తెలంగాణకు రెడ్‌ అలర్ట్‌.. మూడు రోజులు కుండపోత వానలు

గత కొన్నిరోజులుగా తెలంగాణ వ్యాప్తంగా కుండపోత వానలు కురుస్తున్న సంగతి తెలిసిందే. ఇక భాగ్యనగరం అయితే భారీ వర్షాల కారణంగా తడిసి ముద్దవుతుంది. మంగళవారం సాయంత్రం కూడా నగరంలోని పలు ప్రాంతాల్లో భారీ వర్షం కురిసింది. ట్రాఫిక్ జామ్ వల్ల నగరవాసులు ఇబ్బంది పడ్డారు. జూబ్లీహిల్స్, బంజారా హిల్స్, ఖైరతాబాద్ ప్రాంతాల్లో భారీ వర్షం కురిసింది. అలానే చైతన్యపురి, దిల్‌షుఖ్ నగర్ ఏరియాల్లో కూడా మోస్తరు వాన కురిసింది.

కిషన్‌పురా, హైదర్ కోట్, నార్సింగ్ ప్రాంతాల్లో కూడా వర్ష కురిసింది. ట్రాఫిక్ జామ్‌తో ప్రజలు ఇబ్బంది పడ్డారు. ఈక్రమంలో వాతావరణ శాఖ అధికారులు కీలక అలర్ట్ జారీ చేశారు. తెలంగాణవ్యాప్తంగా మూడు రోజుల పాటు కుండపోత వానలు కురుస్తాయని.. పలు జిల్లాల్లో భారీ నుంచి అతి భారీ వర్షాలు కురుస్తాయని వాతావరణ శాఖ తెలిపింది. తెలంగాణకు రెడ్ అలర్ట్ జారీ చేసింది.

తెలంగాణలో రాగల మూడు రోజుల్లో భారీ వర్షాలు కురుస్తాయని హైదరాబాద్ వాతావరణ కేంద్రం హెచ్చరించింది. ఉపరితల ఆవర్తనాల ప్రభావంతో ఈ వర్షాలు కురుస్తాయని వాతావరణ శాఖ అధికారులు తెలిపారు. ఈక్రమంలో రాష్ట్రంలోని పలు జిల్లాలకు రెడ్ , ఆరెంజ్ హెచ్చరికలు జారీ చేశారు. ఆయా జిల్లా వాసులు అప్రమత్తంగా ఉండాలని.. అవసరమైతేనే బయటకు రావాలని తెలిపారు. అధికారులు కూడా అప్రమత్తంగా ఉండాలని సూచించారు.

ఈక్రమంలో రాష్ట్రంలో భారీ వర్షాల సూచన గురించి వాతావరణ శాఖ సంచాలకురాలు డాక్టర్ నాగరత్న మాట్లాడారు. రాష్ట్రంలో పలు జిల్లాలకు నేడు రెడ్‌ అలర్ట్‌ జారీ చేసినట్లు ఆమె తెలిపారు. ఇక నిర్మల్, పెద్దపల్లి, మంచిర్యాల, కొమురం భీం ఆసిఫాబాద్ జిల్లాలకు వాతావరణ శాఖ అధికారులు రెడ్ అలర్ట్ జారీ చేశారు. ఈ జిల్లాల్లో భారీ నుంచి అతి భారీ వర్షాలు కురిసే అవకాశం ఉందని తెలిపారు.

అలానే ములుగు, భద్రాత్రి కొత్తగూడెం, ఆదిలాబాద్, నిజామాబాద్, జగిత్యాల, జయశంకర్ భూపాలపల్లి జిల్లాల్లో భారీ వర్షాలు కురుస్తాయని వాతావరణ శాఖ తెలిపింది. ఈ జిల్లాలకు ఆరెంజ్ హెచ్చరిక జారీ చేశారు. రానున్న మూడు రోజులు భారీ వర్షాలు కురిసే అవకాశం ఉండటంతో ప్రజలంతా అప్రమత్తంగా ఉండాలని అధికారులు అలర్ట్ జారీ చేశారు. వర్షాలతో పాటుగా బలమైన ఈదురు గాలులు కూడా వీస్తాయని హెచ్చరించారు. కనుక జనాలతో పాటుగా అధికారులు కూడా అప్రమత్తంగా ఉండాలని సూచించారు.