కొత్త రేషన్‌ కార్డు దరఖాస్తుల కోసం వారికి తిప్పలు!

TG: కొత్తగా వివాహమై వేరుపడిన కుటుంబాలకు కొత్త రేషన్‌ కార్డు దరఖాస్తుల కోసం తిప్పలు తప్పడం లేదు. తల్లిదండ్రుల కుటుంబాల రేషన్‌ కార్డుల నుంచి వీరి పేర్లు తొలగిస్తే కానీ కొత్త కార్డుల కోసం దరఖాస్తు చేసుకునే పరిస్థితి లేదు. దీంతో పేర్లు తొలగించేందుకు రెవెన్యూ, సివిల్‌ సప్లయ్‌ సర్కిల్‌ ఆఫీసులకు బారులు తీరుతున్నారు. మరోవైపు కొత్త కార్డులు ఎప్పుడు మంజూరవుతాయో తెలియని పరిస్థితి. రేషన్‌కార్డుతో ఆరోగ్య శ్రీ, ఇతర సంక్షేమ పథకాలు ముడి పడి ఉండటంతో ఆందోళన చెందుతున్నారు.

కొత్త రేషన్‌ కార్డుల కోసం దరఖాస్తు చేసుకునేందుకు నాలుగేళ్ల తర్వాత అవకాశం లభించింది. గత ప్రభుత్వం కొత్త రేషన్‌ కార్డుల మంజూరు నిరంతర ప్రక్రియ అంటూనే పదేళ్లలో మొక్కుబడిగానే జారీ చేసి చేతులు దులుపుకొంది. వాస్తవంగా నాలుగేళ్ల క్రితం కొత్త కార్డుల కోసం దరఖాస్తు చేసుకునే సివిల్‌ సప్లయ్‌ వెబ్‌సైట్‌లో ఎఫ్‌ఎస్‌సీ లాగిన్‌ను నిలిపివేసింది. అప్పటి నుంచి దరఖాస్తు చేసుకునేందుకు వెసులుబాటు లేకుండాపోయింది. అంతకు ముందు పెండింగ్‌లోని ఆన్‌లైన్‌ దరఖాస్తులను పరిశీలించి కొన్ని కార్డులను అమోదించి మెజారిటీ దరఖాస్తులను తిరస్కరించింది. తాజాగా దరఖాస్తు చేసుకునే లాగిన్‌ పునరుద్ధరించడంతో  కొత్త కుటుంబాలు అసక్తి కనబర్చుతున్నా.. తల్లిదండ్రుల పాత కార్డులో లబి్ధదారులుగా పేర్లు ఉండటం సమస్యగా తయారైంది.  మరోవైపు కొత్త కార్డులు ఎప్పుడు మంజూరవుతాయో తెలియని పరిస్థితి.  దీంతో తల్లిదండ్రుల కార్డుల్లో పేర్లు తొలగించుకుంటే కొత్త కార్డులు మంజూరయ్యే వరకు పరిస్థితేంటనే విషయం ప్రశ్నార్థకంగా మారింది.  రేషన్‌కార్డుతో ఆరోగ్య శ్రీ,ఇతర సంక్షేమ ఫధకాలు ముడి పడి ఉండటంతో తల్లిదండ్రుల పాత కార్డులో పేర్లు తొలగించుకునేందుకు కొన్ని కొత్త కుటుంబాలు వెనుకడుగు వేస్తున్నట్లు తెలుస్తోంది.