చల్లని కబురు.. తెలంగాణ రాష్ట్రంలో మూడ్రోజుల పాటు వర్షాలు

తెలంగాణలో ఎండల తీవ్రత రోజురోజుకూ ఎక్కువైపోతుంది. భానుడు తన ప్రతాపాన్ని చూపిస్తున్నాడు. మండుతున్న ఎండలు, తీవ్ర ఉక్కపోతతో ప్రజలు అల్లాడిపోతున్నారు. ఉదయం 11 గంటల తర్వాత కాలు బయట పెట్టేందుకు జంకుతున్నారు. చాలా ప్రాంతాల్లో మధ్యాహ్నం వేళల్లో రోడ్లు నిర్మానుష్యంగా మారుతున్నాయి. రికార్డు స్థాయి ఉష్ణోగ్రతలు ప్రజల్ని ఉక్కిరిబిక్కిరి చేస్తున్నాయి. ఈ నేపథ్యంలో హైదరాబాద్ వాతావరణ కేంద్రం తెలంగాణ ప్రజలకు చల్లటి కబురు చెప్పింది.

రాష్ట్రంలోని పలు జిల్లాలకు మూడు రోజుల పాటు వర్షాలు కురుస్తాయని తెలిపింది. రాబోయే మూడు రోజులు తేలికపాటి నుంచి ఓ మోస్తరు వర్షాలు కురిసే అవకాశం ఉందని పేర్కొంది. దీని ప్రభావంతో గరిష్ఠ ఉష్ణోగ్రతలు సాధారణం కంటే రెండు నుండి మూడు డిగ్రీల సెల్సియస్ వరకు తక్కువగా నమోదయ్యే అవకాశం ఉందన్నారు. ప్రస్తుతం దక్షిణ తెలంగాణ ప్రాంతం నుంచి రాయలసీమ, తమిళనాడు మీదుగా గల్ఫ్ ఆఫ్ మన్నార్ వరకు ఉపరితల ద్రోణి కొనసాగుతోందన్నారు. ఇది సముద్ర మట్టం నుండి సుమారు 0.9 కిలోమీటర్ల ఎత్తు వరకు విస్తరించి ఉందని.. దీని ఫలితంగా రాష్ట్రంలోని దక్షిణ ప్రాంత జిల్లాల్లో అక్కడక్కడ తేలికపాటి వర్షాలు కురిసే అవకాశం ఉంది. కొన్ని ప్రాంతాల్లో మోస్తరు వర్షాలు కూడా కురిసే ఛాన్స్ ఉన్నట్లు పేర్కొన్నారు.

నేడు పలు జిల్లాల్లో ఉరుములు, మెరుపులతో కూడిన వర్షాలు కురిసే అవకాశం ఉందని హైదరాబాద్ వాతావరణ శాఖ హెచ్చరించింది. ఈదురు గాలులు గంటకు 30 నుంచి 40 కిలోమీటర్ల వేగంతో వీచే అవకాశం ఉందన్నారు. రానున్న రెండు రోజుల్లో కూడా ఇదే పరిస్థితి కొనసాగుతుందనని.. గంటకు 40 నుండి 50 కిలోమీటర్ల వేగంతో ఈదురు గాలులతో కూడిన వర్షాలు కురుస్తాయని తెలిపింది. పలు చోట్ల ఉరుములు, మెరుపులతో పాటుగా పిడుగులు కూడా పడే అవకాశం ఉన్నందున అప్రమత్తంగా ఉండాలని సూచించారు.

ఇదిలా ఉండగా.. శుక్రవారం రాష్ట్రంలో అత్యధికంగా అదిలాబాద్ జిల్లాలో 40.3 డిగ్రీల సెల్సియస్ గరిష్ఠ ఉష్ణోగ్రత నమోదైంది. మెదక్ జిల్లాలో అత్యల్పంగా 22.8 డిగ్రీల సెల్సియస్ కనిష్ఠ ఉష్ణోగ్రత నమోదైనట్లు వాతావరణ శాఖ అధికారులు తెలిపారు. అయితే రాబోయే మూడు రోజుల్లో ఉష్ణోగ్రతలు సాధారణ స్థాయి కంటే తక్కువగా ఉంటాయని వాతావరణ శాఖ తెలియజేసింది, మండు వేసవిలో ప్రజలకు ఇది కొంత ఉపశమనం కలిగించే విషయమే.