రోడ్డు భద్రతకు ప్రభాస్ ‘ది రాజా సాబ్’ టీజర్ వీడియో వాడేసిన హైదరాబాద్ ట్రాఫిక్ పోలీసులు

ప్రభాస్ నటించిన తాజా చిత్రం ‘ది రాజా సాబ్’ టీజర్ విడుదలై అద్భుతమైన స్పందనను అందుకుంటుంది. యూట్యూబ్‌లో రికార్డు స్థాయి వ్యూస్‌తో ఈ టీజర్ అదరగొడుతోంది. ఈ టీజర్‌లోని కొన్ని సీన్లను ఉపయోగించుకొని హైదరాబాద్ ట్రాఫిక్ పోలీసులు ఒక వినూత్నమైన రోడ్డు భద్రతా అవగాహన ప్రచారాన్ని చేపట్టారు. ‘వాహనం నెమ్మదిగా నడపాలి, తప్పనిసరిగా హెల్మెట్ ధరించాలి’ అనే ముఖ్య సందేశాలను ప్రభాస్ డైలాగ్‌లతో కలిపి ఒక ఆకర్షణీయమైన వీడియోను విడుదల చేశారు. ప్రస్తుతం వాళ్లు విడుదల చేసిన ఈ వీడియో సోషల్ మీడియాలో వైరల్ అవుతోంది.

సినిమా డైలాగులతో సురక్షిత ప్రయాణం..

హైదరాబాద్ ట్రాఫిక్ పోలీస్ బృందం యువత ఆలోచనా విధానాన్ని అర్థం చేసుకొని, వారికి చేరువయ్యేలా ఈ ప్రచార వీడియోను రూపొందించింది. ‘రాజాసాబ్’ టీజర్‌లోని ‘హలో... హలో... బండి కొంచెం మెల్లగా... అసలే మన లైఫ్ అంతంతమాత్రం’ అనే డైలాగ్‌ను అత్యంత ప్రభావవంతంగా ఉపయోగించారు. ఈ వీడియో ప్రభాస్ గత చిత్రం ‘సాహో’లోని ‘ఇట్స్ షో టైమ్’ అనే డైలాగ్‌తో ప్రారంభమవుతుంది. ఆ వెంటనే ప్రభాస్ వేగంగా బైక్‌పై దూసుకెళ్లే దృశ్యం కనిపిస్తుంది. అప్పుడే ‘రాజాసాబ్’ డైలాగ్ ప్లే అవుతుంది. ఈ వినూత్న విధానం ర్యాష్ డ్రైవింగ్ చేసేవారిలో.. తమ వేగవంతమైన డ్రైవింగ్‌తో ఇతరులకు ఇబ్బందులు కలిగించేవారిలో మార్పును తీసుకురావాలని లక్ష్యంగా పెట్టుకుంది.

‘అసలే మన లైఫ్ అంతంతమాత్రం’ అనే డైలాగ్‌ను జోడించడం ద్వారా ప్రాణాల విలువను గుర్తుచేసే విధంగా ఈ వీడియో రూపొందించారు. అనంతరం.. ప్రభాస్ నటించిన 'మిర్చి' సినిమాలో హెల్మెట్ ధరించి, బైక్‌పై నెమ్మదిగా దిగే సన్నివేశాన్ని వీడియోకు జోడించి.. ‘హెల్మెట్ ధరించండి, నెమ్మదిగా వెళ్లండి’ అనే స్పష్టమైన సందేశాన్ని అందించారు. ఈ విధంగా.. సినీ స్టార్ ప్రభాస్ ద్వారా రోడ్డు భద్రత నియమావళిని ప్రచారం చేయడం ద్వారా ట్రాఫిక్ రూల్స్‌ అందరికీ అర్థం అయ్యే విధంగా

సోషల్‌మీడియాలో విస్తరణ..

హైదరాబాద్ ట్రాఫిక్ పోలీసుల ఈ వినూత్న ఆలోచనా విధానంపై నెటిజన్ల నుంచి ప్రశంసలు వస్తున్నాయి. ‘కొందరికి ఎలా చెబితే అర్థమవుతుందో, అలాగే చెప్పేశారు మన పోలీసులు’ అంటూ అనేకమంది ఈ వీడియోను షేర్ చేస్తున్నారు. ఇది ప్రస్తుతం సామాజిక మాధ్యమాల్లో వైరల్‌గా మారింది. సాధారణంగా.. అధికారిక హెచ్చరికలు యువతకు చేరువ కావడం కష్టం. కానీ.. వారికి ఇష్టమైన నటుడి డైలాగులు, దృశ్యాలను ఉపయోగించి సందేశం ఇస్తే.. అది వారిలో బలమైన ముద్ర వేస్తుంది.

హైదరాబాద్ వంటి మెట్రో నగరాల్లో రోజురోజుకు పెరుగుతున్న ట్రాఫిక్, ప్రమాదాల సంఖ్యను దృష్టిలో ఉంచుకొని ఇలాంటి అవగాహన కార్యక్రమాలు అవసరం. ప్రభుత్వ సంస్థలు సామాన్య ప్రజలతో, ముఖ్యంగా యువతతో కనెక్ట్ అవ్వడానికి సోషల్ మీడియాను ఎలా సమర్థవంతంగా ఉపయోగించుకోవచ్చో ఈ ప్రచారం నిరూపించింది.