తెలంగాణలోని ఆ 3 జిల్లాలకు రూ.100 కోట్లు.. ప్రత్యేక సాయం విడుదల చేసిన కేంద్రం

తెలంగాణలోని మూడు జిల్లాలకు కేంద్రం రూ. 100 కోట్లు విడుదల చేసింది. తీవ్ర వర్షాభావ పరిస్థితులతో అల్లాడుతున్న మహబూబ్‌నగర్, నారాయణపేట, నాగర్‌కర్నూల్‌ జిల్లాలకు ఈ నిధులు విడుదల చేశారు. 2021-22లో దేశవ్యాప్తంగా నిర్వహించిన సర్వే ఆధారంగా 12 రాష్ట్రాల్లో వర్షాభావ తీవ్రత అధికంగా ఉన్న జిల్లాలను కేంద్రం గుర్తించగా.. తెలంగాణ నుంచి ఈ మూడు జిల్లాలను ఎంపిక చేసింది. ఈ జిల్లాల్లో కరవు నివారణ చర్యల కోసం 15వ ఆర్థిక సంఘం సూచనల మేరకు జాతీయ విపత్తు నివారణ నిధి (NDRF) కింద కేంద్రం రూ.100 కోట్లను కేటాయించింది.

ఈ నిధులను ఆయా జిల్లాల్లో వ్యవసాయ ఉత్పత్తి వ్యవస్థ బలోపేతం, పర్యావరణ మద్దతు, గ్రామీణ రైతు కుటుంబాల ఆదాయ భద్రత చర్యలకు వినియోగించాలని నిర్దేశించింది. కేంద్రం కేటాయించిన రూ.100 కోట్లకు అదనంగా రాష్ట్ర ప్రభుత్వం తమ వాటాగా మరో రూ.50 కోట్లు కలిపి, మొత్తం రూ.150.87 కోట్ల వ్యయంతో కరవు నివారణ, అనుసరణ ప్రణాళికను అమలు చేయాలని నిర్ణయించింది. తాజాగా నిధులు విడుదల కావడంతో, రాష్ట్ర ప్రభుత్వం తన వాటాను కలిపి ఈ ప్రాజెక్టును రెండేళ్లలో పూర్తి చేయాలని లక్ష్యంగా పెట్టుకుంది. కేటాయించిన మొత్తం రూ.150.87 కోట్లను వివిధ విభాగాలకు ఈ క్రింది విధంగా వెచ్చిస్తారు. మౌలిక వసతులు, శిక్షణ, సాంకేతిక, అమలు సంస్థల ఖర్చులకు రూ.10 కోట్లు వెచ్చించనున్నారు.

ఈ మూడు జిల్లాల్లోని 25,000 రైతు కుటుంబాలకు నేరుగా సాయం అందిస్తామని తెలంగాణ వ్యవసాయశాఖ మంత్రి తుమ్మల నాగేశ్వరరావు తెలిపారు. వారికి జీవనోపాధి కల్పించడంతో పాటు, నేల ఆరోగ్యాన్ని పెంచడం, భూసార పరిరక్షణ, పంట వైవిధ్యం, రక్షిత సాగు వంటి పద్ధతుల ద్వారా వ్యవసాయాన్ని వర్షాభావ నిరోధకంగా మారుస్తామని చెప్పారు. అంతేకాకుండా, పశుపోషణ, నీటి వనరుల పెంపుదల, ఆహార భద్రత, మార్కెట్ లింకేజీలు, బీమా, రుణ సాయం వంటి అంశాల్లో కూడా రైతులకు మద్దతునిస్తామని మంత్రి స్పష్టం చేశారు. ఈ సమగ్ర ప్రణాళిక ద్వారా కరవు పీడిత జిల్లాల్లో వ్యవసాయ రంగం స్థిరత్వాన్ని పొంది, రైతుల జీవన ప్రమాణాలు మెరుగుపడతాయని ప్రభుత్వం ఆశాభావం వ్యక్తం చేసింది.