హైదరాబాద్‌లో దంచికొడుతున్న వాన, నగరవాసులకు హెచ్చరిక

హైదరాబాద్ మహానగరంలో వర్షం దంచికొడుతోంది. ఇవాళ సాయంత్రం నుంచే భారీ వర్షం కురుస్తోంది. పలు ప్రాంతాల్లో ఉరుములు, మెరుపులు, బలమైన ఈదురు గాలులతో కూడిన వర్షం బీభత్సం సృష్టిస్తోంది. ప్రధానంగా జూబ్లీహిల్స్, బంజారాహిల్స్, ఖైరతాబాద్, వెంకటగిరి, కూకట్‌పల్లి, అమీర్‌పేట్, పంజాగుట్ట, యూసుఫ్‌గూడ, గచ్చిబౌలి, గోల్కొండ, మియాపూర్, మెహిదీపట్నం, మాదాపూర్ వంటి పలు కీలక ప్రాంతాల్లో వర్షం జోరుగా కురుస్తోంది. వర్షం కారణంగా లోతట్టు ప్రాంతాలు జలమయం అయ్యాయి. రోడ్లపై నీరు నిలవడంతో ట్రాఫిక్ జామ్‌ ఏర్పడింది. కొన్నిచోట్ల విద్యుత్ సరఫరాకు అంతరాయం ఏర్పడింది. దీంతో జీహెచ్ఎంసీ అధికారులు హెచ్చరికలు జారీ చేశారు. అత్యవసరం అయితేనే ఇళ్ల నుంచి బయటకు రావాలని సూచించారు.

హైదరాబాద్‌తో పాటు తెలంగాణలోని మరికొన్ని జిల్లాల్లో కూడా వర్షాలు కురుస్తున్నాయి. ఆదిలాబాద్, నిర్మల్, నారాయణపేట జిల్లాల్లోనూ మోస్తరు నుంచి భారీ వర్షాలు కురుస్తున్నట్లు హైదరాబాద్ వాతావరణ శాఖ తెలిపింది. బంగాళాఖాతంలో ఏర్పడిన అల్పపీడనం ప్రభావంతో రానున్న 24 గంటల్లో తెలంగాణలోని పలు జిల్లాల్లో భారీ నుంచి అతి భారీ వర్షాలు కురిసే అవకాశం ఉందని వాతావరణ శాఖ హెచ్చరించింది. ప్రజలు అప్రమత్తంగా ఉండాలని, అవసరమైతే తప్ప బయటకు రావద్దని సూచించారు. లోతట్టు ప్రాంతాల ప్రజలు తగిన జాగ్రత్తలు తీసుకోవాలని, విద్యుత్ స్తంభాలు, తెగిపడిన విద్యుత్ తీగల పట్ల జాగ్రత్తగా ఉండాలని అధికారులు హెచ్చరించారు.

తెలంగాణ రాష్ట్రంలో ప్రస్తుత వానాకాలం (ఖరీఫ్) సీజన్‌లో లోటు వర్షపాతం నమోదవుతోంది. ఇది రైతులను ఆందోళనకు గురిచేస్తోంది. నైరుతి రుతుపవనాలు సాధారణం కంటే ముందుగానే రాష్ట్రంలోకి ప్రవేశించినప్పటికీ, ఆశించిన స్థాయిలో వర్షాలు కురవడం లేదు. ఈ సీజన్ మొదటి వారంలోనే రాష్ట్రంలో79 మి.మీ లోటు వర్షపాతం నమోదైంది. జూన్ 1 నుంచి 27 వరకు రాష్ట్రవ్యాప్తంగా 253 మండలాల్లో లోటు వర్షపాతం నెలకొంది. రుతుపవనాలు ముందుగా వచ్చాయని భావించి విత్తనాలు వేసిన రైతులు వర్షాలు లేక ఆందోళన చెందుతున్నారు. పొడి వాతావరణం, వరి, ఇతర పంటల సాగును ఆలస్యం చేస్తున్నాయి. ఈ నెలలో రెండు వారాలకు పైగా కొనసాగిన పొడి వాతావరణం వ్యవసాయ కార్యకలాపాలను తీవ్రంగా దెబ్బతీసింది. ప్రస్తుతం వర్షాలు కురుస్తుండగా.. రైతులు హర్షం వ్యక్తం చేస్తున్నారు.