దంచికొట్టిన వర్షం.. కొట్టుకుపోయిన ద్విచక్ర వాహనాలు

హైదరాబాద్ నగరాన్ని ఇటీవల కురుస్తున్న భారీ వర్షాలు అతలాకుతలం చేస్తున్నాయి. శుక్రవారం మధ్యాహ్నం నుంచి కురిసిన కుండపోత వాన నగరవాసులకు తీవ్ర ఇబ్బందులు కలిగించింది. ఈ నేపథ్యంలో.. అధికారులు ప్రజలకు హైడ్రా హెచ్చరికలు జారీ చేశారు. అత్యవసరమైతే తప్ప బయటకు రావద్దని.. లోతట్టు ప్రాంతాల ప్రజలు అప్రమత్తంగా ఉండాలని సూచించారు.

నగరంలో ముఖ్యంగా షేక్‌పేట్, ఖాజాగూడ, రాయదుర్గం, గచ్చిబౌలి, కొండాపూర్, హఫీజ్‌పేట్, మాదాపూర్, మియాపూర్ వంటి ప్రాంతాల్లో భారీ వర్షపాతం నమోదైంది. ఈ ప్రాంతాలన్నీ ఐటీ కారిడార్‌కు చెందినవి కావడంతో, ఆఫీసుల నుంచి ఇళ్లకు వెళ్లే సమయంలో ట్రాఫిక్ సమస్య తీవ్రమైంది. రోడ్లపై ఎక్కడికక్కడ వర్షపు నీరు నిలిచిపోవడంతో వాహనదారులు తీవ్ర ఇబ్బందులు పడ్డారు. రాయదుర్గం-షేక్‌పేట్ మార్గంలో 3 కిలోమీటర్ల మేర వాహనాలు నిలిచిపోయాయి. మెహదీ పట్నం నుంచి ఆరంఘర్ వెళ్లే రూట్లో 4 కి.మీ మేర ట్రాఫిక్ జామ్ అయింది. దీంతో పాటు.. రాయదుర్గం, బయోడైవర్సిటీ, ఐకియా జంక్షన్ల వద్ద కూడా భారీగా ట్రాఫిక్ జామ్ అయింది. కొన్ని రోడ్లు నాలాలను తలపించాయి. ఐటీ కారిడార్ రోడ్లు 'స్విమ్మింగ్ పూల్స్'ను పోలి ఉన్నాయని వాహనదారులు అసహనం వ్యక్తం చేశారు. తెలుగు తల్లి ఫ్లైఓవర్ వద్ద భారీ స్థాయిలో వర్షపు నీరు నిలిచిపోవడంతో వాహనదాదరులకు తీవ్ర ఇబ్బందులు పడుతున్నారు.

అంతే కాకుండా.. గచ్చిబౌలి పీజేఆర్ ఫ్లైఓవర్‌పై భారీ ట్రాఫిక్ జామ్ కాగా, ఏఎంబీ మాల్ ముందు వర్షపు నీరు భారీగా నిలిచిపోయింది. హఫీజ్‌పేట్, అల్విన్ కాలనీ, చందానగర్, హైటెక్ సిటీ, కేపీహెచ్‌బీ మార్గాల్లోనూ ఇదే పరిస్థితి కనిపించింది. టోలిచౌకి-మెహదీపట్నం మార్గంలోనూ భారీ ట్రాఫిక్ జామ్ కావడంతో, కిలోమీటరు దూరం ప్రయాణించడానికి గంటకు పైగా సమయం పట్టింది. టోలిచౌకి నానల్‌నగర్ జంక్షన్ వద్ద నాలా పొంగిపొర్లడంతో, కొన్ని వాహనాలు వరద నీటి ప్రవాహంలో కొట్టుకుపోవడం లేదా మునిగిపోవడం జరిగింది. వరద ప్రవాహానికి పలు వాహనాలు ఎక్కడికక్కడ నిలిచిపోయాయి.

జీహెచ్‌ఎంసీ హెచ్చరికలు..

గ్రేటర్ హైదరాబాద్ పరిధిలో సగటున 7.5 సెంటీమీటర్ల వర్షపాతం నమోదైనట్లు అధికారులు తెలిపారు. అత్యధికంగా కంట్మోన్మెంట్ లో 11 సెం.మీ వర్షం నమోదైనట్లు అధికారులు తెలిపారు. మరో రెండు గంటలపాటు నగరవ్యాప్తంగా వర్షాలు కురుస్తాయని సమాచారం అందుతోంది. లోతట్టు ప్రాంతాల ప్రజలు అప్రమత్తంగా ఉండాలని జీహెచ్‌ఎంసీ (గ్రేటర్ హైదరాబాద్ మున్సిపల్ కార్పొరేషన్) హెచ్చరికలు జారీ చేసింది.

అత్యవసర సేవల కోసం 100 లేదా జీహెచ్‌ఎంసీ కంట్రోల్ రూమ్ నంబర్ 040-21111111కు ఫోన్ చేయాలని సూచించారు. నగరంలో డ్రైనేజీ వ్యవస్థల సామర్థ్యం, నాలాల ఆక్రమణలు, అక్రమ నిర్మాణాల కారణంగా చిన్నపాటి వర్షాలకే వరదలు వస్తున్నాయని నిపుణులు అభిప్రాయపడుతున్నారు. భవిష్యత్తులో ఇలాంటి పరిస్థితులను నివారించడానికి పటిష్టమైన ప్రణాళికలు అవసరం.