్‌లో ఈ టికెటింగ్‌ పద్ధతిలో తీసుకోవచ్చునని తెలిపారు.. మీ సేవా కేంద్రాల్లోనూ ఈ టికెట్లు పొందొచ్చునని చెప్పారు.

కాగా, మహాశివరాత్రి, ఏకాదశితో పాటు ప్రత్యేక పండగల సమయాల్లో ఆలయంలో విపరీతమైన రద్దీ ఉంటుంది. భక్తులకు వసతి గదులు దొరకవు. అక్కడే టికెట్లు తీసుకోవాలంటే గంటలకొద్దీ, కి.మీ మేర బారులు తీరాల్సిన పరిస్థితి. ఆలయంలో కొందరు కొందరు సిబ్బంది వసతి గదుల టికెట్లను బ్లాక్‌లోనూ విక్రయిస్తున్నట్లు ఆరోపణలు కూడా వచ్చాయి.. దీంతో భక్తుల నుంచి విజ్ఞప్తి మేరకు ఆన్‌లైన్‌లో వసతి గదుల టికెట్లు పెట్టినట్లు ఆలయ ఈవో చెప్పారు. భక్తులు ఎటువంటి ఇబ్బందులు లేకుండా టికెట్లు బుక్ చేసుకోవచ్చునని ఈవో వినోద్ రెడ్డి అన్నారు.