స్కూల్‌కు వెళ్తూ రోడ్డుపైనే కుప్పకూలి..టెన్త్ విద్యార్థినికి గుండెపోటు

గుండెపోటుతో మరో విద్యార్థిని ప్రాణాలు వదిలింది. ఈ విషాదకర ఘటన.. కామారెడ్డి జిల్లా కేంద్రంలో చోటుచేసుకుంది. రామారెడ్డి మండలం సింగరాయిపల్లి గ్రామానికి చెందిన శ్రీనిధి (14).. కామారెడ్డి పట్టణంలోని ఓ ప్రైవేటు పాఠశాలలో పదో తరగతి చదువుతోంది. కామారెడ్డిలోనే ఉంటూ పదో తరగతి చదువుకుంటున్న శ్రీనిధి.. రోజూలాగానే గురువారం (ఫిబ్రవరి 20న) రోజు కూడా ఉదయం పూట పాఠశాలకు బయలుదేరింది. అయితే.. పాఠశాలకు సమీపంలో గుండెలో నొప్పి రావటంతో.. ఒక్కసారిగా సృహ కోల్పోయి రోడ్డుపై కుప్పకూలింది. అదే సమయంలో అటుగా వస్తున్న పాఠశాల ఉపాధ్యాయుడు శ్రీనిధిని గమనించి.. వెంటనే ఆమెను ఆసుపత్రికి తరలించాడు.

వెంటనే స్పందించిన ఆస్పత్రి సిబ్బంది.. ఆమెను పరీక్షించి ప్రాథమిక చికిత్స అందించినా.. శ్రీనిధి నుంచి ఎలాంటి స్పందన రాకపోవడంతో హుటాహుటిన మరో ఆస్పత్రికి తరలించారు. అక్కడ కూడా శ్రీనిధికి సీపీఆర్‌ (CPR) చేసినప్పటికీ.. ఫలితం లేకపోవడంతో విద్యార్థిని మృతి చెందినట్లు ధ్రువీకరించారు. ఈ విషాదకర సమాచారాన్ని శ్రీనిధి తల్లిదండ్రులకు స్కూల్ యాజమాన్యం అందించగా.. గుండెలు బాదుకుంటూ ఆస్పత్రికి వచ్చిన కుటుంబసభ్యులు విద్యార్థిని మృతదేహాన్ని స్వగ్రామానికి తరలించారు.

పాఠశాలకు చెందిన విద్యార్థిని మృతి చెందటంతో.. ఆమె కుటుంబంతో పాటు చదువుకునే పాఠశాలలోనూ విషాదఛాయలు అలుముకున్నాయి. శ్రీనిధి మృతి పట్ల ఉపాధ్యాయులు, విద్యార్థులు సంతాపం వ్యక్తం చేశారు. పదో తరగతి చదువుతున్న శ్రీనిధి.. చిన్న వయసులోనే గుండెపోటుతో ప్రాణాలు వదలటంతో.. గ్రామంలో కూడా విషాదఛాయలు అలుముకున్నాయి.

గతకొంత కాలంగా తెలంగాణ వ్యాప్తంగా గుండెపోటు మరణాలు పెరిగిపోతున్నాయి. అందులోనూ.. చిన్న వయసు వారికి కూడా గుండెపోటు వస్తుండటం సర్వత్రా ఆందోళన కలిగిస్తోంది. అది కూడా స్కూల్ పిల్లలకు కూడా హార్ట్ ఎటాక్ వస్తుండటం మరింత టెన్షన్ పెడుతోంది. గతనెలలో మహబూబ్‌నగర్ జిల్లాలోని గురుకులలో చదువుతున్న టెన్త్ విద్యార్థి కూడా హార్ట్ ఎటాక్‌తో ప్రాణాలు వదలగా.. ఇప్పుడు మరో పదో తరగతి విద్యార్థి ప్రాణాలు వదలటం బాధాకరం.

ఇదిలా ఉంటే.. హైకోర్టు న్యాయవాదులు గుండెపోటుతో కోర్టులోనే ప్రాణాలు వదిలిన ఘటనలు తీవ్ర విషాదాన్ని నింపాయి. ఓ న్యాయమూర్తి తన వాదనలు వినిపిస్తూ వినిపిస్తూనే గుండె పట్టుకుని కుప్పకూలి ప్రాణాలు వదలగా.. మరో న్యాయవాది కోర్టులో చలానా కట్టేందుకు వచ్చి కుప్పకూలి మృతి చెందారు.