రూ.8 కోట్లు అప్పు చేసి పారిపోయిన ప్రిన్సిపల్..ఆ జూనియర్ కళాశాల మూసివేత

తెలంగాణ రాష్ట్రంలో విద్యారంగంలో తీవ్ర ఆందోళన కలిగించే సంఘటన చోటు చేసుకుంది. మంచిర్యాల పట్టణంలోని ప్రముఖ జూనియర్ కాలేజీ చైర్మన్ , కోట్లాది రూపాయల అప్పుల కుంపటిని రాజేసి రాత్రికి రాత్రే అదృశ్యమయ్యాడు. సుమారు రూ.8 కోట్ల మేర రుణాలను వివిధ వ్యక్తుల నుంచి సేకరించి, కాలేజీ కార్యకలాపాలను హఠాత్తుగా నిలిపివేసి, కుటుంబంతో సహా పరారైనట్లు తెలుస్తోంది. దీని కారణంగా ఆ కళాశాలలో చదువుకుంటున్న విద్యార్థులు ఆందోళన వ్యక్తం చేస్తున్నారు. వారి భవిష్యత్ ప్రస్తుతం అగమ్యగోచరంగా మారింది. వీరితో పాటు.. అప్పులు ఇచ్చినవారు తీవ్ర ఆందోళనలో మునిగిపోయారు.

చైర్మన్ పరారైన తర్వాత.. కాలేజీ భవనాన్ని కూడా మధ్యవర్తుల సాయంతో రహస్యంగా విక్రయించడానికి ప్రయత్నిస్తున్నట్లు ఆరోపణలు వస్తున్నాయి. విద్యార్థుల సర్టిఫికెట్లను తిరిగి ఇచ్చేందుకు కొందరు ఏజెంట్లను వారి ఇళ్లకు పంపించి, దానికి ప్రతిఫలంగా డబ్బులు వసూలు చేస్తున్నట్లు కూడా సమాచారం. ఈ విషయం తెలుసుకున్న పోలీసులు వెంటనే రంగంలోకి దిగి, ఆ ఏజెంట్లను అదుపులోకి తీసుకుని విచారిస్తున్నట్లు తెలుస్తోంది. కాలేజీ చైర్మన్ ఆచూకీని తెలుసుకోవడంతో పాటు, అతని ఆర్థిక లావాదేవీలు, అప్పుల వివరాలు, ఆస్తుల విక్రయాలపై పోలీసులు లోతుగా దృష్టి సారించారు.

ఈ ఘటనతో తమ పిల్లల భవిష్యత్తు ఏం అవుతుందోనని ఆందోళన చెందుతున్నారు విద్యార్థుల తల్లిదండ్రులు. వారి సర్టిఫికెట్లు తిరిగి రాబట్టడం, వాటిని ఉపయోగించి ఇతర కళాశాలల్లో ప్రవేశాలు కల్పించడం కోసం విద్యాశాఖ అధికారులపై తీవ్ర ఒత్తిడి తెస్తున్నారు. ఇన్-ఛార్జ్ డిఐఈఓ (జిల్లా ఇంటర్మీడియట్ ఎడ్యుకేషన్ ఆఫీసర్) అంజయ్య నాలుగు రోజుల క్రితం కాలేజీ భవనానికి నోటీసులు అంటించి, ఇంటర్ బోర్డుకు నివేదిక పంపినట్లు తెలిపారు.

కాలేజీ చైర్మన్ మోసపూరిత చర్యలపై చట్టపరమైన చర్యలు తీసుకుని, అతన్ని వెంటనే అరెస్టు చేయాలని బాధితులు డిమాండ్ చేస్తున్నారు. అప్పులు ఇచ్చిన వారు కూడా శనివారం పోలీసులను ఆశ్రయించి తమ గోడు వెళ్లబోసుకున్నారు. విద్యాశాఖ అధికారులు ఈ విషయంలో తక్షణమే జోక్యం చేసుకుని, విద్యార్థుల సర్టిఫికెట్లు భద్రంగా తిరిగి ఇప్పించి, వారికి ఇతర కాలేజీల్లో ప్రవేశాలు కల్పించేందుకు తగు చర్యలు తీసుకోవాలని విద్యార్థి సంఘాలు డిమాండ్ చేస్తున్నాయి.

విద్యార్థుల భవిష్యత్తుతో ఆడుకునే ఇలాంటి మోసపూరిత చర్యలను నిరోధించడానికి ప్రభుత్వం దీర్ఘకాలిక వ్యూహాలను రూపొందించాలి. విద్యారంగంలో ప్రైవేటు సంస్థల పాత్ర పెరుగుతున్న నేపథ్యంలో.. వాటి విశ్వసనీయతను కాపాడటం, విద్యార్థులకు ఎలాంటి నష్టం జరగకుండా చూడటం ప్రభుత్వ ప్రాథమిక బాధ్యత. ఈ ఘటనపై సమగ్ర దర్యాప్తు జరిపి.. బాధ్యులపై కఠిన చర్యలు తీసుకోవడం ద్వారానే ప్రజల్లో విశ్వాసం తిరిగి ఏర్పడుతుందని విద్యా నిపుణులు అభిప్రాయపడుతున్నారు.