రాష్ట్ర నలుమూలల నుంచి మేడారం సమ్మక్క-సారలమ్మ జాతరకు పెద్ద ఎత్తున భక్తులు

తెలంగాణ రాష్ట్రంలోని ములుగు జిల్లా తాడ్వాయి మండలంలో ఉన్నటువంటి శ్రీ మేడారం సమ్మక్క-సారలమ్మ మినీ జాతర ప్రారంభమైంది. ఈనెల 12 నుంచి 15వ తేదీ వరకు నాలుగు రోజుల పాటు జాతర ఘనంగా జరగనుంది.మొదటి రోజులో భాగంగా భక్తులు అధిక సంఖ్యలో తరలివచ్చారు. భక్తులు పెద్ద ఎత్తున తరలివచ్చి ఆ తల్లులను దర్శించుకుంటున్నారు. ఇప్పటికే ఇటు రాష్ట్ర ప్రభుత్వం కూడా మేడారానికి వెళ్లే భక్తుల సౌకర్యార్థం ప్రత్యేక బస్సులను నడిపిస్తుంది. అదేవిధంగా జాతర వద్ద ఎలాంటి ఇబ్బందులు తలెత్తకుండా అన్ని ఏర్పాట్లు చేపట్టింది. త్రాగునీరు, చలువ పందిళ్లు ఇలా భక్తులకు ఎలాంటి ఇబ్బందులు కలగకుండా అన్ని రకాల చర్యలు చేపట్టారు.వరంగల్ జిల్లా నుంచే కాకుండా రాష్ట్ర నలుమూలల నుంచి భక్తులు పెద్ద ఎత్తున తరలివస్తున్నారు. ఆ అమ్మవార్లకు చీరే, సారెతో పాటు ఎత్తు బంగారం సమర్పిస్తున్నారు. భక్తులు అధిక సంఖ్యలో తరలిరావడంతో ఆలయ ప్రాంగణం అంతా భక్తులతో కిటకిటలాడుతుంది.మేడారం సమ్మక్క-సారలమ్మ తల్లులను కోరిన కోరికలు తీర్చే కొంగుబంగారంగా భావిస్తుంటామని ఇక్కడికి వచ్చే భక్తులు చెబుతున్నారు. "మేము మహా జాతరతో పాటు ఈ మినీ మేడారం జాతర కూడా వస్తుంటాం. ఇక్కడున్నటువంటి వనదేవతలకు ఎత్తు బంగారంతో పాటు చీర, గాజులు, ఓడు బియ్యం సమర్పిస్తుంటాం. ఈ అమ్మవార్లను దర్శించుకోవడం ద్వారా మాకు సంతానం కలిగింది. అనుకున్న కోరికలు కూడా నెరవేరాయి. సమ్మక్క-సారలమ్మలను మా ఆరాధ్య దైవంగా భావిస్తుంటాం అందుకే జాతర సమయంలోనే కాకుండా ప్రతి నెలా ఇక్కడికి వస్తుంటాం."

కోరిన కోరికలు నెరవేరితే అమ్మవార్లకు ఎత్తు బంగారం సమర్పిస్తామని మరో భక్తురాలు తెలిపారు. గత 30 ఏళ్లుగా ఈ జాతరకు వస్తున్నామని పేర్కొన్నారు. జాతరకు వచ్చే భక్తుల సౌకర్యార్థం ప్రభుత్వం భక్తులకు ఎలాంటి ఇబ్బందులు కలగకుండా అన్ని రకాల ఏర్పాట్లు చేపట్టిందన్నారు. "ఈ తల్లులు ఎంతో మహిమగల దేవతలని ఇక్కడికి వచ్చి ఈ అమ్మవార్లను దర్శించుకుంటే కోరిన కోరికలు నెరవేరుతాయి" అంటూ చెప్పుకొచ్చారు.