ఆ మూడు పథకాలపై,,,,మంత్రి పొంగులేటి శ్రీనివాస్ రెడ్డి సంచలన వ్యాఖ్యలు

తెలంగాణ రాష్ట్రంలో రాజకీయ వేడి రాజుకుంది. అధికారంలోకి వచ్చిన కాంగ్రెస్ ప్రభుత్వం, గత బీఆర్‌ఎస్‌ పాలనలో చేపట్టిన భారీ ప్రాజెక్టులపై తీవ్ర ఆరోపణలు గుప్పిస్తోంది. ఇందిరమ్మ ఇళ్ల నిర్మాణం పనుల ప్రారంభోత్సవం సందర్భంగా.. మంత్రి పొంగులేటి శ్రీనివాస్ రెడ్డి పాత ప్రభుత్వ విధానాలపై నిప్పులు చెరిగారు. తమ ప్రభుత్వం 20 లక్షల ఇందిరమ్మ ఇళ్లను నిర్మించి తీరుతుందని ఆయన ధీమా వ్యక్తం చేయగా.. కాళేశ్వరం , మిషన్ భగీరథ , ధరణి వంటి గత ప్రభుత్వ ప్రతిష్టాత్మక ప్రాజెక్టులను అతిపెద్ద కుంభకోణాలుగా అభివర్ణించారు. తెలంగాణ జాతిపితగా స్వయంగా ప్రకటించుకున్న వ్యక్తి (మాజీ ముఖ్యమంత్రి కేసీఆర్) ఇప్పుడు దర్యాప్తు సంస్థ ముందుకు వచ్చారన్నారు.

ములుగు మండలం ఇంచర్ల గ్రామంలో మంత్రి సీతక్కతో కలిసి ఇందిరమ్మ ఇళ్లకు భూమిపూజ చేసిన అనంతరం.. మంత్రి పొంగులేటి శ్రీనివాస్ రెడ్డి విలేకరులతో మాట్లాడారు. గత పాలకులు అభివృద్ధి ముసుగులో రాష్ట్రాన్ని దోచుకోవడానికి కాళేశ్వరం లిఫ్ట్ ఇరిగేషన్ ప్రాజెక్టు, ఇంటింటికీ తాగునీటిని అందించే మిషన్ భగీరథ, భూ రికార్డుల డిజిటలైజేషన్ కోసం రూపొందించిన ధరణి పోర్టల్‌ను ఎంచుకున్నారని ఆక్షేపించారు.

కాళేశ్వరం ప్రాజెక్టును 'ఎనిమిదో వింత'గా ప్రచారం చేసి, సుమారు రూ.లక్ష కోట్లకుపైగా తెలంగాణ ప్రజల సొమ్మును దుర్వినియోగం చేశారని ఆరోపించారు. ప్రాజెక్టులోని మేడిగడ్డ బ్యారేజీ పిల్లర్లు కుంగిపోయిన విషయాన్ని గుర్తుచేస్తూ, 'ఆ ప్రభుత్వం ఉన్నప్పుడే ఆ ప్రాజెక్టు కూలిపోయింది' అని ఎద్దేవా చేశారు. కాళేశ్వరం రూపశిల్పినని చెప్పుకున్న మహానుభావుడు తాజాగా న్యాయ విచారణ కమిషన్‌ ఎదుట హాజరు కావాల్సి వచ్చిందని విమర్శించారు.

అదేవిధంగా.. మిషన్ భగీరథ పథకంలోనూ భారీ ఎత్తున అవినీతి జరిగిందని, నిర్వహణ లోపాలతో అనేక ప్రాంతాల్లో ప్రజలకు తాగునీరు సక్రమంగా అందడం లేదని ఆరోపించారు. ధరణి పోర్టల్‌ రైతులకు సౌలభ్యం కల్పించినప్పటికీ, అనేక మంది రైతులు తమ భూములకు సంబంధించిన సమస్యలతో ఇబ్బందులు పడుతున్నారని, రియల్ ఎస్టేట్ మాఫియాకు ఇది అక్రమ మార్గంగా మారిందని విమర్శించారు. ఈ మూడు ప్రాజెక్టులను గత ప్రభుత్వం తమ 'గులాబీ' వ్యవస్థను, వ్యక్తిగత ప్రయోజనాలను బలోపేతం చేసుకోవడానికే ఉపయోగించుకుందని పొంగులేటి మండిపడ్డారు.

తెలంగాణ ప్రజలకు ఇంటింటికీ ఇళ్లు అందించాలన్న నిబద్ధతను కాంగ్రెస్ ప్రభుత్వం చాటుకుందన్నారు. రాష్ట్రంలోని ఏ గ్రామానికి వెళ్లి చూసినా ఇందిరమ్మ ఇళ్లు కనిపిస్తాయని, రాష్ట్ర విభజనకు ముందు తొమ్మిదేళ్ల కాంగ్రెస్‌ ప్రభుత్వ హయాంలో తెలంగాణ పరిధిలో 24,50,000 ఇందిరమ్మ ఇళ్ల నిర్మాణం జరిగిందని గుర్తు చేశారు. రాష్ట్ర ఆవిర్భావం తర్వాత పదేళ్లు అధికారంలో ఉన్న పాలకులు కేవలం ‘డబుల్‌ బెడ్‌రూమ్‌ ఇళ్ల బొమ్మలు’ చూపించి అన్ని ఎన్నికల్లో గెలిచారని, కానీ ఆచరణలో ఇళ్లు కట్టడంలో విఫలమయ్యారని ఎద్దేవా చేశారు.

భారాస సర్కారు రాష్ట్రవ్యాప్తంగా కేవలం 92,000 ఇళ్ల నిర్మాణానికే టెండర్లు పిలిచిందని, వాటిలో పూర్తయింది 60 వేలేనని మంత్రి పొంగులేటి గణాంకాలు వివరించారు. 'మొండి గోడలతో ఉన్న మిగిలిన సుమారు 30 వేల ఇళ్లను మా ప్రభుత్వం వేగంగా పూర్తిచేసింది' అని స్పష్టం చేశారు. గత ప్రభుత్వం చేసిన అప్పుల కారణంగా ఆర్థిక ఇబ్బందులు ఉన్నప్పటికీ, తమ హయాంలో 20 లక్షల ఇందిరమ్మ ఇళ్లు నిర్మించి తీరుతామని గట్టి హామీ ఇచ్చారు. ప్రస్తుతం నిర్మాణంలో ఉన్న 4.50 లక్షల ఇళ్లకు ప్రత్యేక కూపన్లతో ఉచితంగా ఇసుక సరఫరా చేయాలని అన్ని జిల్లాల కలెక్టర్లకు ఈ సందర్భంగా మంత్రి పొంగులేటి ఆదేశాలు జారీ చేశారు. ఈ చర్యలు తెలంగాణ ప్రజలకు సొంత ఇంటి కలను నిజం చేయడమే కాకుండా, నిర్మాణ రంగానికి కూడా ఊతమిస్తాయని ప్రభుత్వం భావిస్తోంది.