ఉత్తమ్, కోమటిరెడ్డి వెంకట్ రెడ్డికికీ సీఎంలు అయ్యే అర్హత ఉంది..ఎమ్మెల్యే రాజగోపాల్ రెడ్డి

తెలంగాణ కాంగ్రెస్‌లో ముఖ్యమంత్రి పదవికి పోటీ పడే నాయకుల గురించి చర్చ జరగడం సహజం. తెలంగాణలో కాంగ్రెస్ అధికారంలోకి వచ్చిన తర్వాత.. చాలా మంది సీనియర్ సీఎం పదవి కోసం పోటీ పడ్డారు. చివరకు ముఖ్యమంత్రిగా రేవంత్ రెడ్డిని అధిష్ఠానం ఖరారు చేసింది. పార్టీలో తనకంటూ ఒక ప్రత్యేక స్థానాన్ని ఏర్పరుచుకున్న రేవంత్.. ప్రజాకర్షణ, వాక్చాతుర్యం, పార్టీ శ్రేణుల్లో ఆయనకున్న పట్టును సానుకూల అంశాలుగా మలుచుకొని సీఎంగా బాధ్యతలు చేపట్టారు. అయితే రేవంత్ కాకుండా సీఎంగా ఎవరికి అవకాశాలున్నాయనే దానిపై తాజాగా మునుగోడు ఎమ్మెల్యే కోమటిరెడ్డి రాజగోపాల్ రెడ్డి ఇంట్రెస్టింగ్ కామెంట్స్ చేశారు.

ఉమ్మడి నల్లగొండ జిల్లాకు చెందిన సీనియర్ నేతలు, మంత్రులు కోమటిరెడ్డి వెంకటరెడ్డి, ఉత్తమ్ కుమార్ రెడ్డిలకు సీఎం అయ్యే అర్హత ఉందని అన్నారు. నల్లగొండ జిల్లా కలెక్టరేట్ ప్రాంగణంలో అదనపు బ్లాక్ భవన నిర్మాణం శంకుస్థాపన కార్యక్రమంలో పాల్గొని మాట్లాడిన రాజగోపాల్ రెడ్డి ఈ మేరకు సంచలన కామెంట్స్ చేశారు. కోమటిరెడ్డి వెంకటరెడ్డి, ఉత్తమ్ కుమార్ రెడ్డిలకు ముఖ్యమంత్రి అయ్యే అర్హత 100 శాతం ఉందని చెప్పారు. ఈ ఇద్దరి నాయకత్వంలో జిల్లాలోని పెండింగ్ ప్రాజెక్టులన్నీ పూర్తి చేసుకుంటున్నామని చెప్పారు. కాగా, గతంలోనూ ఇదే తరహా కామెంట్స్ రాజగోపాల్ రెడ్డి చేశారు. తాజాగా ఆయన చేసిన కామెంట్స్ అధికార కాంగ్రెస్ పార్టీలో చర్చకు దారి తీశాయి.

ఇక ఇదే సమావేశంలో పాల్గొని ప్రసంగించిన మంత్రి ఉత్తమ్ కుమార్ రెడ్డి.. బీఆర్ఎస్ పదేళ్ల పాలనపై తీవ్ర విమర్శలు చేశారు. ఒకే కుటుంబం పదేళ్లు పాలనలో ఉండి రాష్ట్రాన్ని నాశనం చేసిందని ఆరోపించారు. కుటుంబ పాలన, అవినీతితో రాష్ట్రాన్ని దివాలా తీయించారని పేర్కొన్నారు. సాగునీటి రంగంలో రూ.1.81 లక్షల కోట్లు ఖర్చు చేసి, బీఆర్ఎస్ నేతలు వ్యక్తిగత లాభాలు పొందారని విమర్శించారు. కాళేశ్వరం ప్రాజెక్టు నాణ్యతలో లోపం రావడం, మూడేళ్లలోనే నిర్మాణాలు ధ్వంసం కావడం నేతల కమీషన్ పాలిటిక్స్ కారణమని ఆరోపించారు. లక్ష కోట్ల రూపాయలు ఖర్చు చేసిన మేడిగడ్డ, సుందిళ్ల బ్యారేజీలు పనికిరావని NSDA నివేదికలో పేర్కొనిందని గుర్తు చేశారు.