ఇక రెండు నెలలు మాత్రమే..సర్పంచ్ ఎన్నికలపై హైకోర్ట్ కీలక వ్యాఖ్యలు

తెలంగాణ రాష్ట్రంలో ప్రజాస్వామ్యానికి ముఖ్య ఆధారం అయిన స్థానిక సంస్థల ఎన్నికల నిర్వహణపై కొనసాగుతున్న ఉత్కంఠకు త్వరలో తెరపడనుంది. ఈ కీలక అంశంపై తెలంగాణ హైకోర్టు సమగ్ర విచారణను చేపట్టి.. తుది తీర్పును రిజర్వులో ఉంచింది. ఈ పరిణామం రాష్ట్ర రాజకీయ, పరిపాలనా వర్గాల్లో విస్తృతంగా చర్చనీయాంశంగా మారింది. గ్రామ స్థాయి నుంచి పట్టణ స్థాయి వరకు స్థానిక సంస్థల పాత్ర ప్రజలకు ప్రభుత్వ పథకాలను చేరువ చేయడంలో, అభివృద్ధి కార్యక్రమాలను అమలు చేయడంలో అత్యంత కీలకంగా ఉంటాయి.

గ్రామీణ, పట్టణ ప్రాంతాల పాలనా వ్యవహారాల్లో స్థానిక సంస్థల ప్రాముఖ్యత అనేది ఎంతో ఉంటుంది. అయితే.. తెలంగాణలో ఈ ఎన్నికల నిర్వహణ సుదీర్ఘకాలంగా వాయిదా పడుతూ వస్తోంది. దాదాపు ఆరు నెలల విరామం తర్వాత.. స్థానిక సంస్థల ఎన్నికల నిర్వహణను కోరుతూ దాఖలైన పిటిషన్లపై హైకోర్టు నేడు విచారణ చేపట్టింది. గత ఫిబ్రవరిలోనే ఎన్నికలు నిర్వహిస్తామని ప్రభుత్వం హామీ ఇచ్చినప్పటికీ.. అవి ఎందుకు జరగలేదని న్యాయస్థానం ప్రభుత్వాన్ని సూటిగా ప్రశ్నించింది.

దీనికి బదులుగా.. రాష్ట్రంలో కుల గణన సర్వే ఇంకా పూర్తి కాలేదని.. దీనివల్ల రిజర్వేషన్ల ప్రక్రియలో జాప్యం జరుగుతుందని, కావునా ఎన్నికల నిర్వహణకు మరింత సమయం అవసరమని రాష్ట్ర ప్రభుత్వం కోర్టుకు విన్నవించుకుంది. ప్రజాస్వామ్య ప్రక్రియలో రిజర్వేషన్లు అత్యంత ముఖ్యమైనవని, అవి పూర్తి కాకుండా ఎన్నికలు నిర్వహించడం రాజ్యాంగబద్ధం కాదని ప్రభుత్వం తన వాదనను వినిపించింది. ఎన్ని రోజుల్లో ఎలక్షన్స్ నిర్వహిస్తారో చెప్పాలని హైకోర్టు ప్రశ్నించగా.. రాష్ట్ర ఎన్నికల సంఘం ఎన్నికల ప్రక్రియను పూర్తి చేయడానికి కనీసం 60 రోజుల సమయం కావాలని కోర్టును కోరింది.

మరోవైపు.. పిటిషనర్లు సైతం కోర్టు ఎదుట తమ వాదనలను బలంగా వినిపించారు. స్థానిక సంస్థల ప్రస్తుత పాలకవర్గాల పదవీకాలం ముగిసిన ఆరు నెలల్లోపే ఎన్నికలు పూర్తి చేయాలనే నిబంధనను ప్రభుత్వం పాటించలేదని వారు హైకోర్టు దృష్టికి తెచ్చారు. ఎన్నికలు వెంటనే నిర్వహించాలని, లేదా పాత సర్పంచ్‌లనే తాత్కాలికంగా కొనసాగించాలని వారు విజ్ఞప్తి చేశారు. స్థానిక సంస్థలు లేకపోవడం వల్ల నిధుల వినియోగం, అభివృద్ధి పనులకు తీవ్ర ఆటంకం కలుగుతోందని పిటిషనర్లు వాదించారు.

ఇరు పక్షాల వాదనలను విన్న ఉన్నత న్యాయస్థానం, స్థానిక సంస్థల ఎన్నికలపై తన తీర్పును రిజర్వు చేసింది. ఎన్నికల జాప్యం వల్ల గ్రామ పంచాయతీలు, మున్సిపాలిటీలు/కార్పొరేషన్లలో ప్రజాప్రతినిధులు లేకపోవడంతో.. ప్రభుత్వ నిధుల వినియోగం, కొత్త పథకాల అమలు, స్థానిక సమస్యల పరిష్కారం మందగిస్తుంది. ఇది గ్రామీణ, పట్టణ ప్రజల జీవన నాణ్యతపై ప్రత్యక్ష ప్రభావం చూపుతుంది. హైకోర్టు తీర్పు ఎప్పుడు వస్తుందనేది, దాని ప్రభావం రాష్ట్ర రాజకీయాలపై, ప్రజాస్వామ్య వికేంద్రీకరణపై ఎలా ఉంటుందనేది ఇప్పుడు సర్వత్రా ఆసక్తిని రేకెత్తిస్తోంది. ఈ తీర్పు స్థానిక సంస్థల భవిష్యత్తును, వాటి ద్వారా ప్రజలకు లభించే సేవలను ఎలా ప్రభావితం చేస్తుందో వేచి చూడాలి.