స్మార్ట్‌ఫోన్ యూజర్లకు అలర్ట్.. అలాంటి మెసేజ్‌లు క్లిక్‌ చేయొద్దు

సైబర్ నేరగాళ్లు రెచ్చిపోతున్నారు. ఈజీ మనీకి అలవాటుపడి రోజుకో కొత్త పంథాలో ప్రజలను మోసం చేయడానికి ప్రయత్నిస్తున్నారు. తాజాగా.. 'ఆర్‌టీవో ట్రాఫిక్‌ చలానా.ఏపీకే'  పేరుతో వాట్సప్ మెసేజ్‌లను పంపిస్తున్నారని.. వీటి విషయంలో ప్రజలు అత్యంత అప్రమత్తంగా ఉండాలని తెలంగాణ సైబర్ సెక్యూరిటీ బ్యూరో (TGCSB) శనివారం ఒక ప్రకటనలో హెచ్చరించింది. సైబర్ మోసగాళ్లు ఈ APK ఫైల్స్‌ను లింక్‌ల రూపంలో వాట్సప్ నంబర్లకు ముఖ్యంగా సాయంత్రం వేళల్లో పంపిస్తున్నట్లు TGCSB దృష్టికి వచ్చింది. ఇలాంటి సందేశాలను ఎట్టి పరిస్థితుల్లోనూ నమ్మవద్దని, అందులోని లింక్‌లను అస్సలు క్లిక్ చేయవద్దని బ్యూరో స్పష్టం చేసింది. ఈ లింక్‌లపై క్లిక్ చేస్తే బాధితుల క్రెడిట్‌కార్డు, బ్యాంక్ ఖాతాల నుంచి డబ్బులు కాజేసే ప్రమాదం ఉందని తీవ్రంగా హెచ్చరించింది.

సైబర్ మోసాలు ఎలా జరుగుతాయి?

ఈ రకమైన మోసంలో నేరగాళ్లు నకిలీ APK ఫైళ్లను పంపి, బాధితులు వాటిని ఇన్‌స్టాల్ చేసుకునేలా ప్రేరేపిస్తారు. 'మీకు ట్రాఫిక్ చలానా ఉంది, వివరాల కోసం ఈ లింక్‌ను క్లిక్ చేయండి' వంటి సందేశంతో ఒక అనుమానాస్పద లింక్ వస్తుంది. బాధితుడు ఆ లింక్‌ను క్లిక్ చేయగానే, ఒక నకిలీ యాప్ డౌన్‌లోడ్ అవుతుంది. అది 'RTO Traffic Challan' లాంటి అసలైన యాప్ లాగే కనిపిస్తుంది. యాప్ ఇన్‌స్టాల్ అయిన తర్వాత, అది యూజర్ నుంచి అనేక అనుమతులను (ఉదా: SMS చదవడానికి, కాంటాక్ట్స్ యాక్సెస్ చేయడానికి, బ్యాంకింగ్ యాప్‌లను పర్యవేక్షించడానికి) కోరుతుంది. చాలా మంది వినియోగదారులు వాటిని చదవకుండానే అనుమతులు మంజూరు చేస్తారు. ఈ అనుమతుల ద్వారా, సైబర్ నేరగాళ్లు యూజర్ ఫోన్‌లోని సున్నితమైన సమాచారాన్ని (బ్యాంక్ ఖాతా వివరాలు, OTPలు, క్రెడిట్/డెబిట్ కార్డు వివరాలు, వ్యక్తిగత సమాచారం) దొంగిలిస్తారు. ఈ సమాచారాన్ని ఉపయోగించి, నేరగాళ్లు బాధితుల బ్యాంక్ ఖాతాల నుంచి లేదా క్రెడిట్‌కార్డుల నుంచి డబ్బును అపహరిస్తారు.

ప్రజలు తీసుకోవాల్సిన జాగ్రత్తలు

తెలియని వ్యక్తుల నుంచి, లేదా అనుమానాస్పదంగా కనిపించే ఏ లింక్‌పైనా క్లిక్ చేయవద్దు.

యాప్‌లను గూగుల్ ప్లే స్టోర్ లేదా యాపిల్ యాప్ స్టోర్ల నుంచి మాత్రమే ఇన్‌స్టాల్ చేసుకోవాలి. లింక్‌ల ద్వారా వచ్చే యాప్‌లను లేదా అపరిచితుల నుంచి వచ్చే APK ఫైళ్లను అస్సలు ఇన్‌స్టాల్ చేయవద్దు.

ఏదైనా యాప్ ఇన్‌స్టాల్ చేసేటప్పుడు అది కోరే అనుమతులను క్షుణ్ణంగా పరిశీలించండి. అనవసరమైన అనుమతులు అడిగితే జాగ్రత్తగా ఉండండి.

ట్రాఫిక్ చలాన్ల వివరాల కోసం అధికారిక ట్రాఫిక్ పోలీస్ వెబ్‌సైట్లను మాత్రమే సందర్శించండి.

సైబర్ నేరగాళ్లు నిరంతరం కొత్త పద్ధతులను ఉపయోగిస్తుంటారు కాబట్టి, ఎప్పటికప్పుడు అప్రమత్తంగా ఉండాలి.

ఈ మోసాల బారిన పడితే వెంటనే 1930కు ఫిర్యాదు చేయాలని తెలంగాణ సైబర్ సెక్యూరిటీ బ్యూరో సూచించింది. మీ ఫిర్యాదు సైబర్ నేరగాళ్లను పట్టుకోవడానికి, ఇతరులు మోసపోకుండా నిరోధించడానికి సహాయపడుతుంది.