సున్నం చెరువుపై హైడ్రా కొరడా

హైదరాబాద్ నగరంలోని మాదాపూర్ ప్రాంతంలో ఉన్న సున్నం చెరువుపై ఉన్న ఆక్రమణలపై అధికారులు కొరడా ఝుళిపించారు. ఏళ్లుగా కొనసాగుతున్న ఆక్రమణలపై హైడ్రా అధికారులు సోమవారం ఉక్కుపాదం మోపారు. చెరువు భూమిలో అక్రమంగా వెలసిన నిర్మాణాలను కూల్చివేసి, చెరువును తమ ఆధీనంలోకి తీసుకున్నారు.దాదాపు 32 ఎకరాల విస్తీర్ణంలో ఉన్న సున్నం చెరువులో పెద్ద ఎత్తున ఆక్రమణలు జరిగినట్లు హైడ్రా అధికారులు గుర్తించారు. చెరువు పూర్తిస్థాయి నీటిమట్టం (ఎఫ్‌టీఎల్) పరిధిలో చట్టవిరుద్ధంగా నిర్మించిన అనేక గుడిసెలను, ఇతర నిర్మాణాలను జేసీబీల సహాయంతో తొలగించారు. ఈ సందర్భంగా చెరువు సమీపంలో అక్రమంగా ఏర్పాటు చేసిన బోరు మోటార్లను కూడా తొలగించారు.ఈ ప్రాంతంలో కొన్నేళ్లుగా భారీ స్థాయిలో అక్రమ నీటి వ్యాపారం జరుగుతున్నట్లు అధికారుల దృష్టికి వచ్చింది. కొందరు వ్యక్తులు అక్రమంగా బోర్లు వేసి, చెరువు పరిధిలోని భూగర్భ జలాలను తోడేసి వాటర్ ట్యాంకర్ల ద్వారా విక్రయిస్తూ సొమ్ము చేసుకుంటున్నారు. ఈ దందాకు అడ్డుకట్ట వేసేందుకు అధికారులు రంగంలోకి దిగారు. అక్రమంగా నీటిని తరలిస్తున్న పలు వాటర్ ట్యాంకర్లను సీజ్ చేశారు. చెరువు పరిధిలోని భూగర్భ జలాలను ఎట్టి పరిస్థితుల్లోనూ వినియోగించవద్దని అధికారులు స్పష్టమైన ఆదేశాలు జారీ చేశారు.కాగా, సున్నం చెరువును పర్యాటకంగా అభివృద్ధి చేసి, పూర్వ వైభవం తీసుకురావాలని ప్రభుత్వం నిర్ణయించింది. దీనిలో భాగంగా రూ.10 కోట్ల నిధులతో చెరువు అభివృద్ధి పనులను హైడ్రా చేపట్టింది. ఈ అభివృద్ధి ప్రణాళికలో భాగంగానే ప్రస్తుతం ఆక్రమణల తొలగింపు కార్యక్రమాన్ని ముమ్మరంగా నిర్వహిస్తున్నట్లు అధికారులు తెలిపారు.