ఫలితాలిస్తున్న స్కిల్ యూనివర్సిటీ పనితీరు.. 10లో 8 మందికి జాబ్స్

తెలంగాణ రాష్ట్రంలోని యువతకు నైపుణ్యాభివృద్ధిలో వినూత్న మార్గాలను చూపుతూ.. యంగ్ ఇండియా స్కిల్ యూనివర్సిటీ ఉద్యోగావకాశాల కల్పనలో కీలక పాత్ర పోషిస్తోంది. ఈ విశ్వవిద్యాలయంలో శిక్షణ పూర్తి చేసుకున్న వారిలో దాదాపు 80 శాతం మందికి ఉద్యోగాలు లభించాయని రాష్ట్ర ఐటీ, పరిశ్రమల శాఖ మంత్రి శ్రీధర్ బాబు హర్షం వ్యక్తంచేశారు. బషీర్‌బాగ్‌లోని పీజీ లా కళాశాలలో సోమవారం నిర్వహించిన బృహత్తర జాబ్/స్కిల్ అండ్ లోన్ మేళా కార్యక్రమాన్ని కేంద్ర నైపుణ్యాభివృద్ధి శాఖ మంత్రి జయంత్ చౌదరి, మంత్రి శ్రీధర్ బాబు సంయుక్తంగా ప్రారంభించారు. ఈ సందర్భంగా మంత్రి శ్రీధర్ బాబు మాట్లాడుతూ.. తెలంగాణను 'ప్రపంచానికి నైపుణ్య రాజధానిగా' (స్కిల్ క్యాపిటల్ ఆఫ్ ది గ్లోబల్) తీర్చిదిద్దేందుకు రాష్ట్ర ప్రభుత్వం అంకితభావంతో కృషి చేస్తోందని వెల్లడించారు.

ఉపాధి కల్పనలో దారి..

యంగ్ ఇండియా స్కిల్ యూనివర్సిటీ సాధిస్తున్న 80 శాతం ప్లేస్‌మెంట్ రేటు రాష్ట్రంలో నైపుణ్యాభివృద్ధి రంగంలో ఒక నూతన ఆధ్యాయాన్ని సూచిస్తుంది. విద్యార్థులకు కేవలం సైద్ధాంతిక పరిజ్ఞానం మాత్రమే కాకుండా.. పరిశ్రమల అవసరాలకు తగ్గట్టుగా ఆచరణాత్మక నైపుణ్యాలను అందించడం ఈ విశ్వవిద్యాలయం యొక్క ప్రధాన లక్ష్యం. పరిశ్రమలు ఆశించే నైపుణ్యాలకు, విద్యా సంస్థలు అందిస్తున్న శిక్షణకు మధ్య ఉన్న అంతరాన్ని ముఖ్యమంత్రి రేవంత్ రెడ్డి నేతృత్వంలోని కాంగ్రెస్ ప్రభుత్వం స్పష్టంగా గుర్తించిందని మంత్రి శ్రీధర్ బాబు పేర్కొన్నారు.

అందరినీ కలుపుకొని పోయే తమ ప్రభుత్వం, నైపుణ్యాభివృద్ధిలో పరిశ్రమలు, నిపుణులను భాగస్వామ్యం చేస్తోందని తెలిపారు. వారి తోడ్పాటుతోనే స్కిల్ యూనివర్సిటీలో కోర్సులకు రూపకల్పన చేస్తున్నామ‌ని, ఇక్కడి శిక్షణ పొందిన యువతకు అధిక సంఖ్యలో ఉద్యోగాలు దక్కడం ఈ సమ్మిళిత విధానానికి నిదర్శనమని ఆయన వివరించారు. ఈ ప్రణాళికాబద్ధమైన విధానం ద్వారా విద్యార్థులు కేవలం పట్టాలు పొందడం కాకుండా.. వాస్తవ ప్రపంచ అవసరాలకు తగ్గట్టుగా తమను తాము సన్నద్ధం చేసుకోగలుగుతున్నారు. ఇది వారి భవిష్యత్తుకు భరోసా ఇవ్వడమే కాకుండా.. రాష్ట్ర ఆర్థిక వ్యవస్థకు కూడా బలం చేకూరుస్తుంది.

తెలంగాణ విజన్..

మంత్రి శ్రీధర్ బాబు తెలంగాణ యువతలో అపారమైన ప్రతిభ ఉందని చెప్పారు. మారుతున్న ప్రపంచ పరిస్థితులకు అనుగుణంగా అందరూ తమ నైపుణ్యాలను మెరుగుపరుచుకోవాల్సిన అవసరాన్ని ఆయన గుర్తుచేశారు. ‘టెక్నాలజీ సహాయంతో కొత్త నైపుణ్యాలను నేర్చుకునేందుకు నిరంతరం ప్రయత్నించాలి. ఓటమికి నిరుత్సాహం చెందకుండా, లక్ష్యాన్ని చేరుకునే వరకు కృషి చేస్తూనే ఉండాలి’ అని యువతకు ఆయన విలువైన సూచనలిచ్చారు. నిరంతర అభ్యాసం, పట్టుదలే విజయానికి రహస్యమని ఆయన ఉద్బోధించారు.

ఈ మెగా జాబ్ మేళా వంటి కార్యక్రమాలు యువతకు ఒకే వేదికపై అనేక అవకాశాలను అందిస్తాయి. కేవలం ఉద్యోగావకాశాలు మాత్రమే కాకుండా.. వివిధ నైపుణ్య శిక్షణ కార్యక్రమాల గురించి, స్వయం ఉపాధి కోసం లభించే రుణ సౌకర్యాల గురించి కూడా అవగాహన కల్పిస్తారు. నిరుద్యోగ యువతకు సరైన మార్గదర్శకత్వం, తగిన నైపుణ్యాలను అందిస్తే.. వారు స్వయం సమృద్ధి సాధించి, సమాజానికి విలువైన సేవలను అందించగలరనేది ప్రభుత్వ విశ్వాసం. కార్యక్రమం సందర్భంగా యంగ్ ఇండియా స్కిల్ యూనివర్సిటీని సందర్శించాలని కేంద్ర మంత్రి జయంత్ చౌదరిని మంత్రి శ్రీధర్ బాబు ఆహ్వానించారు. నైపుణ్యాభివృద్ధి రంగంలో కేంద్ర ప్రభుత్వంతో కలిసి పని చేసేందుకు రాష్ట్ర ప్రభుత్వం సంసిద్ధంగా ఉందని ఆయన స్పష్టం చేశారు.