డీకే అరుణకు బీజేపీలో మరో కీలక పదవి

మహబూబ్‌నగర్ బీజేపీ ఎంపీ డీకే అరుణకు పార్టీలో మరో కీలక పదవి దక్కింది. ఇప్పటికే ఆమె ఫుడ్ కార్పొరేషన్ తెలంగాణ ఛైర్మన్‌గా వ్యవహరిస్తున్నారు. తాజాగా పార్టీ పరంగా మరో కీలక పదవి దక్కింది. బీజేపీ జాతీయ కౌన్సిల్ సభ్యులుగా డీకే అరుణ నియమితులయ్యారు. ఆమెతో పాటుగా ప్రస్తుత రాష్ట్ర కార్యవర్గ సభ్యురాలు జి. పద్మజారెడ్డి బీజేపీ జాతీయ కౌన్సిల్ సభ్యులుగా నియమితులయ్యారు.

ఈ నియామకాలను హైదరాబాద్‌లో మంగళవారం జరిగిన రాష్ట్ర సమావేశంలో ఎన్నికల కన్వీనర్ యెండల లక్ష్మీనారాయణ ప్రకటించారు. ఈ పదవులలో వారు మూడేళ్ల పాటు కొనసాగుతారు. డీకే అరుణ ఇప్పటికే బీజేపీలో కీలక బాధ్యతలు నిర్వర్తిస్తున్నారు. ఆమె ప్రస్తుతం పార్టీ జాతీయ ఉపాధ్యక్షురాలిగా, ఫుడ్ కార్పొరేషన్ తెలంగాణ ఛైర్మన్‌గా వ్యవహరిస్తున్నారు. ఆమె జాతీయ కౌన్సిల్‌కు ఎంపిక కావడం ద్వారా పార్టీలో ఆమె ప్రాధాన్యత మరింత పెరిగింది.

జి. పద్మజారెడ్డి మహబూబ్‌నగర్ జిల్లాకు చెందిన సీనియర్ బీజేపీ నాయకురాలు. ఆమె కార్యకర్త స్థాయి నుండి అంచెలంచెలుగా ఎదిగారు. ఆమె గతంలో 2014-16 వరకు మహిళా మోర్చా రాష్ట్ర అధ్యక్షురాలిగా, మహిళా మోర్చా జాతీయ కార్యదర్శిగా, 2016-19 వరకు పార్టీ జిల్లా అధ్యక్షురాలిగా పనిచేశారు. ఎన్నికల విషయానికి వస్తే ఆమె 1994లో కొల్లాపూర్, 2009, 2018లో మహబూబ్‌నగర్ అసెంబ్లీ స్థానం నుండి బీజేపీ తరఫున పోటీ చేసి ఓటమి పాలయ్యారు. ఆమెకు లభించిన ఈ జాతీయ స్థాయి పదవి జిల్లాలోని పార్టీ శ్రేణుల్లో ఉత్సాహాన్ని నింపింది.

మహబూబ్‌నగర్ జిల్లా నేతలకు జాతీయ స్థాయిలో పదవులు లభించడంపై పార్టీ జిల్లా అధ్యక్ష, ప్రధాన కార్యదర్శులు పి.శ్రీనివాస్‌రెడ్డి, రమేశ్‌కుమార్, కిరణ్‌కుమార్‌రెడ్డి, ఇతర నాయకులు హర్షం వ్యక్తం చేశారు. ఈ నియామకాలు తెలంగాణలో పార్టీని మరింత బలోపేతం చేస్తాయని వారు ఆశాభావం వ్యక్తం చేశారు. ఇక తెలంగాణ బీజేపీ నూతన అధ్యక్షుడిగా మాజీ ఎమ్మెల్సీ, సీనియర్ నేత ఎన్. రాంచందర్‌రావు నియమితులైన సంగతి తెలిసిందే. అధ్యక్ష పదవికి ఆయన ఒక్కరే నామినేషన్ వేయటంతో ఆయన ఎన్నిక ఏకగ్రీవం అయింది. మంగళవారం అధ్యక్షుడిగా ఆయన బాధ్యతలు సైతం స్వీకరించారు.