ట్రాఫిక్ రూల్స్ బ్రేక్ చేసిన వారి పాలిట సింహస్వప్నం,,,పక్కా ఆధారాలతో పోలీసులకు పట్టిస్తున్న టెకీ

రోజురోజుకూ పెరిగిపోతున్న వాహనాల వల్ల ఎన్ని రోడ్లు ఉన్నా సరిపోవడం లేదు. దీంతో ట్రాఫిక్ కష్టాలు ఎక్కువ అవుతున్నాయి. ఈ సమస్యకు తోడు ట్రాఫిక్ ఉల్లంఘనలకు పాల్పడేవారు కోకోల్లలు. ఫలితంగా పట్టణవాసులకు ప్రయాణం నరకప్రాయంగా మారుతోంది. ఇలాంటి ఉల్లంఘనలు రోజు చాలా మంది చూస్తున్నా.. ఎవరికి పట్టనట్లు తమ పని తాము చూసుకుంటారు. కానీ కొందరు అలా కాదు. సమాజ స్పృహతో ఎదుటివారికి ఇబ్బంది కాకుండా ఉంటారు. సమాజం కోసం తమకు చేతనైనంత చేస్తారు. అలాంటి కోవకు చెందిన ఓ టెకీ ట్రాఫిక్ ఉల్లంఘనలకు పాల్పడుతున్న వారి భరతం పడుతున్నాడు. బాడీ కెమెరా ధరించి పక్కా ఆధారాలతో ట్రాఫిక్ ఉల్లంఘనలకు పాల్పడుతున్న వారిని పోలీసులకు పట్టిస్తున్నాడు. దీంతో అందరి ప్రశంసలు అందుకుంటున్నాడు.

25 ఏళ్ల లోకేంద్ర సింగ్ సాఫ్ట్‌వేర్ ఇంజినీర్‌గా పనిచేస్తున్నాడు. అయితే అతడికి ఓ అలవాటు ఉంది. ప్రతిరోజు అందరూ రెడీ అయ్యి.. ఐడీ కార్డు వేసుకుని ఆఫీసుకు వెళ్తారు. అయితే ఇంటి నుంచి బయటకు వెళ్లే ముందు లోకేంద్ర సింగ్ కూడా అందరిలాగే ఐడీ కార్డుతో పాటు.. బాడీ కెమెరా కూడా ధరిస్తాడు. ఆఫీస్‌కు వెళ్తున్న సమయంలో వాహన దారులు ట్రాఫిక్ రూల్స్ పాటిస్తున్నారా లేదా అని చెక్ చేస్తాడు. అనంతరం తన కెమెరా ఫుటేజీ చెక్ చేసి.. ఎవరైనా రూల్స్ పాటించకపోతే ఆ ఆధారాలను పోలీసులకు పంపిస్తాడు. ఇలా ఇప్పటివరకు 3000 ఉల్లంఘనలను లోకేంద్ర సింగ్ రిపోర్ట్ చేశాడు.

రాంగ్ పార్కింగ్, ప్రమాదకర డ్రైవింగ్, రాంగ్ సైడ్ డ్రైవింగ్‌ వంటి ఉల్లంఘనలను చిత్రీకరించి ట్రాఫిక్ పోలీసులకు అందిస్తాడు. మూడేళ్ల క్రితం హైదరాబాద్‌కు వచ్చిన లోకేంద్ర.. ఇక్కడ ట్రాఫిక్ రూల్స్‌ను చాలా మంది అతిక్రమిస్తుండం గమనించాడు. అందుకే బాడీ కెమెరాతో ట్రాఫిక్ ఉల్లంఘన పాల్పడుతున్నవారి భరతం పడుతున్నాడు.

పాఠాశాల రోజుల నుంచే తనకు ట్రాఫిక్ ఎడ్యుకేషన్‌పై ఆసక్తి ఏర్పడిందని తెలిపాడు లోకేంద్ర. "రోడ్ సేఫ్టీలో ట్రాఫిక్ ఎడ్యుకేషన్ చాలా ముఖ్యమైన పాత్ర పోషిస్తుంది. మానవ తప్పిదాల వల్లనే 80 శాతం రోడ్డు ప్రమాదాలు జరుగుతున్నాయి. మన రోడ్లపై సురక్షితమైన వాతావరణం కల్పించాలంటే.. డ్రైవర్లు, పాదచారులు అని తేడాలేకుండా.. ప్రతిఒక్కరూ ట్రాఫిక్ ఎడ్యుకేషన్ సేఫ్టీ రూల్స్‌ను పాటించాలి." అని లోకేంద్ర సింగ్ సూచించాడు.

బాడీ కెమెరాతో మాత్రమే కాకుండా విద్యా సంస్థలను సందర్శించి రోడ్ సేఫ్టీపై అవగాహన పాఠాలు చెబుతుంటానని లోకేంద్ర తెలిపాడు. పిల్లలకు బలమైన సివిక్ సెన్స్ అలవాటు అయ్యేందుకు ఇది సహాయపడుతుందన్నాడు.