ఇబ్బంది లేకుండా ఆ రెండు ప్రక్రియలూ ఒకేసారి..ఎల్ఆర్ఎస్ అఫ్లికేషన్లపై సర్కార్ కీలక నిర్ణయం

.తెలంగాణలోని పట్టణ, గ్రామీణ ప్రాంతాల్లోని అనుమతి లేని, చట్టవిరుద్ధమైన లే ఔట్ల క్రమబద్ధీకరణకు రేవంత్ సర్కార్ అవకాశం కల్పించిన సంగతి తెలిసిందే. 2020 ఆగస్టు 26 కంటే ముందు రిజిస్టర్ చేసిన లే ఔట్లకు మాత్రమే LRS వర్తిస్తుందని తెలిపింది. అదే ఏడాది అక్టోబర్ 15లోపు స్వీకరించిన దరఖాస్తులను పరిగణనలోకి తీసుకుంటామని స్పష్టం చేసింది. ఎల్ఆర్ఎస్ క్రమబద్ధీకరణకు రాష్ట్ర ప్రభుత్వం విధివిధానాలు సైతం జారీ చేసింది. ఇక ఎల్ఆర్ఎస్ అఫ్లికేషన్లు పరిష్కరించి ఆదాయాన్ని పొందేందుకు రేవంత్ సర్కార్ మరో నిర్ణయం తీసుకున్నది.

ఎటువంటి లింకు డాక్యుమెంట్లు లేకపోయినా.. ఒకేసారి ఓపెన్ ప్లాట్లను రిజిస్ట్రేషన్ చేయడం, ఎల్ఆర్ఎస్ ప్రక్రియ సైతం పూర్తి చేయాలని నిర్ణయించింది. అందుకు సంబంధించిన ‘ప్రీ-రిజిస్ట్రేషన్’ మాడ్యుల్‌ను ప్రభుత్వం రూపొందించింది. ఈ అవకాశం ఎల్ఆర్ఎస్-2020 దరఖాస్తుదారులకు, తాజాగా అఫ్లికేషన్లు పెట్టుకోబోతున్న వారికీ ఉందని స్టాంప్స్ అండ్ రిజిస్ట్రేషన్ జారీ చేసిన సర్క్యూలర్‌లో వెల్లడించారు. అనధికార లేఅవుట్‌లో 10 శాతం ఓపెన్ ప్లాట్లు ఇప్పటికే అమ్ముడు పోయాయనే దానితో ఎలాంటి సంబంధం లేకుండా ఎల్ఆర్ఎస్-2020 కింద దరఖాస్తు చేసుకున్నా, చేసుకోకపోయినా అటువంటి ప్లాట్లకు సైతం రిజిస్ట్రేషన్ చేయనున్నారు.

తెలంగాణలోని పలు జిల్లాలో ఎమ్మెల్సీ ఎన్నికల కోడ్ ఉండడంతో ప్రస్తుతం ఈ సర్క్యూలర్ హైదరాబాద్, రంగారెడ్డి, మేడ్చల్-మల్కాజిగిరి, ఉమ్మడి మహబుబ్‌నగర్ జిల్లాల్లో మాత్రమే అమలు చేయాలని ప్రభుత్వం నిర్ణయం తీసుకుంది. ఇక ఎల్ఆర్ఎస్ అఫ్లికేషన్లు పరిష్కరించేందుకు జీహెచ్ఎంసీ ప్రత్యేక చర్యలు చేపట్టింది. సర్కార్ కల్పించిన 25 శాతం స్పెషల్ డిస్కౌంట్‌ను సద్వినియోగం చేసుకోవాలని ప్రజలకు అవగాహన కల్పించేందుకు సిద్ధమయ్యారు. ప్రభుత్వ ఆఫీసుకు వచ్చిన వారిని గైడ్ చేసేందుకు జోనల్ ఆఫీసులో ప్రత్యేకంగా హెల్ప్‌డెస్క్‌లను ఏర్పాటు చేయాలని డిసైడ్ అయ్యారు. ఈ మేరకు తాజాగా.. శేరిలింగంపల్లి, కూకట్‌పల్లి, చార్మినార్, ఖైరతాబాద్, సికింద్రాబాద్, ఎల్బీనగర్ జోనల్ కార్యాలయాల్లో హెల్ప్ డెస్క్‌లు ఏర్పాటు చేశారు. ఇక ఎల్ఆర్ఎస్ అఫ్లికేషన్లు ఆన్‌లైన్‌లో అప్‌లోడ్ చేసేందుకు ప్రభుత్వం ఓ లాగిన్‌ను అందుబాటులోకి తీసుకొచ్చింది. అప్లికేషన్ సమయంలో సమర్పించని డాక్యుమెంట్లను ఇందులో అప్‌లోడ్ చేయాలని సూచించింది.