రాజాసింగ్‌కు షాకిచ్చిన బీజేపీ.. రాజీనామాకు ఆమోదం

గత కొన్నిరోజులుగా పార్టీకి వ్యతిరేకంగా వ్యాఖ్యలు చేస్తూ వివాదాల్లో నిలుస్తున్న గోషామహల్ ఎమ్మెల్యే రాజాసింగ్‌కు బీజేపీ హైకమాండ్ భారీ షాకిచ్చింది. ఆయన రాజీనామాను ఆమోదించింది. ఈ నిర్ణయం రాజకీయ వర్గాల్లో సంచలనంగా మారింది. గోషామహల్ ఎమ్మెల్యే అయిన రాజాసింగ్ గత కొంత కాలంగా పార్టీ వ్యతిరేక వ్యాఖ్యలు చేస్తున్నారు. తెలంగాణ బీజేపీ ఎన్నికలపై అసంతృప్తి వ్యక్తం చేయడం మాత్రమే కాక.. బహిరంగ విమర్శలు చేశారు.

అంతటితో ఆగక ఆయనే స్వయంగా అధ్యక్ష ఎన్నికల్లో పోటీ చేయడానికి రెడీ అయ్యారు. తన వివాదాస్పద నిర్ణయాలతో పార్టీని ఇరుకున పెడుతూ వస్తోన్న రాజాసింగ్.. కొన్ని రోజుల క్రితం బీజేపీకి రాజీనామా చేశారు. తెలంగాణ బీజేపీలో చోటు చేసుకుంటున్న పరిణామాలకు నిరసనగా తాను ఈనిర్ణయం తీసుకుంటున్నట్లు ప్రకటించారు.

ఈ క్రమంలో రాజాసింగ్ నిర్ణయాన్ని బీజేపీ అధిష్టానం ఆమోదించింది. ఆయన రాజీనామాను ఆమోదిస్తున్నట్లుగా శుక్రవారం నాడు అనగా జులై 11 నాడు బీజేపీ జాతీయ కార్యదర్శి అరుణ్ సింగ్ అధికారిక ప్రకటన చేశారు. రాజాసింగ్ సమర్పించిన లేఖలోని అంశాలు పార్టీ పని విధానం, సిద్ధాంతాలకు విరుద్ధంగా ఉన్నాయని అరుణ్ సింగ్ తెలిపారు. అలానే రాజాసింగ్ లేవనేత్తిన అంశాలు అసంబద్ధంగా ఉన్నాయన్నారు. దీంతో బీజేపీ జాతీయాధ్యక్షుడు జేపీ నడ్డా సూచనతో రాజాసింగ్ రాజీనామాను ఆమోదిస్తున్నట్లు అరుణ్ సింగ్ ప్రకటించారు.

రాజాసింగ్.. ఇటీవలే కేంద్ర మంత్రి కిషన్ రెడ్డికి రాజీనామా లేఖను సమర్పించారు. కిషన్ రెడ్డి.. దీన్ని పార్టీ హైకమాండ్‌కి పంపించారు. ఈ క్రమంలో నేడు అధిష్టానం రాజాసింగ్ రాజీనామా లేఖను ఆమోదిస్తూ నిర్ణయం తీసుకుంది. రాజాసింగ్ గత కొంతకాలంగా రాష్ట్ర బీజేపీ అధిష్టానంపై వివాదాస్పద వ్యాఖ్యలు చేస్తూ వస్తున్నారు. ఈ క్రమంలో తాజాగా బీజేపీ రాష్ట్ర అధ్యక్షుడిగా రామచంద్రరావును ఎంపిక చేయడానికి వ్యతిరేకిస్తూ రాజాసింగ్ రాజీనామా చేశారు.

రాజాసింగ్ మాట్లాడుతూ.. తాను బీజేపీ తెలంగాణ అధ్యక్ష పదవికి నామినేషన్ వేయడానికి వచ్చానని.. కానీ తన అనుచరులను కొందరు బెదిరించారంటూ రాజాసింగ్ అసహనం వ్యక్తం చేశారు. బీజేపీ తెలంగాణ అధ్యక్ష పదవి కోసం ఆయనకు మద్దతుగా ముగ్గురు కౌన్సిల్ నంబర్లు సంతకాలు పెట్టారని.. కానీ వాళ్లను కూడా బెదిరించారన్నారు. అధ్యక్షుడిని ఎప్పుడో సెలక్ట్ చేశారని.. ఇప్పుడు జరిపిన ఎన్నికలు కేవలం నామమాత్రమే అని రాజాసింగ్ ఆరోపించారు.

తెలంగాణ రాష్ట్రంలో బీజేపీ పార్టీ అధికారంలోకి రావొద్దని కోరుకునే వారి సంఖ్య రోజు రోజుకూ పెరుగుతుందన్నారు. పార్టీ విధానాలతో తాను విసిగిపోయానని.. అందుకే రాజీనామా చేస్తున్నాని.. మీకో దండం.. మీ పార్టీకో దండం అంటూ రాజాసింగ్ తీవ్ర అసంతృప్తి వ్యక్తం చేశారు. దీంతో అధిష్టానం కూడా ఆయన రాజీనామాను ఆమోదించింది.