త్వరలో హైదరాబాద్‌కు బీఎండీ కవచం

హైదరాబాద్ నగరం, అత్యాధునిక సాంకేతిక పరిజ్ఞానం, రక్షణ రంగ పరిశోధనలకు ఒక అభివృద్ధి చెందుతున్న కేంద్రంగా తన వ్యూహాత్మక ప్రాముఖ్యతను చాటుకుంటోంది. పెరుగుతున్న ఈ ప్రాధాన్యతను దృష్టిలో ఉంచుకొని.. శత్రుదేశాలు ప్రయోగించే ఖండాంతర క్షిపణుల నుంచి రక్షణ కల్పించే విధంగా కేంద్ర ప్రభుత్వం కీలక చర్యలు చేపడుతోంది. దీనిలో భాగంగా.. దేశ రక్షణలో అత్యంత కీలకమైన ‘ఖండాంతర క్షిపణి రక్షణ’ (బాలిస్టిక్ మిస్సైల్ డిఫెన్స్ - BMD) వ్యవస్థను హైదరాబాద్‌కు కూడా విస్తరించాలని కేంద్ర ప్రభుత్వం పరిశీలిస్తున్నట్లు సమాచారం. ఇది కేవలం దేశ భద్రతను పటిష్టం చేయడమే కాకుండా.. సాంకేతిక ఆవిష్కరణల రంగంలో హైదరాబాద్‌కు ఉన్న అగ్రస్థానాన్ని మరింత బలోపేతం చేస్తుంది.

హైదరాబాద్‌ను BMD వ్యవస్థ కిందకు తీసుకురావాలనే ఆలోచన వెనుక అనేక కారణాలు ఉన్నాయి. నగరం కేవలం ఐటీ కేంద్రంగానే కాకుండా, దేశ రక్షణ రంగానికి ఒక బలమైన పునాదిగా మారింది. ఇక్కడ డీఆర్‌డీవో (డిఫెన్స్ రీసెర్చ్ అండ్ డెవలప్‌మెంట్ ఆర్గనైజేషన్) తో పాటు పలు కీలక రక్షణ రంగ పరిశోధన సంస్థలు, అధునాతన ఆయుధ వ్యవస్థల తయారీ కేంద్రాలు ఉన్నాయి. అంతేకాకుండా.. ప్రైవేట్ రంగంలోని అనేక డిఫెన్స్, ఏరోస్పేస్ పరిశ్రమలకు కూడా హైదరాబాద్ ఒక ముఖ్యమైన కేంద్రంగా రూపుదిద్దుకుంది. ఈ రంగాల్లోని పరిశోధనలు, తయారీ యూనిట్లు హైదరాబాద్‌ను జాతీయ భద్రత దృష్ట్యా అత్యంత సున్నితమైన.. ముఖ్యమైన ప్రదేశంగా మార్చాయి. ఈ ప్రాధాన్యత దృష్ట్యానే BMD రక్షణను హైదరాబాద్‌కు కూడా కల్పించాలని కేంద్రం యోచిస్తోంది.

ముఖ్యంగా.. ఇటీవల పాకిస్థాన్‌తో జరిగిన యుద్ధం నేపథ్యంలో ఈ అంశంపై కేంద్రం మరింత గట్టి కసరత్తు చేస్తున్నట్లు తెలుస్తోంది. యుద్ధం సందర్భంగా హైదరాబాద్‌ను లక్ష్యంగా చేసుకుని పాకిస్థాన్ ఒక క్షిపణిని ప్రయోగించిందని.. అయితే మన సైన్యం ఆ క్షిపణిని సమర్థవంతంగా కూల్చివేసిందని అప్పట్లో వార్తలు కూడా వచ్చాయి. ఇలాంటి సంఘటనలు హైదరాబాద్‌కు సమగ్ర క్షిపణి రక్షణ వ్యవస్థ ఎంత అవసరమో చెబుతున్నాయి.

దేశ రాజకీయ, ఆర్థిక రాజధానులైన ఢిల్లీ, ముంబైలకు శత్రుదేశాల క్షిపణి దాడుల నుంచి పూర్తి రక్షణ కల్పించడమే లక్ష్యంగా BMD వ్యవస్థను డీఆర్‌డీవో స్వదేశీ పరిజ్ఞానంతో రూపొందించింది. ఖండాంతర క్షిపణులు, ముఖ్యంగా పాకిస్థాన్ షహీన్ దీర్ఘశ్రేణి క్షిపణులను అడ్డుకోవడానికి ఈ వ్యవస్థకు రూపకల్పన చేశారు. భారతదేశం రక్షణ వ్యూహంలో కీలకమైన ఆయుధంగా మారిన BMD తొలి దశ అమలుకు ఇప్పటికే సిద్ధంగా ఉంది.

పాకిస్థాన్‌తో ఇటీవలి యుద్ధం నేపథ్యంలో.. BMDని కేవలం ఢిల్లీ, ముంబైలకే పరిమితం చేయకుండా, దక్షిణాదిలోని కీలక నగరాలకూ విస్తరించాలని కేంద్రం యోచిస్తున్నట్లు సమాచారం. దక్షిణాదిలో హైదరాబాద్‌తోపాటు, బెంగళూరు కూడా పలు ప్రభుత్వ రక్షణ సంస్థలకు, వైమానిక రంగ పరిశోధన సంస్థలకు నిలయంగా ఉంది. మరోవైపు.. తమిళనాడు రాజధాని చెన్నై దేశ రక్షణ పరంగా వ్యూహాత్మక ప్రాంతం. ఈ నేపథ్యంలో హైదరాబాద్‌తోపాటు బెంగళూరు, చెన్నై మహానగరాలకూ BMDని విస్తరించే అవకాశాలు ఉన్నట్లు తెలుస్తోంది.

ఒకవేళ BMD వ్యవస్థ హైదరాబాద్‌కూ విస్తరిస్తే.. నగర రక్షణ మరింత పటిష్ఠమవుతుందని రక్షణ రంగ నిపుణులు భావిస్తున్నారు. ఇది హైదరాబాద్‌లోని ప్రజలకు, ఇక్కడ ఉన్న జాతీయ ప్రాముఖ్యత కలిగిన సంస్థలకు అదనపు భద్రతను అందిస్తుంది. సాంకేతికంగా.. ఆర్థికంగా వేగంగా అభివృద్ధి చెందుతున్న హైదరాబాద్‌ వంటి నగరాల భద్రత దేశ స్థిరత్వానికి, వృద్ధికి అత్యవసరం. క్షిపణి దాడుల నుంచి పూర్తి రక్షణ కల్పించడం ద్వారా, ఈ నగరాలు ఎలాంటి ఆందోళన లేకుండా తమ వృద్ధి పథంలో ముందుకు సాగడానికి అవకాశం లభిస్తుంది. భారతదేశం తన రక్షణ సామర్థ్యాలను నిరంతరం పెంచుకుంటూ, దేశంలోని కీలక ప్రాంతాలకు పూర్తి భద్రతను కల్పించడానికి కట్టుబడి ఉందని ఈ చర్యలు స్పష్టం చేస్తున్నాయి.