ఆక్రమణల తొలగింపు.. కూక‌ట్‌ప‌ల్లి, చింత‌ల‌బ‌స్తీలో నాలాల విస్త‌ర‌ణ‌

రేవంత్ సర్కార్ తీసుకువచ్చిన హైడ్రా వ్యవస్థ ఆక్రమణలు, అక్రమ నిర్మాణాల అంశంలో దూకుడుగా వ్యవహరిస్తోంది. సమస్య తమ దృష్టికి వచ్చిన వెంటనే రంగంలోకి దిగి.. పరిష్కారం దిశగా చర్యలు తీసుకుంటుంది. ఈక్రమంలో తాజాగా హైడ్రా హైదరాబాద్ న‌గ‌రంలో నాలాల ఆక్ర‌మ‌ణ‌ల‌ను తొల‌గించ‌డంపై దృష్టి పెట్టింది. దీనిలో భాగంగా శుక్ర‌వారం నగరంలోని కూక‌ట్‌ప‌ల్లి, ఖైర‌తాబాద్ ప‌రిస‌రాల్లోని నాలాల ఆక్ర‌మ‌ణ‌ల‌ను తొల‌గించింది. నాలాల ఆక్ర‌మ‌ణ‌ల వ‌ల్ల కాల‌నీలు, బ‌స్తీలు నీట మునగకుండా చూడాల‌ని స్థానికుల నుంచి ఫిర్యాదులు రావడంతో.. హైడ్రా క‌మిష‌న‌ర్ ఏవీ రంగ‌నాథ్‌ సంబంధిత అధికారులతో కలిసి ఇటీవ‌ల క్షేత్ర‌స్థాయిలో ప‌రిశీలించారు. ఐడీఎల్ నాలాతో పాటు.. బుల్కాపూర్ నాలా ఆక్ర‌మ‌ణ‌ల‌ను తొల‌గించాల‌ని ఆదేశించారు. ఈ క్రమంలో శుక్రవారం నాడు హైడ్రా రంగంలోకి దిగింది. ఈ రెండు నాలాల ఆక్ర‌మ‌ణ‌ల‌ను తొల‌గించే ప‌నులు ప్రారంభించింది.

బుల్కాపూర్ నాలా ఆక్ర‌మ‌ణ‌ల తొల‌గింపు..

నాలా ఆక్రమణల తొలగింపు చర్యల్లో భాగంగా.. శుక్రవారం నాడు హైడ్రా తుమ్మ‌ల‌బ‌స్తీ ప‌రిస‌రాల్లోని బుల్కాపూర్ నాలా ఆక్ర‌మ‌ణ‌ల‌ను తొల‌గించింది. రంగారెడ్డి జిల్లా శంక‌ర‌ప‌ల్లిలోని బుల్కాపూర్ చెరువు నుంచి మొద‌లైన ఈ నాలా హైద‌ర‌బాద్‌లోని చింత‌ల‌బ‌స్తీ, తుమ్మ‌ల‌బ‌స్తీ మీదుగా ఖైర‌తాబాద్ చౌర‌స్తా మీదుగా హుస్సేన్‌ సాగ‌ర్‌లో క‌లుస్తుంది. అయితే ఈ నాలా చాలా చోట్ల ఆక్ర‌మ‌ణ‌ల‌కు గురైంది. దీంతో వ‌ర్షాలు ప‌డిన‌ప్పుడు.. వ‌ర‌ద సాఫీగా సాగ‌క తుమ్మ‌ల‌బ‌స్తీతో పాటు.. అటు ఆనంద‌న‌గ‌ర్ కాల‌నీల్లోకి మురుగు నీరు పోటెత్త‌తుందని స్థానికులు హైడ్రాకు ఫిర్యాదు చేశారు.

ఈ క్రమంలో శ్రీ‌ధ‌ర్ ఫంక్ష‌న్ హాల్ య‌జ‌మానులు నాలాలో నిర్మించిన ప్ర‌హ‌రీని హైడ్రా తొల‌గించింది. పై భాగంలో కూడా కొంత‌మేర ఆక్ర‌మ‌ణ జ‌ర‌గ‌గా.. అక్క‌డ నివాసితులు త‌మ‌కు తాము తొల‌గిస్తామ‌ని హామీ ఇవ్వ‌డంతో వారికి కొన్ని రోజులు సమయం ఇచ్చింది. అలానే ఖైర‌తాబాద్ చౌర‌స్తా వ‌ద్ద క‌ల్వ‌ర్టుకు ముందు పేరుకుపోయిన ధ‌ర్మాకోల్ వ్య‌ర్థాల‌ను కూడా హైడ్రా తొల‌గించింది. దీంతో వ‌ర‌ద సాఫీగా సాగేందుకు మార్గం ఏర్ప‌డింది.

కూకట్‌పల్లిలో నాలా ఆక్ర‌మ‌ణ‌లు తొలగింపు..

కూక‌ట్‌ప‌ల్లిలోని ఐడీఎల్ చెరువు నుంచి మొద‌లైన నాలా వెడ‌ల్పు 7 మీట‌ర్లుండాల్సి ఉండ‌గా.. చాలా చోట్ల 2 మీట‌ర్ల‌కే ప‌రిమిత‌మైంది. ఈ నేప‌థ్యంలో నాలాకు ఆనుకుని ఆక్ర‌మ‌ణ‌ల‌కు పాల్ప‌డిన ఎన్ఆర్సీ, ఎన్‌కేఎన్ ఆర్ ఫంక్ష‌న్ హాళ్ల నిర్వాహ‌కులు 3 మీట‌ర్ల‌కు పైగా జ‌రిపిన ఆక్ర‌మ‌ణ‌ల‌ను హైడ్రా తొల‌గించింది. ఈ రెండు ఫంక్ష‌న్ హాళ్ల పొడుగునా 50-70 మీట‌ర్ల‌ మేర ఆక్ర‌మ‌ణ‌ల‌ను తొల‌గించి వ‌ర‌ద నీరు సాఫీగా సాగేందుకు చ‌ర్య‌లు తీసుకుంది.

ఐడీఎల్ చెరువు నుంచి మొద‌లైన ఈ నాలా మూసాపేట మెట్రోస్టేష‌న్ దాటి కూక‌ట్‌ప‌ల్లి నాలాలో క‌లుస్తుంది. ఇలా 2 కిలోమీట‌ర్ల మేర ప‌లుచోట్ల ఆక్ర‌మ‌ణ‌ల‌ను హైడ్రా తొల‌గించే ప‌నులు ప్రారంభించింది. మూసాపేట మెట్రో స్టేష‌న్‌కు ఆనుకుని ఉన్న శివ‌శ‌క్తి న‌గ‌ర్ ద‌గ్గ‌ర నాలా కేవ‌ల‌వం మీట‌రున్న‌ర‌కు కుంచించుకుపోవ‌డంతో అక్క‌డ ఆక్ర‌మ‌ణ‌ల తొల‌గింపునకు చ‌ర్య‌లు తీసుకుంది.