15 ఏళ్లు నిండిన మహిళలకు గుడ్‌న్యూస్.. రూ.50 వేలు నేరుగా అకౌంట్లోకే

మహిళా సాధికారతకు పెద్దపీట వేస్తున్న పథకాల్లో డ్వాక్రా పథకం ఒకటి. ఈ పథకం ద్వారా మహిళలు సొంతంగా ఏదైనా వ్యాపారం నిర్వహించుకునేందుకు బ్యాంకులు రుణాలు మంజూరు చేస్తున్నాయి. ఇప్పటికే డ్వాక్రా గ్రూపులోని మహిళలకు బ్యాంక్ నుంచి లోన్లను పొందుతున్నారు. అయితే.. డ్వాక్రా గ్రూపు మహిళలకు వడ్డీలేని రుణాలను మంజూరు చేస్తామని ఎన్నికల ముందు కాంగ్రెస్ పార్టీ హామీ ఇచ్చింది. దీనిలో భాగంగానే వారికి వడ్డీ లేకుండా.. రూ.5 లక్షల వరకు బ్యాంక్ లింకేజీ ద్వారా రుణాలను మంజూరు చేస్తున్నారు.

స్వయం ఉపాధిని పెంపొందించుకోవడం కోసం.. వ్యవసాయ, వాణిజ్య, చిన్న తరహా పరిశ్రమల అభివృద్ధికి ఈ నిధులు మహిళలకు ఎంతో ఉపయోగపడుతున్నాయి. డ్వాక్రా గ్రూపు మహిళలకు ఉచితంగా బీమా కల్పించడంతోపాటు.. సులభంగా రుణాలు పొందే అవకాశం కల్పిస్తున్నారు. దీంతో కొత్తగా గ్రూపులను ఏర్పాటు చేసుకునేందుకు మహిళలు ఆసక్తి కనబరుస్తున్నారు. అలాంటి వారికి ప్రభుత్వం గుడ్ న్యూస్ చెప్పింది. కొత్తగా డ్వాక్రా సభ్యులుగా చేరిన వారికి 6 నెలలు పూర్తయిన తర్వాత రూ.5 లక్షల వరకు బ్యాంక్ రుణం లభిస్తుంది.

అంటే ఒక డ్వాక్రా గ్రూపులో 10 మంది సభ్యులు ఉంటే.. గ్రూపులోని సభ్యులకు ఒకొక్కరికి రూ.50 వేల చొప్పున రుణాన్ని అందిస్తారు. వీటిని బ్యాంక్‌లకు గడువు తేదీలోగా చెల్లిస్తూ ఉంటే.. కాలానుగుణంగా డ్వాక్రా గ్రూప్ లింకేజీ రుణ పరిమితి పెరుగుతుంది. ఇలా రూ.20 లక్షల వరకు రుణాలు పొందే అవకాశం ఉంటుంది. ఈ రుణాలు పొందాలంటే.. బ్యాంక్‌కు వాయిదాలను కచ్చితంగా గడువులోకా చెల్లించాలి. వీటితో పాటు.. నెలనెలా పొదుపు కూడా చేయాలి. పొదుపు కోసం కూడా ఒక్కో గ్రూపు ఒక అకౌంట్‌‌ను నిర్వహించుకోవాల్సి ఉంటుంది. ఇక రుణ వాయిదాలను చెల్లించడంలో కూడా నిబంధనలు పాటించాల్సి ఉంటుంది.

పేదరిక నిర్మూలనే లక్ష్యంగా.. గ్రామీణ పేదరిక నిర్మూలన సంస్థ కొత్త కార్యవర్గాల ఏర్పాటుకు శ్రీకారం చుట్టింది. మొదట గ్రామ స్థాయిలో.. ఆ తర్వాత మండల స్థాయిలో కార్యవర్గాలను ఏర్పరచి డ్వాక్రా సంఘాలను మరింత మెరుగుపరచనుంది. గ్రామాల్లో ఈ ప్రక్రియను మార్చి 12 నాటికి పూర్తి చేయనుండగా.. అదే రోజు మండల స్థాయి కార్యవర్గాలను ఎన్నుకుంటారు.

మహిళా స్వయం సహాయక సంఘాల్లో సభ్యత్వానికి కనీస వయసును 18 ఏండ్ల నుంచి 15 ఏండ్లకు కుదిస్తూ ఇటీవల తెలంగాణ క్యాబినెట్ భేటీలో నిర్ణయం తీసుకున్నారు. అలాగే డ్వాక్రా సంఘాల్లో కొనసాగడానికి గరిష్ట వయసును 60 ఏండ్ల నుంచి 65 ఏండ్లకు పెంచారు. దీని ద్వారా డ్వాక్రా గ్రూపులో పెద్ద సంఖ్యలో యువతులు చేరేందుకు అవకాశం ఉంటుంది.