తెలంగాణలో కవులు, కళాకారులకు కూడా పింఛన్లు

తెలంగాణ రాష్ట్రంలోని అర్హులైన కళాకారులను ఆదుకునేందుకు ప్రభుత్వం కట్టుబడి ఉందని ప‌ర్యాట‌క‌, సాంస్కృతిక శాఖ మంత్రి జూపల్లి కృష్ణారావు భరోసా ఇచ్చారు. ప్రాచీన సంస్కృతి, సంప్రదాయాలకు తమ కళారూపాలతో జీవం పోస్తూ.. వాటిని భావితరాలకు అందిస్తున్న వృద్ధ కళాకారులకు ప్రభుత్వం అన్ని విధాలా తోడుగా ఉంటుందని ఆయన స్పష్టం చేశారు. రాష్ట్రంలోని కళాకారుల సమస్యల పరిష్కారానికి తన పూర్తి కృషిని అందిస్తానని జూప‌ల్లి తెలిపారు. శనివారం రవీంద్రభార‌తిలో మాజీ ఎమ్మెల్యే మృత్యుంజ‌యం ఆధ్వర్యంలో పలువురు కళాకారులు మంత్రి జూపల్లిని కలిసి తమ సమస్యలను వివరించారు.

అర్హులైన వృద్ధ కళాకారులకు పెన్షన్లు మంజూరు చేయాలని, వారికి ఆరోగ్య బీమా సదుపాయం కల్పించాలని, ప్రత్యేక హెల్త్ కార్డులు అందించాలని, గుర్తింపు కార్డులు జారీ చేయాలని వారు మంత్రికి విజ్ఞప్తి చేశారు. వారి విజ్ఞప్తులను సావధానంగా విన్న మంత్రి జూపల్లి, అర్హులైన వృద్ధ కళాకారులందరికీ పెన్షన్‌ ఇచ్చే అంశాన్ని ప్రభుత్వం ప‌రిశీలిస్తోందని అన్నారు. దీనిపై ముఖ్యమంత్రితో సమగ్రంగా చర్చించి తుది నిర్ణయం తీసుకుంటామని ఆయన వెల్లడించారు.

తెలంగాణ రాష్ట్ర సాధన ఉద్యమంలో కవులు, కళాకారుల పాత్ర ఎనలేనిదని.. వారి త్యాగాలు మరువలేనివని మంత్రి గుర్తుచేసుకున్నారు. అలాంటి కళాకారులకు ప్రభుత్వం ఎల్లప్పుడూ అండగా ఉంటుందని.. వారి సంక్షేమానికి అవసరమైన అన్ని చర్యలు తీసుకుంటుందని ఆయన పునరుద్ఘాటించారు. కళా రంగానికి, కళాకారులకు ప్రభుత్వం ఎప్పుడూ ప్రాధాన్యతను ఇస్తుందన్నారు. ఈ చర్యల ద్వారా తెలంగాణ కళా వారసత్వాన్ని కాపాడటంతో పాటు.. కళాకారులకు సామాజిక భద్రత కల్పించడం ప్రభుత్వ లక్ష్యంగా చెప్పుకోవచ్చు.

తెలంగాణ రాష్ట్రంలో కళాకారుల జీవితాలు తరచుగా ఆర్థిక ఇబ్బందులు, సామాజిక అభద్రతతో కూడుకున్నవి. ప్రభుత్వాల మద్దతు లేకపోవడం, సరైన గుర్తింపు లేకపోవడం వంటి అనేక కారణాల వల్ల కళాకారులు ముఖ్యంగా వృద్ధ కళాకారులు కనీస అవసరాల కోసం కూడా ఇబ్బందులు పడుతున్నారు. ప్రస్తుత మంత్రి హామీతో వారి కష్టాలు తీరనున్నాయి.

చాలా మంది కళాకారులు అనధికారిక రంగంలో పనిచేస్తుంటారు. వారికి సరైన రికార్డులు, గుర్తింపు కార్డులు లేకపోవడం వల్ల ప్రభుత్వ సంక్షేమ పథకాలకు అర్హత సాధించడంలో సమస్యలు ఎదురవుతాయి. ఎవరు నిజమైన కళాకారుడు, ఎవరు కాదో నిర్ధారించడం ప్రభుత్వానికి ఒక సవాలుగా మారుతుంది. అందుకే కళాకారులకు పింఛన్లు ఇవ్వకపోవడానికి ఇదొక కారణం అయి ఉండొచ్చు. తెలంగాణ ఏర్పడిన సమయంలో కళాకారులను ఆదుకుంటామని చెప్పి.. ఇప్పటి వరకు వారికి ఎలాంటి ఆర్థిక భరోసా ఇవ్వలేదు.

కళాకారులకు పెన్షన్లు, ఆరోగ్య బీమా వంటి పథకాలు అమలు చేయడానికి గణనీయమైన నిధులు అవసరం. రాష్ట్ర బడ్జెట్‌లో కళా, సాంస్కృతిక రంగానికి కేటాయింపులు తక్కువగా ఉండటం కూడా ఒక ప్రధాన సమస్యగా మారింది. అయితే మంత్రి మాత్రం ఈ సారి కళాకారులకు పింఛన్లు మంజూరు చేయించే బాధ్యత తనదంటూ హామీ ఇవ్వడం హర్షించదగిన విషయమనే చెప్పాలి. గతంలో అర్హులైన కళాకారులకు రూ.6 వేలు పింఛన్ అందిస్తామని హామీ ఇచ్చిన విషయం తెలసిందే.